၈. အတ္တကာရီသုတ္တဝဏ္ဏနာ

၃၈. အဋ္ဌမေ အဒ္ဒသံ ဝါ အဿောသိံ ဝါတိ အက္ခီနိ ဥမ္မီလေတွာ မာ အဒ္ဒသံ၊ အသုကသ္မိံ နာမ ဌာနေ ဝသတီတိ မာ အဿောသိံ၊ ကထေန္တဿ ဝါ ဝစနံ မာ အဿောသိံ. ကထဉှိ နာမာတိ ကေန နာမ ကာရဏေန. အာရမ္ဘဓာတူတိ အာရဘနဝသေန ပဝတ္တဝီရိယံ. နိက္ကမဓာတူတိ ကောသဇ္ဇတော နိက္ခမနသဘာဝံ ဝီရိယံ. ပရက္ကမဓာတူတိ ပရက္ကမသဘာဝေါ. ထာမဓာတူတိ ထာမသဘာဝေါ. ဌိတိဓာတူတိ ဌိတိသဘာဝေါ. ဥပက္ကမဓာတူတိ ဥပက္ကမသဘာဝေါ. သဗ္ဗံ စေတံ တေန တေနာကာရေန ပဝတ္တဿ ဝီရိယဿေဝ နာမံ.