၂. ဒုတိယပဏ္ဏာသကံ

(၆) ၁. ပုဂ္ဂလဝဂ္ဂဝဏ္ဏနာ

၅၃. ဒုတိယပဏ္ဏာသကဿ ပဌမေ စက္ကဝတ္တိနာ သဒ္ဓိံ ဂဟိတတ္တာ ‘‘လောကာနုကမ္ပာယာ’’တိ န ဝုတ္တံ. ဧတ္ထ စ စက္ကဝတ္တိနော ဥပ္ပတ္တိယာ ဒွေ သမ္ပတ္တိယော လဘန္တိ၊ ဗုဒ္ဓါနံ ဥပ္ပတ္တိယာ တိဿောပိ.

၅၄. ဒုတိယေ အစ္ဆရိယမနုဿာတိ အာစိဏ္ဏမနုဿာ အဗ္ဘုတမနုဿာ.

၅၅. တတိယေ ဗဟုနော ဇနဿ အနုတပ္ပါ ဟောတီတိ မဟာဇနဿ အနုတာပကာရီ ဟောတိ. တတ္ထ စက္ကဝတ္တိနော ကာလကိရိယာ ဧကစက္ကဝါဠေ ဒေဝမနုဿာနံ အနုတာပံ ကရောတိ၊ တထာဂတဿ ကာလကိရိယာ ဒသသု စက္ကဝါဠသဟဿေသု.

၅၆. စတုတ္ထေ ထူပါရဟာတိ ထူပဿ ယုတ္တာ အနုစ္ဆဝိကာ. စက္ကဝတ္တိနော ဟိ စေတိယံ ပဋိဇဂ္ဂိတွာ ဒွေ သမ္ပတ္တိယော လဘန္တိ၊ ဗုဒ္ဓါနံ စေတိယံ ပဋိဇဂ္ဂိတွာ တိဿောပိ.

၅၇. ပဉ္စမေ ဗုဒ္ဓါတိ အတ္တနော အာနုဘာဝေန စတ္တာရိ သစ္စာနိ ဗုဒ္ဓါ.

၅၈. ဆဋ္ဌေ ဖလန္တိယာတိ သဒ္ဒံ ကရောန္တိယာ. န သန္တသန္တီတိ န ဘာယန္တိ. တတ္ထ ခီဏာသဝေါ အတ္တနော သက္ကာယဒိဋ္ဌိယာ ပဟီနတ္တာ န ဘာယတိ၊ ဟတ္ထာဇာနီယော သက္ကာယဒိဋ္ဌိယာ ဗလဝတ္တာတိ. သတ္တမဋ္ဌမေသုပိ ဧသေဝ နယော.

၆၁. နဝမေ ကိံပုရိသာတိ ကိန္နရာ. မာနုသိံ ဝါစံ န ဘာသန္တီတိ မနုဿကထံ န ကထေန္တိ. ဓမ္မာသောကဿ ကိရ ဧကံ ကိန္နရံ အာနေတွာ ဒဿေသုံ. သော ‘‘ကထာပေထ န’’န္တိ အာဟ. ကိန္နရော ကထေတုံ န ဣစ္ဆတိ. ဧကော ပုရိသော ‘‘အဟမေတံ ကထာပေဿာမီ’’တိ ဟေဋ္ဌာပါသာဒံ ဩတာရေတွာ ဒွေ ခါဏုကေ ကောဋ္ဋေတွာ ဥက္ခလိံ အာရောပေသိ. သာ ဥဘတောပဿေဟိ ပတတိ. တံ ဒိသွာ ကိန္နရော ‘‘ကိံ အညံ ဧကံ ခါဏုကံ ကောဋ္ဋေတုံ န ဝဋ္ဋတီ’’တိ ဧတ္တကမေဝ အာဟ. ပုန အပရဘာဂေ ဒွေ ကိန္နရေ အာနေတွာ ဒဿေသုံ. ရာဇာ ‘‘ကထာပေထ နေ’’တိ အာဟ. တေ ကထေတုံ န ဣစ္ဆိံသု. ဧကော ပုရိသော ‘‘အဟမေတေ ကထာပေဿာမီ’’တိ တေ ဂဟေတွာ အန္တရာပဏံ အဂမာသိ. တတ္ထေကော အမ္ဗပက္ကဉ္စ မစ္ဆေ စ အဒ္ဒသ၊ ဧကော ကဗိဋ္ဌဖလဉ္စ အမ္ဗိလိကာဖလဉ္စ. တတ္ထ ပုရိမော ‘‘မဟာဝိသံ မနုဿာ ခါဒန္တိ၊ ကထံ တေ ကိလာသိနော န ဟောန္တီ’’တိ အာဟ. ဣတရော ‘‘ကထံ ဣမေ ဧတံ နိဿာယ ကုဋ္ဌိနော န ဟောန္တီ’’တိ အာဟ. ဧဝံ မာနုသိံ ဝါစံ ကထေတုံ သက္ကောန္တာပိ ဒွေ အတ္ထေ သမ္ပဿမာနာ န ကထေန္တီတိ.

၆၂. ဒသမေ အပ္ပဋိဝါနောတိ အနုကဏ္ဌိတော အပစ္စောသက္ကိတော.

၆၃. ဧကာဒသမေ အသန္တသန္နိဝါသန္တိ အသပ္ပုရိသာနံ သန္နိဝါသံ. န ဝဒေယျာတိ ဩဝါဒေန ဝါ အနုသာသနိယာ ဝါ န ဝဒေယျ၊ မာ ဝဒတူတိ အတ္ထော. ထေရမ္ပာဟံ န ဝဒေယျန္တိ အဟမ္ပိ ထေရံ ဘိက္ခုံ ဩဝါဒါနုသာသနိဝသေန န ဝဒေယျံ. အဟိတာနုကမ္ပီတိ အဟိတံ ဣစ္ဆမာနော. နော ဟိတာနုကမ္ပီတိ ဟိတံ အနိစ္ဆမာနော. နောတိ နံ ဝဒေယျန္တိ ‘‘အဟံ တဝ ဝစနံ န ကရိဿ’’န္တိ နံ ဝဒေယျံ. ဝိဟေဌေယျန္တိ ဝစနဿ အကရဏေန ဝိဟေဌေယျံ. ပဿမ္ပိဿ နပ္ပဋိကရေယျန္တိ ပဿန္တောပိ ဇာနန္တောပိ အဟံ တဿ ဝစနံ န ကရေယျံ. ဣမိနာ ဥပါယေန သဗ္ဗတ္ထ အတ္ထော ဝေဒိတဗ္ဗော. သုက္ကပက္ခေ ပန သာဓူတိ နံ ဝဒေယျန္တိ ‘‘သာဓု ဘဒ္ဒကံ သုကထိတံ တယာ’’တိ တဿ ကထံ အဘိနန္ဒန္တော နံ ဝဒေယျန္တိ အတ္ထော.

၆၄. ဒွါဒသမေ ဥဘတော ဝစီသံသာရောတိ ဒွီသုပိ ပက္ခေသု အညမညံ အက္ကောသနပစ္စက္ကောသနဝသေန သံသရမာနာ ဝါစာ ဝစီသံသာရော. ဒိဋ္ဌိပဠာသောတိ ဒိဋ္ဌိံ နိဿာယ ဥပ္ပဇ္ဇနကော ယုဂဂ္ဂါဟလက္ခဏော ပဠာသော ဒိဋ္ဌိပဠာသော နာမ. စေတသော အာဃာတောတိ ကောပေါ. သော ဟိ စိတ္တံ အာဃာတေန္တော ဥပ္ပဇ္ဇတိ. အပ္ပစ္စယောတိ အတုဋ္ဌာကာရော၊ ဒေါမနဿန္တိ အတ္ထော. အနဘိရဒ္ဓီတိ ကောပေါယေဝ. သော ဟိ အနဘိရာဓနဝသေန အနဘိရဒ္ဓီတိ ဝုစ္စတိ. အဇ္ဈတ္တံ အဝူပသန္တံ ဟောတီတိ သဗ္ဗမ္ပေတံ နိယကဇ္ဈတ္တသင်္ခါတေ အတ္တနော စိတ္တေ စ သဒ္ဓိဝိဟာရိကအန္တေဝါသိကသင်္ခါတာယ အတ္တနော ပရိသာယ စ အဝူပသန္တံ ဟောတိ. တသ္မေတန္တိ တသ္မိံ ဧတံ. သေသံ ဝုတ္တနယေနေဝ ဝေဒိတဗ္ဗန္တိ.

ပုဂ္ဂလဝဂ္ဂေါ ပဌမော.

(၇) ၂. သုခဝဂ္ဂဝဏ္ဏနာ

၆၅. ဒုတိယဿ ပဌမေ ဂိဟိသုခန္တိ ဂိဟီနံ သဗ္ဗကာမနိပ္ဖတ္တိမူလကံ သုခံ. ပဗ္ဗဇိတသုခန္တိ ပဗ္ဗဇိတာနံ ပဗ္ဗဇ္ဇာမူလကံ သုခံ.

၆၆. ဒုတိယေ ကာမသုခန္တိ ကာမေ အာရဗ္ဘ ဥပ္ပဇ္ဇနကသုခံ. နေက္ခမ္မသုခန္တိ နေက္ခမ္မံ ဝုစ္စတိ ပဗ္ဗဇ္ဇာ၊ တံ အာရဗ္ဘ ဥပ္ပဇ္ဇနကသုခံ.

၆၇. တတိယေ ဥပဓိသုခန္တိ တေဘူမကသုခံ. နိရုပဓိသုခန္တိ လောကုတ္တရသုခံ.

၆၈. စတုတ္ထေ သာသဝသုခန္တိ အာသဝါနံ ပစ္စယဘူတံ ဝဋ္ဋသုခံ. အနာသဝသုခန္တိ တေသံ အပစ္စယဘူတံ ဝိဝဋ္ဋသုခံ.

၆၉. ပဉ္စမေ သာမိသန္တိ သံကိလေသံ ဝဋ္ဋဂါမိသုခံ. နိရာမိသန္တိ နိက္ကိလေသံ ဝိဝဋ္ဋဂါမိသုခံ.

၇၀. ဆဋ္ဌေ အရိယသုခန္တိ အပုထုဇ္ဇနသုခံ. အနရိယသုခန္တိ ပုထုဇ္ဇနသုခံ.

၇၁. သတ္တမေ ကာယိကန္တိ ကာယဝိညာဏသဟဇာတံ. စေတသိကန္တိ မနောဒွါရိကသုခံ. တံ လောကိယလောကုတ္တရမိဿကံ ကထိတံ.

၇၂. အဋ္ဌမေ သပ္ပီတိကန္တိ ပဌမဒုတိယဇ္ဈာနသုခံ. နိပ္ပီတိကန္တိ တတိယစတုတ္ထဇ္ဈာနသုခံ. တတ္ထ လောကိယသပ္ပီတိကတော လောကိယနိပ္ပီတိကံ၊ လောကုတ္တရသပ္ပီတိကတော စ လောကုတ္တရနိပ္ပီတိကံ အဂ္ဂန္တိ ဧဝံ ဘုမ္မန္တရံ အဘိန္ဒိတွာ အဂ္ဂဘာဝေါ ဝေဒိတဗ္ဗော.

၇၃. နဝမေ သာတသုခန္တိ တီသု ဈာနေသု သုခံ. ဥပေက္ခာသုခန္တိ စတုတ္ထဇ္ဈာနသုခံ.

၇၄. ဒသမေ သမာဓိသုခန္တိ အပ္ပနံ ဝါ ဥပစာရံ ဝါ ပတ္တသုခံ. အသမာဓိသုခန္တိ တဒုဘယံ အပ္ပတ္တသုခံ.

၇၅. ဧကာဒသမေ သပ္ပီတိကာရမ္မဏန္တိ သပ္ပီတိကံ ဈာနဒွယံ ပစ္စဝေက္ခန္တဿ ဥပ္ပန္နသုခံ. နိပ္ပီတိကာရမ္မဏေပိ ဧသေဝ နယော. ဒွါဒသမေပိ ဣမိနာဝ ဥပါယေန အတ္ထော ဝေဒိတဗ္ဗော.

၇၇. တေရသမေ ရူပါရမ္မဏန္တိ ရူပါဝစရစတုတ္ထဇ္ဈာနာရမ္မဏံ၊ ယံကိဉ္စိ ရူပံ အာရဗ္ဘ ဥပ္ပဇ္ဇနကံ ဝါ. အရူပါရမ္မဏန္တိ အရူပါဝစရဇ္ဈာနာရမ္မဏံ၊ ယံကိဉ္စိ အရူပံ အာရဗ္ဘ ဥပ္ပဇ္ဇနကံ ဝါတိ.

သုခဝဂ္ဂေါ ဒုတိယော.

(၈) ၃. သနိမိတ္တဝဂ္ဂဝဏ္ဏနာ

၇၈-၇၉. တတိယဿ ပဌမေ သနိမိတ္တာတိ သကာရဏာ. ဒုတိယာဒီသုပိ ဧသေဝ နယော. နိဒါနံ ဟေတု သင်္ခါရော ပစ္စယော ရူပန္တိ သဗ္ဗာနိပိ ဟိ ဧတာနိ ကာရဏဝေဝစနာနေဝ.

၈၄. သတ္တမေ သဝေဒနာတိ ပစ္စယဘူတာယ သမ္ပယုတ္တဝေဒနာယ သတိယေဝ ဥပ္ပဇ္ဇန္တိ၊ နာသတီတိ အတ္ထော. အဋ္ဌမနဝမေသုပိ ဧသေဝ နယော.

၈၇. ဒသမေ သင်္ခတာရမ္မဏာတိ ပစ္စယနိဗ္ဗတ္တံ သင်္ခတဓမ္မံ အာရမ္မဏံ ကတွာဝ ဥပ္ပဇ္ဇန္တိ. နော အသင်္ခတာရမ္မဏာတိ အသင်္ခတံ ပန နိဗ္ဗာနံ အာရဗ္ဘ န ဥပ္ပဇ္ဇန္တိ. န ဟောန္တီတိ မဂ္ဂက္ခဏေ န ဟောန္တိ နာမ၊ ဖလေ ပတ္တေ နာဟေသုန္တိ. ဧဝမေတေသု ဒသသုပိ ဌာနေသု ယာဝ အရဟတ္တာ ဒေသနာ ဒေသိတာတိ.

သနိမိတ္တဝဂ္ဂေါ တတိယော.

(၉) ၄. ဓမ္မဝဂ္ဂဝဏ္ဏနာ

၈၈. စတုတ္ထဿ ပဌမေ စေတောဝိမုတ္တီတိ ဖလသမာဓိ. ပညာဝိမုတ္တီတိ ဖလပညာ.

၈၉. ဒုတိယေ ပဂ္ဂါဟောတိ ဝီရိယံ. အဝိက္ခေပေါတိ စိတ္တေကဂ္ဂတာ.

၉၀. တတိယေ နာမန္တိ စတ္တာရော အရူပက္ခန္ဓာ. ရူပန္တိ ရူပက္ခန္ဓော. ဣတိ ဣမသ္မိံ သုတ္တေ ဓမ္မကောဋ္ဌာသပရိစ္ဆေဒဉာဏံ နာမ ကထိတံ.

၉၁. စတုတ္ထေ ဝိဇ္ဇာတိ ဖလဉာဏံ. ဝိမုတ္တီတိ တံသမ္ပယုတ္တာ သေသဓမ္မာ.

၉၂. ပဉ္စမေ ဘဝဒိဋ္ဌီတိ သဿတဒိဋ္ဌိ. ဝိဘဝဒိဋ္ဌီတိ ဥစ္ဆေဒဒိဋ္ဌိ. ဆဋ္ဌသတ္တမာနိ ဥတ္တာနတ္ထာနေဝ.

၉၅. အဋ္ဌမေ ဒေါဝစဿတာတိ ဒုဗ္ဗစဘာဝေါ. ပါပမိတ္တတာတိ ပါပမိတ္တသေဝနဘာဝေါ. နဝမံ ဝုတ္တဝိပရိယာယေန ဝေဒိတဗ္ဗံ.

၉၇. ဒသမေ ဓာတုကုသလတာတိ အဋ္ဌာရသ ဓာတုယော ဓာတူတိ ဇာနနံ. မနသိကာရကုသလတာတိ တာသံယေဝ ဓာတူနံ အနိစ္စာဒိဝသေန လက္ခဏတ္တယံ အာရောပေတွာ ဇာနနံ.

၉၈. ဧကာဒသမေ အာပတ္တိကုသလတာတိ ပဉ္စန္နဉ္စ သတ္တန္နဉ္စ အာပတ္တိက္ခန္ဓာနံ ဇာနနံ. အာပတ္တိဝုဋ္ဌာနကုသလတာတိ ဒေသနာယ ဝါ ကမ္မဝါစာယ ဝါ အာပတ္တီဟိ ဝုဋ္ဌာနဇာနနန္တိ.

ဓမ္မဝဂ္ဂေါ စတုတ္ထော.

(၁၀) ၅. ဗာလဝဂ္ဂဝဏ္ဏနာ

၉၉. ပဉ္စမဿ ပဌမေ အနာဂတံ ဘာရံ ဝဟတီတိ ‘‘သမ္မဇ္ဇနီ ပဒီပေါ စ၊ ဥဒကံ အာသနေန စ၊ ဆန္ဒပါရိသုဒ္ဓိဥတုက္ခာနံ၊ ဘိက္ခုဂဏနာ စ ဩဝါဒေါ၊ ပါတိမောက္ခံ ထေရဘာရောတိ ဝုစ္စတီ’’တိ ဣမံ ဒသဝိဓံ ထေရဘာရံ နဝကော ဟုတွာ ထေရေန အနဇ္ဈိဋ္ဌော ကရောန္တော အနာဂတံ ဘာရံ ဝဟတိ နာမ. အာဂတံ ဘာရံ န ဝဟတီတိ ထေရော သမာနော တမေဝ ဒသဝိဓံ ဘာရံ အတ္တနာ ဝါ အကရောန္တော ပရံ ဝါ အသမာဒပေန္တော အာဂတံ ဘာရံ န ဝဟတိ နာမ. ဒုတိယသုတ္တေပိ ဣမိနာဝ နယေန အတ္ထော ဝေဒိတဗ္ဗော.

၁၀၁. တတိယေ အကပ္ပိယေ ကပ္ပိယသညီတိ အကပ္ပိယေ သီဟမံသာဒိမှိ ‘‘ကပ္ပိယံ ဣဒ’’န္တိ ဧဝံသညီ. ကပ္ပိယေ အကပ္ပိယသညီတိ ကုမ္ဘီလမံသဗိဠာရမံသာဒိမှိ ကပ္ပိယေ ‘‘အကပ္ပိယံ ဣဒ’’န္တိ ဧဝံသညီ. စတုတ္ထံ ဝုတ္တနယေနေဝ ဝေဒိတဗ္ဗံ.

၁၀၃. ပဉ္စမေ အနာပတ္တိယာ အာပတ္တိသညီတိ အာပုစ္ဆိတွာ ဘဏ္ဍကံ ဓောဝန္တဿ၊ ပတ္တံ ပစန္တဿ၊ ကေသေ ဆိန္ဒန္တဿ၊ ဂါမံ ပဝိသန္တဿာတိအာဒီသု အနာပတ္တိ၊ တတ္ထ ‘‘အာပတ္တိ အယ’’န္တိ ဧဝံသညီ. အာပတ္တိယာ အနာပတ္တိသညီတိ တေသညေဝ ဝတ္ထူနံ အနာပုစ္ဆာကရဏေ အာပတ္တိ၊ တတ္ထ ‘‘အနာပတ္တီ’’တိ ဧဝံသညီ. ဆဋ္ဌေပိ ဝုတ္တနယေနေဝ အတ္ထော ဝေဒိတဗ္ဗော. သတ္တမာဒီနိ ဥတ္တာနတ္ထာနေဝ.

၁၀၉. ဧကာဒသမေ အာသဝါတိ ကိလေသာ. န ကုက္ကုစ္စာယိတဗ္ဗန္တိ သံဃဘောဂဿ အပဋ္ဌပနံ အဝိစာရဏံ န ကုက္ကုစ္စာယိတဗ္ဗံ နာမ၊ တံ ကုက္ကုစ္စာယတိ. ကုက္ကုစ္စာယိတဗ္ဗန္တိ တဿေဝ ပဋ္ဌပနံ ဝိစာရဏံ၊ တံ န ကုက္ကုစ္စာယတိ. ဒွါဒသမာဒီနိ ဟေဋ္ဌာ ဝုတ္တနယေနေဝ ဝေဒိတဗ္ဗာနီတိ.

ဗာလဝဂ္ဂေါ ပဉ္စမော.

ဒုတိယပဏ္ဏာသကံ နိဋ္ဌိတံ.