၉. နဝမနယော သမ္ပယုတ္တေနသမ္ပယုတ္တပဒဝဏ္ဏနာ

၃၁၉. ဣဒါနိ သမ္ပယုတ္တေနသမ္ပယုတ္တပဒံ ဘာဇေတုံ ဝေဒနာက္ခန္ဓေနာတိအာဒိ အာရဒ္ဓံ. တတ္ထ ယံ ခန္ဓာဒိဝသေန သမ္ပယုတ္တံ၊ ပုန တဿေဝ ခန္ဓာဒီဟိ သမ္ပယောဂံ ပုစ္ဆိတွာ ဝိဿဇ္ဇနံ ကတံ. တံ ရူပေန ဝါ ရူပမိဿကေဟိ ဝါ သဗ္ဗရူပက္ခန္ဓသင်္ဂါဟကေဟိ ဝါ ပဒေဟိ သဒ္ဓိံ န ယုဇ္ဇတိ. ရူပေန ဟိ ရူပမိဿကေန ဝါ အညေသံ သမ္ပယောဂေါ နတ္ထိ. သဗ္ဗရူပက္ခန္ဓသင်္ဂါဟကေဟိ သဗ္ဗေသံ သမ္ပယောဂါရဟာနံ ခန္ဓာဒီနံ ဂဟိတတ္တာ အညံယေဝ နတ္ထိ၊ ယံ တေန သဟ သမ္ပယောဂံ ဂစ္ဆေယျ. တသ္မာ တထာရူပါနိ ပဒါနိ ဣဓ န ဂဟိတာနိ. ယာနိ ပန ပဒါနိ ရူပေန အသမ္မိဿံ အရူပေကဒေသံ ဒီပေန္တိ၊ တာနိ ဣဓ ဂဟိတာနိ. တေသံ ဣဒမုဒ္ဒါနံ –

‘‘အရူပက္ခန္ဓာ စတ္တာရော၊ မနာယတနမေဝ စ၊

ဝိညာဏဓာတုယော သတ္တ၊ ဒွေ သစ္စာ စုဒ္ဒသိန္ဒြိယာ.

‘‘ပစ္စယေ ဒွါဒသ ပဒါ၊ တတော ဥပရိ သောဠသ၊

တိကေသု အဋ္ဌ ဂေါစ္ဆကေ၊ တေစတ္တာလီသမေဝ စ.

‘‘မဟန္တရဒုကေ သတ္တ၊ ပဒါ ပိဋ္ဌိဒုကေသု ဆ၊

နဝမဿ ပဒဿေတေ၊ နိဒ္ဒေသေ သင်္ဂဟံ ဂတာ’’တိ.

သဗ္ဗပဉှေသု ပန ယေ ဓမ္မာ ပုစ္ဆာယ ဥဒ္ဓဋာ၊ တေ ယေဟိ သမ္ပယုတ္တာ ဟောန္တိ၊ တေသံ ဝသေန ခန္ဓာဒိဘေဒေါ ဝေဒိတဗ္ဗော. ဝေဒနာက္ခန္ဓေန ဟိ ဣတရေ တယော ခန္ဓာ သမ္ပယုတ္တာ၊ ပုန တေဟိ ဝေဒနာက္ခန္ဓော သမ္ပယုတ္တော. သော တေဟိ သညာဒီဟိ တီဟိ ခန္ဓေဟိ၊ ဧကေန မနာယတနေန၊ သတ္တဟိ ဝိညာဏဓာတူဟိ၊ ဧကသ္မိံ ဓမ္မာယတနေ၊ ဓမ္မဓာတုယာ စ၊ ကေဟိစိ သညာသင်္ခါရေဟေဝ သမ္ပယုတ္တော. ဧသေဝ နယော သဗ္ဗတ္ထာတိ.

သမ္ပယုတ္တေနသမ္ပယုတ္တပဒဝဏ္ဏနာ.