၅-၆. သညာသုတ္တဒွယဝဏ္ဏနာ

၄၈-၄၉. ပဉ္စမေ အမတောဂဓာတိ နိဗ္ဗာနပတိဋ္ဌာ. အမတပရိယောသာနာတိ နိဗ္ဗာနာဝသာနာ. ဆဋ္ဌေ မေထုနဓမ္မသမာပတ္တိယာတိ မေထုနဓမ္မေန သမင်္ဂိဘာဝတော. နှာရုဒဒ္ဒုလန္တိ နှာရုခဏ္ဍံ နှာရုဝိလေခနံ ဝါ. အနုသန္ဒတီတိ ပဝတ္တတိ. နတ္ထိ မေ ပုဗ္ဗေနာပရံ ဝိသေသောတိ နတ္ထိ မယှံ ပုဗ္ဗေန အဘာဝိတကာလေန သဒ္ဓိံ အပရံ ဘာဝိတကာလေ ဝိသေသော. လောကစိတြေသူတိ တိဓာတုကလောကသန္နိဝါသသင်္ခါတေသု လောကစိတြေသု. အာလသျေတိ အာလသိယဘာဝေ. ဝိဿဋ္ဌိယေတိ ဝိဿဋ္ဌဘာဝေ. အနနုယောဂေတိ ယောဂဿ အနနုယုဉ္ဇနေ. အဟင်္ကာရမမင်္ကာရမာနာပဂတန္တိ အဟင်္ကာရဒိဋ္ဌိတော စ မမင်္ကာရတဏှာတော စ နဝဝိဓမာနတော စ အပဂတံ. ဝိဓာသမတိက္ကန္တန္တိ တိဿော ဝိဓာ အတိက္ကန္တံ. သန္တန္တိ တပ္ပစ္စနီကကိလေသေဟိ သန္တံ. သုဝိမုတ္တန္တိ ပဉ္စဟိ ဝိမုတ္တီဟိ သုဋ္ဌု ဝိမုတ္တံ.