၄. သင်္ဂဏိကာရာမသုတ္တဝဏ္ဏနာ

၆၈. စတုတ္ထေ သင်္ဂဏိကာရာမောတိ ဂဏသင်္ဂဏိကာရာမော. သုတ္တန္တိကဂဏာဒီသု ပန ဂဏေသု အတ္တနော ဝါ ပရိသာသင်္ခါတေ ဂဏေ ရမတီတိ ဂဏာရာမော. ပဝိဝေကေတိ ကာယဝိဝေကေ. စိတ္တဿ နိမိတ္တန္တိ သမာဓိဝိပဿနာစိတ္တဿ နိမိတ္တံ သမာဓိဝိပဿနာကာရံ. သမ္မာဒိဋ္ဌိန္တိ ဝိပဿနာသမ္မာဒိဋ္ဌိံ. သမာဓိန္တိ မဂ္ဂသမာဓိဉ္စေဝ ဖလသမာဓိဉ္စ. သံယောဇနာနီတိ ဒသ သံယောဇနာနိ. နိဗ္ဗာနန္တိ အပစ္စယပရိနိဗ္ဗာနံ.