၉. ဇာဏုဿောဏိသုတ္တဝဏ္ဏနာ

၆၀. နဝမေ ယဿဿူတိ ယဿ ဘဝေယျုံ. ယညောတိအာဒီသု ယဇိတဗ္ဗောတိ ယညော၊ ဒေယျဓမ္မဿေတံ နာမံ. သဒ္ဓန္တိ မတကဘတ္တံ. ထာလိပါကောတိ ဝရပုရိသာနံ ဒါတဗ္ဗယုတ္တံ ဘတ္တံ. ဒေယျဓမ္မန္တိ ဝုတ္တာဝသေသံ ယံကိဉ္စိ ဒေယျဓမ္မံ နာမ. တေဝိဇ္ဇေသု ဗြာဟ္မဏေသု ဒါနံ ဒဒေယျာတိ သဗ္ဗမေတံ ဒါနံ တေဝိဇ္ဇေသု ဒဒေယျ၊ တေဝိဇ္ဇာ ဗြာဟ္မဏာဝ ပဋိဂ္ဂဟေတုံ ယုတ္တာတိ ဒဿေတိ. သေသမေတ္ထ ဟေဋ္ဌာ ဝုတ္တနယမေဝါတိ.