၇. သောပ္ပသုတ္တဝဏ္ဏနာ

၁၇. သတ္တမေ ပဋိသလ္လာနာ ဝုဋ္ဌိတောတိ ဧကီဘာဝါယ ဓမ္မနိဇ္ဈာနက္ခန္တိတော ဖလသမာပတ္တိဝိဟာရတော ဝုဋ္ဌိတော. ယထာဝိဟာရန္တိ အတ္တနော အတ္တနော ဝသနဝိဟာရံ. နဝါတိ ပဗ္ဗဇ္ဇာယ နဝကာ. တေ ပဉ္စသတမတ္တာ အဟေသုံ. ကာကစ္ဆမာနာတိ ကာကသဒ္ဒံ ကရောန္တာ ဒန္တေ ခါဒန္တာ. ထေရာတိ ထိရဘာဝံ ပတ္တာ. တေန နောတိ တေန နု. သေယျသုခါဒီနိ ဟေဋ္ဌာ ဝုတ္တတ္ထာနေဝ. ရဋ္ဌိကောတိ ယော ရဋ္ဌံ ဘုဉ္ဇတိ. ပေတ္တဏိကောတိ ယော ပိတရာ ဘုတ္တာနုဘုတ္တံ ဘုဉ္ဇတိ. သေနာပတိကောတိ သေနာယ ဇေဋ္ဌကော. ဂါမဂါမဏိကောတိ ဂါမဘောဇကော. ပူဂဂါမဏိကောတိ ဂဏဇေဋ္ဌကော. အဝိပဿကော ကုသလာနံ ဓမ္မာနန္တိ ကုသလာနံ ဓမ္မာနံ အနေသကော အဂဝေသကော ဟုတွာ. ဗောဓိပက္ခိယာနံ ဓမ္မာနန္တိ သတ္တတိံသာယ ဗောဓိပက္ခိယဓမ္မာနံ.