၈. ကုက္ကုဠကထာဝဏ္ဏနာ

၃၃၈. ဣဒါနိ ကုက္ကုဠကထာ နာမ ဟောတိ. တတ္ထ ယေသံ ‘‘သဗ္ဗံ၊ ဘိက္ခဝေ၊ အာဒိတ္တံ (သံ. နိ. ၄.၂၈၊ မဟာဝ. ၅၄) သဗ္ဗေ သင်္ခါရာ ဒုက္ခာ’’တိအာဒီနိ (ဓ. ပ. ၂၇၈) သုတ္တာနိ အယောနိသော ဂဟေတွာ ‘‘နိပ္ပရိယာယေနေဝ သဗ္ဗေ သင်္ခါရာ ကုက္ကုဠာ ဝီတစ္စိတင်္ဂါရသမ္မိဿာ ဆာရိကနိရယသဒိသာ’’တိ လဒ္ဓိ၊ သေယျထာပိ ဧတရဟိ ဂေါကုလိကာနံ၊ တေသံ နာနပ္ပကာရသုခသန္ဒဿနေန တံ လဒ္ဓိံ ဝိဝေစေတုံ ပုစ္ဆာ သကဝါဒိဿ၊ ပဋိညာ ပရဝါဒိဿ. တတ္ထ အနောဓိံ ကတွာတိ ဩဓိံ မရိယာဒံ ကောဋ္ဌာသံ အကရိတွာ၊ အဝိသေသေန သဗ္ဗေယေဝါတိ အတ္ထော. သေသံ သဗ္ဗံ ပါဠိနယေနေဝ ဝေဒိတဗ္ဗံ သဒ္ဓိံ သုတ္တသာဓနာယာတိ.

ကုက္ကုဠကထာဝဏ္ဏနာ.