၁၀. ဝေါဟာရကထာဝဏ္ဏနာ

၃၄၇. ဣဒါနိ ဝေါဟာရကထာ နာမ ဟောတိ. တတ္ထ ဗုဒ္ဓေါ ဘဂဝါ လောကုတ္တရေန ဝေါဟာရေန ဝေါဟရတီတိ ယေသံ လဒ္ဓိ၊ သေယျထာပိ ဧတရဟိ အန္ဓကာနံ၊ တေ သန္ဓာယ ပုစ္ဆာ သကဝါဒိဿ၊ လဒ္ဓိဝသေန ပဋိညာ ပရဝါဒိဿ. လောကုတ္တရေ သောတေတိအာဒီနိ တဿ အယုတ္တဝါဒီဘာဝဒီပနတ္ထံ ဝုတ္တာနိ. အယဉှေတ္ထ အဓိပ္ပါယော – ‘‘သဒ္ဒါယတနမေဝ တေ လောကုတ္တရံ၊ ဥဒါဟု သောတာဒီနိပီ’’တိ.

ဟဉ္စိ ဗုဒ္ဓဿ ဘဂဝတော ဝေါဟာရော လောကိယေ သောတေ ပဋိဟညတီတိ ဧတ္ထ ယဒိ သော လောကုတ္တရေ ပဋိဟညေယျ. လောကုတ္တရော သိယာတိ ဧဝမတ္ထော န ဂဟေတဗ္ဗော. လောကိယေ ပဋိဟညမာနဿ ပန လောကုတ္တရတာ နာမ နတ္ထီတိ အယမေတ္ထာဓိပ္ပါယော. လောကိယေန ဝိညာဏေနာတိ ဧတ္ထာပိ လောကိယေနေဝါတိ အတ္ထော. ဣတရထာ အနေကန္တတာ သိယာ. လောကုတ္တရဉှိ လောကိယေနပိ ဉာဏေန ဉာယတီ. ဧဝံ သဗ္ဗံ ယထာနုရူပတော ဝေဒိတဗ္ဗံ. သဗ္ဗေ တေ မဂ္ဂံ ဘာဝေန္တီတိ ပဉှေသု ယေ မဂ္ဂံ နပ္ပဋိလဘန္တိ၊ တေ သန္ဓာယ ပဋိက္ခိပတိ. ယေ ပဋိလဘန္တိ၊ တေ သန္ဓာယ ပဋိဇာနာတိ.

၃၅၁. သောဝဏ္ဏမယာယာတိ သုဝဏ္ဏမယာယ. ဣဒံ ပရဝါဒိဿ ဥဒါဟရဏံ.

ဧဠဏ္ဍိယာယာတိ ဧဠဏ္ဍမယာယ. ဣဒံ သကဝါဒိဿ ဥဒါဟရဏံ. လောကိယံ ဝေါဟရန္တဿ လောကိယောတိ အယမ္ပိ ဧကာ လဒ္ဓိ. သာ ဧတရဟိ ဧကစ္စာနံ အန္ဓကာနံ လဒ္ဓိ. သေသမေတ္ထ ဥတ္တာနတ္ထမေဝါတိ.

ဝေါဟာရကထာဝဏ္ဏနာ.