၄. ဒုတိယခတသုတ္တဝဏ္ဏနာ

၄. စတုတ္ထေ မာတရိ ပိတရိ စာတိအာဒီသု မိတ္တဝိန္ဒကော မာတရိ မိစ္ဆာပဋိပန္နော နာမ၊ အဇာတသတ္တု ပိတရိ မိစ္ဆာပဋိပန္နော နာမ၊ ဒေဝဒတ္တော တထာဂတေ မိစ္ဆာပဋိပန္နော နာမ၊ ကောကာလိကော တထာဂတသာဝကေ မိစ္ဆာပဋိပန္နော နာမ. ဗဟုဉ္စာတိ ဗဟုကမေဝ. ပသဝတီတိ ပဋိလဘတိ. တာယာတိ တာယ မိစ္ဆာပဋိပတ္တိသင်္ခါတာယ အဓမ္မစရိယာယ. ပေစ္စာတိ ဣတော ဂန္တွာ. အပါယံ ဂစ္ဆတီတိ နိရယာဒီသု အညတရသ္မိံ နိဗ္ဗတ္တတိ. သုက္ကပက္ခေပိ ဧသေဝ နယော.