၁၀. ဥဒါယိသုတ္တဝဏ္ဏနာ

၄၀. ဒသမေ အဘိသင်္ခတန္တိ ရာသိကတံ. နိရာရမ္ဘန္တိ ပါဏသမာရမ္ဘရဟိတံ. ယညန္တိ ဒေယျဓမ္မံ. တဉှိ ယဇိတဗ္ဗတ္တာ ယညန္တိ ဝုစ္စတိ. ကာလေနာတိ ယုတ္တပ္ပတ္တကာလေန. ဥပသံယန္တီတိ ဥပဂစ္ဆန္တိ. ကုလံ ဂတိန္တိ ဝဋ္ဋကုလဉ္စေဝ ဝဋ္ဋဂတိဉ္စ အတိက္ကန္တာ. ယညဿ ကောဝိဒါတိ စတုဘူမကယညေ ကုသလာ. ယညေတိ ပကတိဒါနေ. သဒ္ဓေတိ မတကဒါနေ. ဟဗျံ ကတွာတိ ဟုနိတဗ္ဗံ ဒေယျဓမ္မံ ဥပကပ္ပေတွာ. သုခေတ္တေ ဗြဟ္မစာရိသူတိ ဗြဟ္မစာရိသင်္ခါတေ သုခေတ္တမှီတိ အတ္ထော. သုပ္ပတ္တန္တိ သုဋ္ဌု ပတ္တံ. ဒက္ခိဏေယျေသု ယံ ကတန္တိ ယံ ဒက္ခိဏာယ အနုစ္ဆဝိကေသု ဥပကပ္ပိတံ၊ တံ သုဟုတံ သုယိဋ္ဌံ သုပ္ပတ္တန္တိ အတ္ထော. သဒ္ဓေါတိ ဗုဒ္ဓဓမ္မသံဃဂုဏာနံ သဒ္ဒဟနတာယ သဒ္ဓေါ. မုတ္တေန စေတသာတိ ဝိဿဋ္ဌေန စိတ္တေန. ဣမိနာဿ မုတ္တစာဂံ ဒီပေတီတိ.

စက္ကဝဂ္ဂေါ စတုတ္ထော.