၁၁. ဒါရုက္ခန္ဓသုတ္တဝဏ္ဏနာ

၄၁. ဧကာဒသမေ စေတောဝသိပ္ပတ္တောတိ စိတ္တဝသိဘာဝံ ပတ္တော. ပထဝီတွေဝ အဓိမုစ္စေယျာတိ ထဒ္ဓါကာရံ ပထဝီဓာတူတိ သလ္လက္ခေယျ. ယံ နိဿာယာတိ ယံ ဝိဇ္ဇမာနံ ထဒ္ဓါကာရံ ပထဝီဓာတုံ နိဿာယ အမုံ ဒါရုက္ခန္ဓံ ပထဝီတွေဝ အဓိမုစ္စေယျ၊ သာ ဧတ္ထ ပထဝီဓာတု အတ္ထီတိ. ဣမိနာ နယေန သေသပဒါနိပိ ဝေဒိတဗ္ဗာနိ. ယထေဝ ဟိ တသ္မိံ ထဒ္ဓါကာရာ ပထဝီဓာတု အတ္ထိ၊ ဧဝံ ယူသာကာရာ အာပေါဓာတု၊ ဥဏှာကာရာ တေဇောဓာတု၊ ဝိတ္ထမ္ဘနာကာရာ ဝါယောဓာတု၊ ရတ္တဝဏ္ဏမှိ သာရေ ပဒုမပုပ္ဖဝဏ္ဏာ သုဘဓာတု၊ ပူတိဘူတေ စုဏ္ဏေ စေဝ ဖေဂ္ဂုပပဋိကာသု စ အမနုညဝဏ္ဏာ အသုဘဓာတု၊ တံ နိဿာယ အမုံ ဒါရုက္ခန္ဓံ အသုဘန္တွေဝ အဓိမုစ္စေယျ သလ္လက္ခေယျာတိ. ဣမသ္မိံ သုတ္တေ မိဿကဝိဟာရော နာမ ကထိတော.