၆. ဒုက္ခာဟာရကထာဝဏ္ဏနာ

၃၃၄. ဣဒါနိ ဒုက္ခာဟာရကထာ နာမ ဟောတိ. တတ္ထ ‘‘ဒုက္ခံ ဒုက္ခန္တိ ဝါစံ ဘာသန္တော ဒုက္ခေ ဉာဏံ အာဟရတိ၊ တံ ဒုက္ခာဟာရော နာမ ဝုစ္စတိ. တဉ္စ ပနေတံ မဂ္ဂင်္ဂံ မဂ္ဂပရိယာပန္န’’န္တိ ယေသံ လဒ္ဓိ၊ သေယျထာပိ ဧတရဟိ ပုဗ္ဗသေလိယာနံ၊ တေ သန္ဓာယ ဒုက္ခာဟာရောတိ ပုစ္ဆာ သကဝါဒိဿ၊ ပဋိညာ ပရဝါဒိဿ. ယေ ကေစီတိ ပဌမပဉှေ အဝိပဿကေ သန္ဓာယ ပဋိက္ခိပတိ၊ ဒုတိယပဉှေ ဝိပဿကေ သန္ဓာယ ပဋိဇာနာတိ၊ တံ ပနဿ လဒ္ဓိမတ္တမေဝ. တသ္မာ ‘‘သဗ္ဗေ တေ’’တိ ဝါဒဿ ဘိန္ဒနတ္ထံ ဗာလပုထုဇ္ဇနာတိအာဒိမာဟ. တံ ဥတ္တာနတ္ထမေဝါတိ.

ဒုက္ခာဟာရကထာဝဏ္ဏနာ.