၁၀. အာတပ္ပကရဏီယသုတ္တဝဏ္ဏနာ

၅၀. ဒသမေ အာတပ္ပံ ကရဏီယန္တိ ဝီရိယံ ကာတုံ ယုတ္တံ. အနုပ္ပါဒါယာတိ အနုပ္ပါဒတ္ထာယ၊ အနုပ္ပါဒံ သာဓေဿာမီတိ ဣမိနာ ကာရဏေန ကတ္တဗ္ဗန္တိ အတ္ထော. ပရတောပိ ဧသေဝ နယော. သာရီရိကာနန္တိ သရီရသမ္ဘဝါနံ. ဒုက္ခာနန္တိ ဒုက္ခမာနံ. တိဗ္ဗာနန္တိ ဗဟလာနံ၊ တာပနဝသေန ဝါ တိဗ္ဗာနံ. ခရာနန္တိ ဖရုသာနံ. ကဋုကာနန္တိ တိခိဏာနံ. အသာတာနန္တိ အမဓုရာနံ. အမနာပါနန္တိ မနံ ဝဍ္ဎေတုံ အသမတ္ထာနံ. ပါဏဟရာနန္တိ ဇီဝိတဟရာနံ. အဓိဝါသနာယာတိ အဓိဝါသနတ္ထာယ သဟနတ္ထာယ ခမနတ္ထာယ.

ဧတ္တကေ ဌာနေ သတ္ထာ အာဏာပေတွာ အာဏတ္တိံ ပဝတ္တေတွာ ဣဒါနိ သမာဒပေန္တော ယတော ခေါ၊ ဘိက္ခဝေတိအာဒိမာဟ. တတ္ထ ယတောတိ ယဒါ. အာတာပီတိ ဝီရိယဝါ. နိပကောတိ သပ္ပညော. သတောတိ သတိယာ သမန္နာဂတော. ဒုက္ခဿ အန္တကိရိယာယာတိ ဝဋ္ဋဒုက္ခဿ ပရိစ္ဆေဒပရိဝဋုမကိရိယာယ. ဣမေ စ ပန အာတာပါဒယော တယောပိ လောကိယလောကုတ္တရမိဿကာ ကထိတာ.