၆. ကာလဒါနသုတ္တဝဏ္ဏနာ

၃၆. ဆဋ္ဌေ ကာလဒါနာနီတိ ယုတ္တဒါနာနိ၊ ပတ္တဒါနာနိ အနုစ္ဆဝိကဒါနာနီတိ အတ္ထော. နဝသဿာနီတိ အဂ္ဂသဿာနိ. နဝဖလာနီတိ အာရာမတော ပဌမုပ္ပန္နာနိ အဂ္ဂဖလာနိ. ပဌမံ သီလဝန္တေသု ပတိဋ္ဌာပေတီတိ ပဌမံ သီလဝန္တာနံ ဒတွာ ပစ္ဆာ အတ္တနာ ပရိဘုဉ္ဇတိ. ဝဒညူတိ ဘာသိတညူ. ကာလေန ဒိန္နန္တိ ယုတ္တပ္ပတ္တကာလေန ဒိန္နံ. အနုမောဒန္တီတိ ဧကမန္တေ ဌိတာ အနုမောဒန္တိ. ဝေယျာဝစ္စန္တိ ကာယေန ဝေယျာဝဋိကကမ္မံ ကရောန္တိ. အပ္ပဋိဝါနစိတ္တောတိ အနုက္ကဏ္ဌိတစိတ္တော. ယတ္ထ ဒိန္နံ မဟပ္ဖလန္တိ ယသ္မိံ ဌာနေ ဒိန္နံ မဟပ္ဖလံ ဟောတိ၊ တတ္ထ ဒဒေယျ.