၁၁. အသညကထာဝဏ္ဏနာ

၃၈၁. ဣဒါနိ အသညကထာ နာမ ဟောတိ. တတ္ထ ယေသံ ‘‘သင်္ခါရပစ္စယာ ဝိညာဏ’’န္တိ ဝစနတော ဝိနာ ဝိညာဏေန ပဋိသန္ဓိ နာမ နတ္ထိ. ‘‘သညုပ္ပါဒါ စ ပန တေ ဒေဝါ တမှာ ကာယာ စဝန္တီ’’တိ ဝစနတော အသညသတ္တာနမ္ပိ စုတိပဋိသန္ဓိက္ခဏေ သညာ အတ္ထီတိ လဒ္ဓိ၊ သေယျထာပိ ဧတရဟိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ ပဋိညာ ဣတရဿ. တတော နံ သကဝါဒီ ‘‘ကိံ တေ တံ ဌာနံ သညာဘဝေါ’’တိအာဒီဟိ စောဒေတုံ သညာဘဝေါ သညာဂတီတိအာဒိမာဟ. တံ သဗ္ဗံ တတော ပရဉ္စ ပါဠိနယေနေဝ ဝေဒိတဗ္ဗန္တိ.

အသညကထာဝဏ္ဏနာ.