၄. သီဟသေနာပတိသုတ္တဝဏ္ဏနာ

၃၄. စတုတ္ထေ သန္ဒိဋ္ဌိကန္တိ သာမံ ပဿိတဗ္ဗကံ. ဒါယကောတိ ဒါနသူရော. န သော သဒ္ဓါမတ္တကေနေဝ တိဋ္ဌတိ၊ ပရိစ္စဇိတုမ္ပိ သက္ကောတီတိ အတ္ထော. ဒါနပတီတိ ယံ ဒါနံ ဒေတိ၊ တဿ ပတိ ဟုတွာ ဒေတိ၊ န ဒါသော၊ န သဟာယော. ယော ဟိ အတ္တနာ မဓုရံ ဘုဉ္ဇတိ၊ ပရေသံ အမဓုရံ ဒေတိ၊ သော ဒါနသင်္ခါတဿ ဒေယျဓမ္မဿ ဒါသော ဟုတွာ ဒေတိ. ယော ယံ အတ္တနာ ဘုဉ္ဇတိ၊ တဒေဝ ဒေတိ၊ သော သဟာယော ဟုတွာ ဒေတိ. ယော ပန အတ္တနာ ယေန ကေနစိ ယာပေတိ၊ ပရေသံ မဓုရံ ဒေတိ၊ သော ပတိ ဇေဋ္ဌကော သာမီ ဟုတွာ ဒေတိ. တာဒိသံ သန္ဓာယ ဝုတ္တံ – ‘‘ဒါနပတီ’’တိ.

အမင်္ကုဘူတောတိ န နိတ္တေဇဘူတော. ဝိသာရဒေါတိ ဉာဏသောမနဿပ္ပတ္တော. သဟဗျတံ ဂတာတိ သဟဘာဝံ ဧကီဘာဝံ ဂတာ. ကတာဝကာသာတိ ယေန ကမ္မေန တတ္ထ အဝကာသော ဟောတိ၊ တဿ ကတတ္တာ ကတာဝကာသာ. တံ ပန ယသ္မာ ကုသလမေဝ ဟောတိ၊ တသ္မာ ကတကုသလာတိ ဝုတ္တံ. မောဒရေတိ မောဒန္တိ ပမောဒန္တိ. အသိတဿာတိ အနိဿိတဿ တထာဂတဿ. တာဒိနောတိ တာဒိလက္ခဏံ ပတ္တဿ.