၇. သုဝိဒူရသုတ္တဝဏ္ဏနာ

၄၇. သတ္တမေ သုဝိဒူရဝိဒူရာနီတိ ကေနစိ ပရိယာယေန အနာသန္နာနိ ဟုတွာ သုဝိဒူရာနေဝ ဝိဒူရာနိ. နဘဉ္စ၊ ဘိက္ခဝေ၊ ပထဝီ စာတိ အာကာသဉ္စ မဟာပထဝီ စ. တတ္ထ ကိဉ္စာပိ ပထဝိတော အာကာသံ နာမ န ဒူရေ၊ ဒွင်္ဂုလမတ္တေပိ ဟောတိ. အညမညံ အလဂ္ဂနဋ္ဌေန ပန ‘‘သုဝိဒူရဝိဒူရေ’’တိ ဝုတ္တံ. ဝေရောစနောတိ သူရိယော. သတဉ္စ၊ ဘိက္ခဝေ၊ ဓမ္မောတိ စတုသတိပဋ္ဌာနာဒိဘေဒေါ သတ္တတိံသဗောဓိပက္ခိယဓမ္မော. အသတဉ္စ ဓမ္မောတိ ဒွါသဋ္ဌိဒိဋ္ဌိဂတဘေဒေါ အဿဒ္ဓမ္မော.

ပဘင်္ကရောတိ အာလောကကရော. အဗျာယိကော ဟောတီတိ အဝိဂစ္ဆနသဘာဝေါ ဟောတိ. သတံ သမာဂမောတိ ပဏ္ဍိတာနံ မိတ္တသန္ထဝဝသေန သမာဂမော. ယာဝါပိ တိဋ္ဌေယျာတိ ယတ္တကံ အဒ္ဓါနံ တိဋ္ဌေယျ. တထေဝ ဟောတီတိ တာဒိသောဝ ဟောတိ၊ ပကတိံ န ဇဟတိ. ခိပ္ပံ ဟိ ဝေတီတိ သီဃံ ဝိဂစ္ဆတိ.