၂-၃. အပရိဟာနသုတ္တဒွယဝဏ္ဏနာ

၃၂-၃၃. ဒုတိယေ သတ္ထုဂါရဝတာတိ သတ္ထရိ ဂရုဘာဝေါ. ဓမ္မဂါရဝတာတိ နဝဝိဓေ လောကုတ္တရဓမ္မေ ဂရုဘာဝေါ. သံဃဂါရဝတာတိ သံဃေ ဂရုဘာဝေါ. သိက္ခာဂါရဝတာတိ တီသု သိက္ခာသု ဂရုဘာဝေါ. အပ္ပမာဒဂါရဝတာတိ အပ္ပမာဒေ ဂရုဘာဝေါ. ပဋိသန္ထာရဂါရဝတာတိ ဓမ္မာမိသဝသေန ဒုဝိဓေ ပဋိသန္ထာရေ ဂရုဘာဝေါ. သတ္ထာ ဂရု အဿာတိ သတ္ထုဂရု. ဓမ္မော ဂရု အဿာတိ ဓမ္မဂရု. တိဗ္ဗဂါရဝေါတိ ဗဟလဂါရဝေါ. ပဋိသန္ထာရေ ဂါရဝေါ အဿာတိ ပဋိသန္ထာရဂါရဝေါ. တတိယေ သပ္ပတိဿောတိ သဇေဋ္ဌကော သဂါရဝေါ. ဟိရောတ္တပ္ပံ ပနေတ္ထ မိဿကံ ကထိတံ.