၅. ဒါရုကမ္မိကသုတ္တဝဏ္ဏနာ

၅၉. ပဉ္စမေ ဒါရုကမ္မိကောတိ ဒါရုဝိက္ကယေန ပဝတ္တိတာဇီဝေါ ဧကော ဥပါသကော. ကာသိကစန္ဒနန္တိ သဏှစန္ဒနံ. အင်္ဂေနာတိ အဂုဏင်္ဂေန၊ သုက္ကပက္ခေ ဂုဏင်္ဂေန. နေမန္တနိကောတိ နိမန္တနံ ဂဏှနကော. သံဃေ ဒါနံ ဒဿာမီတိ ဘိက္ခုသံဃဿ ဒဿာမိ. သော ဧဝံ ဝတွာ သတ္ထာရံ အဘိဝါဒေတွာ ပက္ကာမိ. အထဿ အပရဘာဂေ ပဉ္စသတာ ကုလူပကာ ဘိက္ခူ ဂိဟိဘာဝံ ပါပုဏိံသု. သော ‘‘ကုလူပကဘိက္ခူ တေ ဝိဗ္ဘန္တာ’’တိ ဝုတ္တေ ‘‘ကိံ ဧတ္ထ မယှ’’န္တိ ဝတွာ စိတ္တုပ္ပါဒဝေမတ္တမတ္တမ္ပိ န အကာသိ. ဣဒံ သန္ဓာယ သတ္ထာ သံဃေ တေ ဒါနံ ဒဒတော စိတ္တံ ပသီဒိဿတီတိ အာဟ.