(၁၀) ၅. သာမညဝဂ္ဂေါ

၉၁. ဣတော ပရံ အထ ခေါ ဗောဇ္ဈာ ဥပါသိကာတိအာဒီသု ဗောဇ္ဈာ ဥပါသိကာ၊ သိရိမာ ဥပါသိကာ၊ ပဒုမာ ဥပါသိကာ၊ သုတနာ ဥပါသိကာ၊ မနုဇာ ဥပါသိကာ၊ ဥတ္တရာ ဥပါသိကာ၊ မုတ္တာ ဥပါသိကာ၊ ခေမာ ဥပါသိကာ၊ ရုစီ ဥပါသိကာ၊ စုန္ဒီ ရာဇကုမာရီ၊ ဗိမ္ဗီ ဥပါသိကာ၊ သုမနာ ရာဇကုမာရီ၊ မလ္လိကာ ဒေဝီ၊ တိဿာ ဥပါသိကာ၊ တိဿာမာတာ ဥပါသိကာ၊ သောဏာ ဥပါသိကာ၊ သောဏာယ မာတာ ဥပါသိကာ၊ ကာဏာ ဥပါသိကာ၊ ကာဏမာတာ ဥပါသိကာ၊ ဥတ္တရာ နန္ဒမာတာ၊ ဝိသာခါ မိဂါရမာတာ၊ ခုဇ္ဇုတ္တရာ ဥပါသိကာ၊ သာမာဝတီ ဥပါသိကာ၊ သုပ္ပဝါသာ ကောလိယဓီတာ၊ သုပ္ပိယာ ဥပါသိကာ၊ နကုလမာတာ ဂဟပတာနီတိ ဣမာသံ ဧတ္တကာနံ အဋ္ဌင်္ဂသမန္နာဂတံ ဥပေါသထကမ္မမေဝ ကထိတံ. ဣစ္ဆန္တေန ဝိတ္ထာရေတွာ ကထေတဗ္ဗံ. သေသံ သဗ္ဗတ္ထ ဥတ္တာနတ္ထမေဝါတိ.