၈. ဣန္ဒြိယသံဝရသုတ္တဝဏ္ဏနာ

၅၀. အဋ္ဌမေ ဟတူပနိသံ ဟောတီတိ ဟတူပနိဿယံ ဟောတိ. သီလဝိပန္နဿာတိ ဝိပန္နသီလဿ. ယထာဘူတဉာဏဒဿနန္တိ တရုဏဝိပဿနာဉာဏံ. နိဗ္ဗိဒါဝိရာဂေါတိ ဧတ္ထ နိဗ္ဗိဒါ ဗလဝဝိပဿနာ၊ ဝိရာဂေါ အရိယမဂ္ဂေါ. ဝိမုတ္တိဉာဏဒဿနန္တိ ဧတ္ထ ဝိမုတ္တီတိ အရဟတ္တဖလံ၊ ဉာဏဒဿနန္တိ ပစ္စဝေက္ခဏဉာဏံ. ဥပနိဿယသမ္ပန္နံ ဟောတီတိ သမ္ပန္နဥပနိဿယံ ဟောတိ. ဣမသ္မိံ သုတ္တေ သီလာနုရက္ခဏဣန္ဒြိယသံဝရော ကထိတော.