၆. သီလဝန္တသုတ္တဝဏ္ဏနာ

၄၆. ဆဋ္ဌေ တီဟိ ဌာနေဟီတိ တီဟိ ကာရဏေဟိ. ကာယေနာတိအာဒီသု ဘိက္ခူ အာဂစ္ဆန္တေ ဒိသွာ ပစ္စုဂ္ဂမနံ ကရောန္တာ ဂစ္ဆန္တေ အနုဂစ္ဆန္တာ အာသနသာလာယ သမ္မဇ္ဇနဥပလေပနာဒီနိ ကရောန္တာ အာသနာနိ ပညာပေန္တာ ပါနီယံ ပစ္စုပဋ္ဌာပေန္တာ ကာယေန ပုညံ ပသဝန္တိ နာမ. ဘိက္ခုသံဃံ ပိဏ္ဍာယ စရန္တံ ဒိသွာ ‘‘ယာဂုံ ဒေထ၊ ဘတ္တံ ဒေထ၊ သပ္ပိနဝနီတာဒီနိ ဒေထ၊ ဂန္ဓပုပ္ဖါဒီဟိ ပူဇေထ၊ ဥပေါသထံ ဥပဝသထ၊ ဓမ္မံ သုဏာထ၊ စေတိယံ ဝန္ဒထာ’’တိအာဒီနိ ဝဒန္တာ ဝါစာယ ပုညံ ပသဝန္တိ နာမ. ဘိက္ခူ ပိဏ္ဍာယ စရန္တေ ဒိသွာ ‘‘လဘန္တူ’’တိ စိန္တေန္တာ မနသာ ပုညံ ပသဝန္တိ နာမ. ပသဝန္တီတိ ပဋိလဘန္တိ. ပုညံ ပနေတ္ထ လောကိယလောကုတ္တရမိဿကံ ကထိတံ.