၁. အနနုဿုတသုတ္တဝဏ္ဏနာ

၁၁. ဒုတိယဿ ပဌမေ ပုဗ္ဗာဟံ၊ ဘိက္ခဝေ၊ အနနုဿုတေသု ဓမ္မေသူတိ အဟံ၊ ဘိက္ခဝေ၊ ပုဗ္ဗေ အနနုဿုတေသု စတူသု သစ္စဓမ္မေသု. အဘိညာဝေါသာနပါရမိပ္ပတ္တော ပဋိဇာနာမီတိ စတူသု သစ္စေသု စတူဟိ မဂ္ဂေဟိ သောဠသဝိဓဿ ကိစ္စဿ ကရဏေန အဘိဇာနိတွာ ဝေါသာနပါရမိံ သဗ္ဗေသံ ကိစ္စာနံ နိဋ္ဌိတတ္တာ ကတကိစ္စဘာဝံ ပါရံ ပတ္တော ပဋိဇာနာမီတိ မဟာဗောဓိပလ္လင်္ကေ အတ္တနော အာဂမနီယဂုဏံ ဒဿေတိ. တထာဂတဿာတိ အဋ္ဌဟိ ကာရဏေဟိ တထာဂတဿ. တထာဂတဗလာနီတိ ယထာ တေဟိ ဂန္တဗ္ဗံ၊ တထေဝ ဂတာနိ ပဝတ္တာနိ ဉာဏဗလာနိ. အာသဘံ ဌာနန္တိ သေဋ္ဌဋ္ဌာနံ. သီဟနာဒန္တိ အဘီတနာဒံ. ဗြဟ္မစက္ကန္တိ သေဋ္ဌစက္ကံ. ပဝတ္တေတီတိ ကထေတိ.