၈. သံယောဂသုတ္တဝဏ္ဏနာ

၅၁. အဋ္ဌမေ သံယောဂဝိသံယောဂန္တိ သံယောဂဝိသံယောဂသာဓကံ. ဓမ္မပရိယာယန္တိ ဓမ္မကာရဏံ. အဇ္ဈတ္တံ ဣတ္ထိန္ဒြိယန္တိ နိယကဇ္ဈတ္တေ ဣတ္ထိဘာဝံ. ဣတ္ထိကုတ္တန္တိ ဣတ္ထိကိရိယံ. ဣတ္ထာကပ္ပန္တိ နိဝါသနပါရုပနာဒိဣတ္ထိအာကပ္ပံ. ဣတ္ထိဝိဓန္တိ ဣတ္ထိယာ မာနဝိဓံ. ဣတ္ထိဆန္ဒန္တိ ဣတ္ထိယာ အဇ္ဈာသယစ္ဆန္ဒံ. ဣတ္ထိဿရန္တိ ဣတ္ထိသဒ္ဒံ. ဣတ္ထာလင်္ကာရန္တိ ဣတ္ထိယာ ပသာဓနဘဏ္ဍံ. ပုရိသိန္ဒြိယာဒီသုပိ ဧသေဝ နယော. ဗဟိဒ္ဓါ သံယောဂန္တိ ပုရိသေန သဒ္ဓိံ သမာဂမံ. အတိဝတ္တတီတိ အနဘိရတာတိ ဧဝံ ဝုတ္တာယ ဗလဝဝိပဿနာယ အရိယမဂ္ဂံ ပတွာ အတိဝတ္တတိ. ဣမသ္မိံ သုတ္တေ ဝဋ္ဋဝိဝဋ္ဋံ ကထိတံ.