၆. ပဌမဘဝသုတ္တဝဏ္ဏနာ

၇၇. ဆဋ္ဌေ ကာမဓာတုဝေပက္ကန္တိ ကာမဓာတုယာ ဝိပစ္စနကံ. ကာမဘဝေါတိ ကာမဓာတုယံ ဥပပတ္တိဘဝေါ. ကမ္မံ ခေတ္တန္တိ ကုသလာကုသလကမ္မံ ဝိရုဟနဋ္ဌာနဋ္ဌေန ခေတ္တံ. ဝိညာဏံ ဗီဇန္တိ သဟဇာတံ အဘိသင်္ခါရဝိညာဏံ ဝိရုဟနဋ္ဌေန ဗီဇံ. တဏှာ သ္နေဟောတိ ပဂ္ဂဏှနာနုဗြူဟနဝသေန တဏှာ ဥဒကံ နာမ. အဝိဇ္ဇာနီဝရဏာနန္တိ အဝိဇ္ဇာယ အာဝရိတာနံ. တဏှာသံယောဇနာနန္တိ တဏှာဗန္ဓနေန ဗဒ္ဓါနံ. ဟီနာယ ဓာတုယာတိ ကာမဓာတုယာ. ဝိညာဏံ ပတိဋ္ဌိတန္တိ အဘိသင်္ခါရဝိညာဏံ ပတိဋ္ဌိတံ. မဇ္ဈိမာယ ဓာတုယာတိ ရူပဓာတုယာ. ပဏီတာယ ဓာတုယာတိ အရူပဓာတုယာ. သေသမေတ္ထ ဥတ္တာနတ္ထမေဝါတိ.