၄. ဒေဝတာဝဂ္ဂေါ

၅. ပဌမမိတ္တသုတ္တဝဏ္ဏနာ

၃၆. စတုတ္ထဿ ပဉ္စမေ ဒုဒ္ဒဒန္တိ ဒုပ္ပရိစ္စဇံ မဟာရဟံ ဘဏ္ဍကံ. ဒုက္ကရံ ကရောတီတိ ကာတုံ အသုကရံ ကမ္မံ ကရောတိ. ဒုက္ခမံ ခမတီတိ သဟာယဿ အတ္ထာယ ဒုရဓိဝါသံ အဓိဝါသေတိ. ဂုယှမဿ အာဝိကရောတီတိ အတ္တနော ဂုယှံ တဿ အာဝိကရောတိ. ဂုယှမဿ ပရိဂုဟတီတိ တဿ ဂုယှံ အညေသံ နာစိက္ခတိ. ခီဏေန နာတိမညတီတိ တဿ ဘောဂေ ခီဏေ တေန ခယေန တံ နာတိမညတိ၊ တသ္မိံ ဩမာနံ အတ္တနိ စ အတိမာနံ န ကရောတိ.

၆. ဒုတိယမိတ္တသုတ္တဝဏ္ဏနာ

၃၇. ဆဋ္ဌေ ဝတ္တာတိ ဝစနကုသလော. ဝစနက္ခမောတိ ဝစနံ ခမတိ၊ ဒိန္နံ ဩဝါဒံ ကရောတိ. ဂမ္ဘီရန္တိ ဂုယှံ ရဟဿံ ဈာနနိဿိတံ ဝိပဿနာမဂ္ဂဖလနိဗ္ဗာနနိဿိတံ.

၇. ပဌမပဋိသမ္ဘိဒါသုတ္တဝဏ္ဏနာ

၃၈. သတ္တမေ ဣဒံ မေ စေတသော လီနတ္တန္တိ ဥပ္ပန္နေ စေတသော လီနတ္တေ ‘‘ဣဒံ မေ စေတသော လီနတ္တ’’န္တိ ယထာသဘာဝတော ဇာနာတိ. အဇ္ဈတ္တံ သံခိတ္တံ နာမ ထိနမိဒ္ဓါနုဂတံ. ဗဟိဒ္ဓါ ဝိက္ခိတ္တံ နာမ ပဉ္စသု ကာမဂုဏေသု ဝိက္ခိတ္တံ. ဝေဒနာတိအာဒီနိ ပပဉ္စမူလဝသေန ဂဟိတာနိ. ဝေဒနာ ဟိ တဏှာယ မူလံ သုခဝသေန တဏှုပ္ပတ္တိတော၊ သညာ ဒိဋ္ဌိယာ မူလံ အဝိဘူတာရမ္မဏေ ဒိဋ္ဌိဥပ္ပတ္တိတော၊ ဝိတက္ကော မာနဿ မူလံ ဝိတက္ကဝသေန အသ္မီတိ မာနုပ္ပတ္တိတော. သပ္ပါယာသပ္ပါယေသူတိ ဥပကာရာနုပကာရေသု. နိမိတ္တန္တိ ကာရဏံ. သေသံ သဗ္ဗတ္ထ ဥတ္တာနတ္ထမေဝါတိ.

ဒေဝတာဝဂ္ဂေါ စတုတ္ထော.