၈. အလဗ္ဘနီယဌာနသုတ္တဝဏ္ဏနာ

၄၈. အဋ္ဌမေ အလဗ္ဘနီယာနီတိ အလဒ္ဓဗ္ဗာနိ၊ န သက္ကာ လဘိတုံ. ဌာနာနီတိ ကာရဏာနိ. ဇရာဓမ္မံ မာ ဇီရီတိ ယံ မယှံ ဇရာသဘာဝံ၊ တံ မာ ဇီရတု. သေသပဒေသုပိ ဧသေဝ နယော. နစ္ဆာဒေယျာတိ န ရုစ္စေယျ. အဗ္ဗုဟီတိ နီဟရိ.

ယတောတိ ယသ္မိံ ကာလေ. အာပဒါသူတိ ဥပဒ္ဒဝေသု. န ဝေဓတီတိ န ကမ္ပတိ နာနုသောစတိ. အတ္ထဝိနိစ္ဆယညူတိ ကာရဏတ္ထဝိနိစ္ဆယေ ကုသလော. ပုရာဏန္တိ နိဗ္ဗိကာရတာယ ပေါရာဏကမေဝ. ဇပ္ပေနာတိ ဝဏ္ဏဘဏနေန. မန္တေနာတိ မဟာနုဘာဝမန္တပရိဝတ္တနေန. သုဘာသိတေနာတိ သုဘာသိတကထနေန. အနုပ္ပဒါနေနာတိ သတဿ ဝါ သဟဿဿ ဝါ ဒါနေန. ပဝေဏိယာ ဝါတိ ကုလဝံသေန ဝါ၊ ‘‘ဣဒံ အမှာကံ ပဝေဏိယာ အာစိဏ္ဏံ၊ ဣဒံ အနာစိဏ္ဏ’’န္တိ ဧဝံ ပဝေဏိကထနေနာတိ အတ္ထော. ယထာ ယထာ ယတ္ထ လဘေထ အတ္ထန္တိ ဧတေသု ဇပ္ပါဒီသု ယေန ယေန ယတ္ထ ယတ္ထ ဌာနေ ဇရာဓမ္မာဒီနံ အဇီရဏတာဒိအတ္ထံ လဘေယျ. တထာ တထာ တတ္ထ ပရက္ကမေယျာတိ တေန တေန တသ္မိံ တသ္မိံ ဌာနေ ပရက္ကမံ ကရေယျ. ကမ္မံ ဒဠှန္တိ ဝဋ္ဋဂါမိကမ္မံ မယာ ထိရံ ကတွာ အာယူဟိတံ၊ သွာဟံ ဣဒါနိ ကိန္တိ ကရောမီတိ ဧဝံ ပစ္စဝေက္ခိတွာ အဓိဝါသေယျာတိ.