၄. ပစ္စုပ္ပန္နာတီတဝါရော
(က) အနုလောမံ
၄၅၉. (က) ယော စက္ခုန္ဒြိယံ ပရိဇာနာတိ သော ဒေါမနဿိန္ဒြိယံ ပဇဟိတ္ထာတိ? အာမန္တာ.
(ခ) ယော ဝါ ပန ဒေါမနဿိန္ဒြိယံ ပဇဟိတ္ထ သော စက္ခုန္ဒြိယံ ပရိဇာနာတီတိ?
ဒွေ ပုဂ္ဂလာ ဒေါမနဿိန္ဒြိယံ ပဇဟိတ္ထ၊ နော စ စက္ခုန္ဒြိယံ ပရိဇာနန္တိ. အဂ္ဂမဂ္ဂသမင်္ဂီ ဒေါမနဿိန္ဒြိယဉ္စ ပဇဟိတ္ထ စက္ခုန္ဒြိယဉ္စ ပရိဇာနန္တိ.
(က) ယော စက္ခုန္ဒြိယံ ပရိဇာနာတိ သော အနညာတညဿာမီတိန္ဒြိယံ ဘာဝိတ္ထာတိ? အာမန္တာ.
(ခ) ယော ဝါ ပန အနညာတညဿာမီတိန္ဒြိယံ ဘာဝိတ္ထ သော စက္ခုန္ဒြိယံ ပရိဇာနာတီတိ?
ဆ ပုဂ္ဂလာ အနညာတညဿာမီတိန္ဒြိယံ ဘာဝိတ္ထ၊ နော စ စက္ခုန္ဒြိယံ ပရိဇာနန္တိ. အဂ္ဂမဂ္ဂသမင်္ဂီ အနညာတညဿာမီတိန္ဒြိယဉ္စ ဘာဝိတ္ထ စက္ခုန္ဒြိယဉ္စ ပရိဇာနာတိ.
(က) ယော စက္ခုန္ဒြိယံ ပရိဇာနာတိ သော အညိန္ဒြိယံ ဘာဝိတ္ထာတိ? နော.
(ခ) ယော ဝါ ပန အညိန္ဒြိယံ ဘာဝိတ္ထ သော စက္ခုန္ဒြိယံ ပရိဇာနာတီတိ? နော.
(က) ယော စက္ခုန္ဒြိယံ ပရိဇာနာတိ သော အညာတာဝိန္ဒြိယံ သစ္ဆိကရိတ္ထာတိ? နော.
(ခ) ယော ဝါ ပန အညာတာဝိန္ဒြိယံ သစ္ဆိကရိတ္ထ သော စက္ခုန္ဒြိယံ ပရိဇာနာတီတိ? နော. (စက္ခုန္ဒြိယမူလကံ)
၄၆၀. (က) ယော ဒေါမနဿိန္ဒြိယံ ပဇဟတိ သော အနညာတညဿာမီတိန္ဒြိယံ ဘာဝိတ္ထာတိ? အာမန္တာ.
(ခ) ယော ဝါ ပန အနညာတညဿာမီတိန္ဒြိယံ ဘာဝိတ္ထ သော ဒေါမနဿိန္ဒြိယံ ပဇဟတီတိ?
ဆ ပုဂ္ဂလာ အနညာတညဿာမီတိန္ဒြိယံ ဘာဝိတ္ထ၊ နော စ ဒေါမနဿိန္ဒြိယံ ပဇဟန္တိ. အနာဂါမိမဂ္ဂသမင်္ဂီ အနညာတညဿာမီတိန္ဒြိယဉ္စ ဘာဝိတ္ထ ဒေါမနဿိန္ဒြိယဉ္စ ပဇဟတိ.
(က) ယော ဒေါမနဿိန္ဒြိယံ ပဇဟတိ သော အညိန္ဒြိယံ ဘာဝိတ္ထာတိ? နော.
(ခ) ယော ဝါ ပန အညိန္ဒြိယံ ဘာဝိတ္ထ သော ဒေါမနဿိန္ဒြိယံ ပဇဟတီတိ? နော.
(က) ယော ဒေါမနဿိန္ဒြိယံ ပဇဟတိ သော အညာတာဝိန္ဒြိယံ သစ္ဆိကရိတ္ထာတိ? နော.
(ခ) ယော ဝါ ပန အညာတာဝိန္ဒြိယံ သစ္ဆိကရိတ္ထ သော ဒေါမနဿိန္ဒြိယံ ပဇဟတီတိ? နော. (ဒေါမနဿိန္ဒြိယမူလကံ)
၄၆၁. (က) ယော အနညာတညဿာမီတိန္ဒြိယံ ဘာဝေတိ သော အညိန္ဒြိယံ ဘာဝိတ္ထာတိ? နော.
(ခ) ယော ဝါ ပန အညိန္ဒြိယံ ဘာဝိတ္ထ သော အနညာတညဿာမီတိန္ဒြိယံ ဘာဝေတီတိ? နော.
(က) ယော အနညာတညဿာမီတိန္ဒြိယံ ဘာဝေတိ သော အညာတာဝိန္ဒြိယံ သစ္ဆိကရိတ္ထာတိ? နော.
(ခ) ယော ဝါ ပန အညာတာဝိန္ဒြိယံ သစ္ဆိကရိတ္ထ သော အနညာတညဿာမီတိန္ဒြိယံ ဘာဝေတီတိ? နော. (အနညာတညဿာမီတိန္ဒြိယမူလကံ)
၄၆၂. (က) ယော အညိန္ဒြိယံ ဘာဝေတိ သော အညာတာဝိန္ဒြိယံ သစ္ဆိကရိတ္ထာတိ? နော.
(ခ) ယော ဝါ ပန အညာတာဝိန္ဒြိယံ သစ္ဆိကရိတ္ထ သော အညိန္ဒြိယံ ဘာဝေတီတိ? နော. (အညိန္ဒြိယမူလကံ)
(ခ) ပစ္စနီကံ
၄၆၃. (က) ယော စက္ခုန္ဒြိယံ န ပရိဇာနာတိ သော ဒေါမနဿိန္ဒြိယံ နပ္ပဇဟိတ္ထာတိ?
ဒွေ ပုဂ္ဂလာ စက္ခုန္ဒြိယံ န ပရိဇာနန္တိ၊ နော စ ဒေါမနဿိန္ဒြိယံ နပ္ပဇဟိတ္ထ. ဆ ပုဂ္ဂလာ စက္ခုန္ဒြိယဉ္စ န ပရိဇာနန္တိ ဒေါမနဿိန္ဒြိယဉ္စ နပ္ပဇဟိတ္ထ.
(ခ) ယော ဝါ ပန ဒေါမနဿိန္ဒြိယံ နပ္ပဇဟိတ္ထ သော စက္ခုန္ဒြိယံ န ပရိဇာနာတီတိ? အာမန္တာ.
(က) ယော စက္ခုန္ဒြိယံ န ပရိဇာနာတိ သော အနညာတညဿာမီတိန္ဒြိယံ န ဘာဝိတ္ထာတိ?
ဆ ပုဂ္ဂလာ စက္ခုန္ဒြိယံ န ပရိဇာနန္တိ၊ နော စ အနညာတညဿာမီတိန္ဒြိယံ န ဘာဝိတ္ထ. ဒွေ ပုဂ္ဂလာ စက္ခုန္ဒြိယဉ္စ န ပရိဇာနန္တိ အနညာတညဿာမီတိန္ဒြိယဉ္စ န ဘာဝိတ္ထ.
(ခ) ယော ဝါ ပန အနညာတညဿာမီတိန္ဒြိယံ န ဘာဝိတ္ထ သော စက္ခုန္ဒြိယံ န ပရိဇာနာတီတိ? အာမန္တာ.
(က) ယော စက္ခုန္ဒြိယံ န ပရိဇာနာတိ သော အညိန္ဒြိယံ န ဘာဝိတ္ထာတိ?
အရဟာ စက္ခုန္ဒြိယံ န ပရိဇာနာတိ၊ နော စ အညိန္ဒြိယံ န ဘာဝိတ္ထ. သတ္တ ပုဂ္ဂလာ စက္ခုန္ဒြိယဉ္စ န ပရိဇာနန္တိ အညိန္ဒြိယဉ္စ န ဘာဝိတ္ထ.
(ခ) ယော ဝါ ပန အညိန္ဒြိယံ န ဘာဝိတ္ထ သော စက္ခုန္ဒြိယံ န ပရိဇာနာတီတိ?
အဂ္ဂမဂ္ဂသမင်္ဂီ အညိန္ဒြိယံ န ဘာဝိတ္ထ၊ နော စ စက္ခုန္ဒြိယံ န ပရိဇာနာတိ. သတ္တ ပုဂ္ဂလာ အညိန္ဒြိယဉ္စ န ဘာဝိတ္ထ စက္ခုန္ဒြိယဉ္စ န ပရိဇာနန္တိ.
(က) ယော စက္ခုန္ဒြိယံ န ပရိဇာနာတိ သော အညာတာဝိန္ဒြိယံ န သစ္ဆိကရိတ္ထာတိ?
အရဟာ စက္ခုန္ဒြိယံ န ပရိဇာနာတိ၊ နော စ အညာတာဝိန္ဒြိယံ န သစ္ဆိကရိတ္ထ. အဋ္ဌ ပုဂ္ဂလာ စက္ခုန္ဒြိယဉ္စ န ပရိဇာနန္တိ အညာတာဝိန္ဒြိယဉ္စ န သစ္ဆိကရိတ္ထ.
(ခ) ယော ဝါ ပန အညာတာဝိန္ဒြိယံ န သစ္ဆိကရိတ္ထ သော စက္ခုန္ဒြိယံ န ပရိဇာနာတီတိ?
အဂ္ဂမဂ္ဂသမင်္ဂီ အညာတာဝိန္ဒြိယံ န သစ္ဆိကရိတ္ထ၊ နော စ စက္ခုန္ဒြိယံ န ပရိဇာနာတိ. အဋ္ဌ ပုဂ္ဂလာ အညာတာဝိန္ဒြိယဉ္စ န သစ္ဆိကရိတ္ထ စက္ခုန္ဒြိယဉ္စ န ပရိဇာနန္တိ. (စက္ခုန္ဒြိယမူလကံ)
၄၆၄. (က) ယော ဒေါမနဿိန္ဒြိယံ နပ္ပဇဟတိ သော အနညာတညဿာမီတိန္ဒြိယံ န ဘာဝိတ္ထာတိ?
ဆ ပုဂ္ဂလာ ဒေါမနဿိန္ဒြိယံ နပ္ပဇဟန္တိ၊ နော စ အနညာတညဿာမီတိန္ဒြိယံ န ဘာဝိတ္ထ. ဒွေ ပုဂ္ဂလာ ဒေါမနဿိန္ဒြိယဉ္စ နပ္ပဇဟန္တိ အနညာတညဿာမီတိန္ဒြိယဉ္စ န ဘာဝိတ္ထ.
(ခ) ယော ဝါ ပန အနညာတညဿာမီတိန္ဒြိယံ န ဘာဝိတ္ထ သော ဒေါမနဿိန္ဒြိယံ နပ္ပဇဟတီတိ? အာမန္တာ.
(က) ယော ဒေါမနဿိန္ဒြိယံ နပ္ပဇဟတိ သော အညိန္ဒြိယံ န ဘာဝိတ္ထာတိ?
အရဟာ ဒေါမနဿိန္ဒြိယံ နပ္ပဇဟတိ၊ နော စ အညိန္ဒြိယံ န ဘာဝိတ္ထ. သတ္တ ပုဂ္ဂလာ ဒေါမနဿိန္ဒြိယဉ္စ နပ္ပဇဟန္တိ အညိန္ဒြိယဉ္စ န ဘာဝိတ္ထ.
(ခ) ယော ဝါ ပန အညိန္ဒြိယံ န ဘာဝိတ္ထ သော ဒေါမနဿိန္ဒြိယံ နပ္ပဇဟတီတိ?
အနာဂါမိမဂ္ဂသမင်္ဂီ အညိန္ဒြိယံ န ဘာဝိတ္ထ၊ နော စ ဒေါမနဿိန္ဒြိယံ နပ္ပဇဟတိ. သတ္တ ပုဂ္ဂလာ အညိန္ဒြိယဉ္စ န ဘာဝိတ္ထ ဒေါမနဿိန္ဒြိယဉ္စ နပ္ပဇဟန္တိ.
(က) ယော ဒေါမနဿိန္ဒြိယံ နပ္ပဇဟတိ သော အညာတာဝိန္ဒြိယံ န သစ္ဆိကရိတ္ထာတိ?
အရဟာ ဒေါမနဿိန္ဒြိယံ နပ္ပဇဟတိ၊ နော စ အညာတာဝိန္ဒြိယံ န သစ္ဆိကရိတ္ထ. အဋ္ဌ ပုဂ္ဂလာ ဒေါမနဿိန္ဒြိယဉ္စ နပ္ပဇဟန္တိ အညာတာဝိန္ဒြိယဉ္စ န သစ္ဆိကရိတ္ထ.
(ခ) ယော ဝါ ပန အညာတာဝိန္ဒြိယံ န သစ္ဆိကရိတ္ထ သော ဒေါမနဿိန္ဒြိယံ နပ္ပဇဟတီတိ?
အနာဂါမိမဂ္ဂသမင်္ဂီ အညာတာဝိန္ဒြိယံ န သစ္ဆိကရိတ္ထ၊ နော စ ဒေါမနဿိန္ဒြိယံ နပ္ပဇဟတိ. အဋ္ဌ ပုဂ္ဂလာ အညာတာဝိန္ဒြိယဉ္စ န သစ္ဆိကရိတ္ထ ဒေါမနဿိန္ဒြိယဉ္စ နပ္ပဇဟန္တိ. (ဒေါမနဿိန္ဒြိယမူလကံ)
၄၆၅. (က) ယော အနညာတညဿာမီတိန္ဒြိယံ န ဘာဝေတိ သော အညိန္ဒြိယံ န ဘာဝိတ္ထာတိ?
အရဟာ အနညာတညဿာမီတိန္ဒြိယံ န ဘာဝေတိ၊ နော စ အညိန္ဒြိယံ န ဘာဝိတ္ထ. သတ္တ ပုဂ္ဂလာ အနညာတညဿာမီတိန္ဒြိယဉ္စ န ဘာဝေန္တိ အညိန္ဒြိယဉ္စ န ဘာဝိတ္ထ.
(ခ) ယော ဝါ ပန အညိန္ဒြိယံ န ဘာဝိတ္ထ သော အနညာတညဿာမီတိန္ဒြိယံ န ဘာဝေတီတိ?
အဋ္ဌမကော အညိန္ဒြိယံ န ဘာဝိတ္ထ၊ နော စ အနညာတညဿာမီတိန္ဒြိယံ န ဘာဝေတိ. သတ္တ ပုဂ္ဂလာ အညိန္ဒြိယဉ္စ န ဘာဝိတ္ထ အနညာတညဿာမီတိန္ဒြိယဉ္စ န ဘာဝေန္တိ.
(က) ယော အနညာတညဿာမီတိန္ဒြိယံ န ဘာဝေတိ သော အညာတာဝိန္ဒြိယံ န သစ္ဆိကရိတ္ထာတိ?
အရဟာ အနညာတညဿာမီတိန္ဒြိယံ န ဘာဝေတိ၊ နော စ အညာတာဝိန္ဒြိယံ န သစ္ဆိကရိတ္ထ. အဋ္ဌ [သတ္တ (သီ. သျာ. က.)] ပုဂ္ဂလာ အနညာတညဿာမီတိန္ဒြိယဉ္စ န ဘာဝေန္တိ အညာတာဝိန္ဒြိယဉ္စ န သစ္ဆိကရိတ္ထ.
(ခ) ယော ဝါ ပန အညာတာဝိန္ဒြိယံ န သစ္ဆိကရိတ္ထ သော အနညာတညဿာမီတိန္ဒြိယံ န ဘာဝေတီတိ?
အဋ္ဌမကော အညာတာဝိန္ဒြိယံ န သစ္ဆိကရိတ္ထ၊ နော စ အနညာတညဿာမီတိန္ဒြိယံ န ဘာဝေတိ. အဋ္ဌ ပုဂ္ဂလာ အညာတာဝိန္ဒြိယဉ္စ န သစ္ဆိကရိတ္ထ အနညာတညဿာမီတိန္ဒြိယဉ္စ န ဘာဝေန္တိ. (အနညာတညဿာမီတိန္ဒြိယမူလကံ)
၄၆၆. (က) ယော အညိန္ဒြိယံ န ဘာဝေတိ သော အညာတာဝိန္ဒြိယံ န သစ္ဆိကရိတ္ထာတိ?
အရဟာ အညိန္ဒြိယံ န ဘာဝေတိ၊ နော စ အညာတာဝိန္ဒြိယံ န သစ္ဆိကရိတ္ထ. ဆ [ပဉ္စ (သီ. သျာ. က.)] ပုဂ္ဂလာ အညိန္ဒြိယဉ္စ န ဘာဝေန္တိ အညာတာဝိန္ဒြိယဉ္စ န သစ္ဆိကရိတ္ထ.
(ခ) ယော ဝါ ပန အညာတာဝိန္ဒြိယံ န သစ္ဆိကရိတ္ထ သော အညိန္ဒြိယံ န ဘာဝေတီတိ?
တယော မဂ္ဂသမင်္ဂိနော အညာတာဝိန္ဒြိယံ န သစ္ဆိကရိတ္ထ၊ နော စ အညိန္ဒြိယံ န ဘာဝေန္တိ. ဆ [ပဉ္စ (သီ. သျာ. က.)] ပုဂ္ဂလာ အညာတာဝိန္ဒြိယဉ္စ န သစ္ဆိကရိတ္ထ အညိန္ဒြိယဉ္စ န ဘာဝေန္တိ. (အညိန္ဒြိယမူလကံ)