၂-၃-၄. အညာဏာဒိကထာဝဏ္ဏနာ

၃၁၄. ဣဒါနိ အညာဏံ၊ ကင်္ခါ၊ ပရဝိတရဏာတိ တိဿော ကထာ နာမ ဟောန္တိ. တတ္ထ ယေသံ ‘‘အရဟတော ဣတ္ထိပုရိသာဒီနံ နာမဂေါတ္တာဒီသု ဉာဏပ္ပဝတ္တိယာ အဘာဝေန အတ္ထိ အညာဏံ၊ တတ္ထေဝ သန္နိဋ္ဌာနာဘာဝေန အတ္ထိ ကင်္ခါ. ယသ္မာ စ နေသံ တာနိ ဝတ္ထူနိ ပရေ ဝိတရန္တိ ပကာသေန္တိ အာစိက္ခန္တိ၊ တသ္မာ နေသံ အတ္ထိ ပရဝိတရဏာ’’တိ ဣမာ လဒ္ဓိယော၊ သေယျထာပိ ဧတရဟိ ပုဗ္ဗသေလိယာဒီနံ၊ တေသံ တာ လဒ္ဓိယော ဘိန္ဒိတုံ တီသုပိ ကထာသု ပုစ္ဆာ သကဝါဒိဿ၊ ပဋိညာ စ ပဋိက္ခေပေါ စ ဣတရဿ. တတ္ထ သဗ္ဗေသုပိ ပဉှေသု စေဝ ဝိဿဇ္ဇနေသု စ ပါဠိံ အနုဂန္တွာဝ အတ္ထော ဝေဒိတဗ္ဗောတိ.

အညာဏာဒိကထာဝဏ္ဏနာ.