၄. မဟာစုန္ဒသုတ္တဝဏ္ဏနာ

၄၆. စတုတ္ထေ စေတီသူတိ စေတိရဋ္ဌေ. သယံဇာတိယန္တိ ဧဝံနာမကေ နိဂမေ. မဟာစုန္ဒောတိ ဓမ္မသေနာပတိဿ ကနိဋ္ဌဘာတိကော. ဓမ္မေ ယောဂေါ အနုယောဂေါ ဧတေသန္တိ ဓမ္မယောဂါ. ဓမ္မကထိကာနံ ဧတံ နာမံ. ဈာယန္တီတိ ဈာယီ. အပသာဒေန္တီတိ ဃဋ္ဋေန္တိ ဟိံသန္တိ. ဈာယန္တီတိ စိန္တေန္တိ. ပဇ္ဈာယန္တီတိအာဒီနိ ဥပသဂ္ဂဝသေန ဝဍ္ဎိတာနိ. ကိမိမေ ဈာယန္တီတိ ကိံ နာမ ဣမေ ဈာယန္တိ. ကိန္တိမေ ဈာယန္တီတိ ကိမတ္ထံ ဣမေ ဈာယန္တိ. ကထံ ဣမေ ဈာယန္တီတိ ကေန ကာရဏေန ဣမေ ဈာယန္တိ. အမတံ ဓာတုံ ကာယေန ဖုသိတွာ ဝိဟရန္တီတိ မရဏဝိရဟိတံ နိဗ္ဗာနဓာတုံ သန္ဓာယ ကမ္မဋ္ဌာနံ ဂဟေတွာ ဝိဟရန္တာ အနုက္ကမေန တံ နာမကာယေန ဖုသိတွာ ဝိဟရန္တိ. ဂမ္ဘီရံ အတ္ထပဒန္တိ ဂုဠှံ ပဋိစ္ဆန္နံ ခန္ဓဓာတုအာယတနာဒိအတ္ထံ. ပညာယ အတိဝိဇ္ဈ ပဿန္တီတိ သဟဝိပဿနာယ မဂ္ဂပညာယ ပဋိဝိဇ္ဈိတွာ ပဿန္တိ. ဣမသ္မိံ ပနတ္ထေ သမ္မသနပဋိဝေဓပညာပိ ဥဂ္ဂဟပရိပုစ္ဆာပညာပိ ဝဋ္ဋတိယေဝါတိ.