(၄) ပစ္စုပ္ပန္နာတီတဝါရော
(က) အနုလောမပုဂ္ဂလော
၁၉၉. (က) ယဿ ကုသလာ ဓမ္မာ ဥပ္ပဇ္ဇန္တိ တဿ အကုသလာ ဓမ္မာ နိရုဇ္ဈိတ္ထာတိ? အာမန္တာ.
(ခ) ယဿ ဝါ ပန အကုသလာ ဓမ္မာ နိရုဇ္ဈိတ္ထ တဿ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ အကုသလာ ဓမ္မာ နိရုဇ္ဈိတ္ထ၊ နော စ တေသံ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ အကုသလာ စ ဓမ္မာ နိရုဇ္ဈိတ္ထ ကုသလာ စ ဓမ္မာ ဥပ္ပဇ္ဇန္တိ.
(က) ယဿ ကုသလာ ဓမ္မာ ဥပ္ပဇ္ဇန္တိ တဿ အဗျာကတာ ဓမ္မာ နိရုဇ္ဈိတ္ထာတိ? အာမန္တာ.
(ခ) ယဿ ဝါ ပန အဗျာကတာ ဓမ္မာ နိရုဇ္ဈိတ္ထ တဿ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ အဗျာကတာ ဓမ္မာ နိရုဇ္ဈိတ္ထ၊ နော စ တေသံ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ အဗျာကတာ စ ဓမ္မာ နိရုဇ္ဈိတ္ထ ကုသလာ စ ဓမ္မာ ဥပ္ပဇ္ဇန္တိ.
၂၀၀. (က) ယဿ အကုသလာ ဓမ္မာ ဥပ္ပဇ္ဇန္တိ တဿ အဗျာကတာ ဓမ္မာ နိရုဇ္ဈိတ္ထာတိ? အာမန္တာ.
(ခ) ယဿ ဝါ ပန အဗျာကတာ ဓမ္မာ နိရုဇ္ဈိတ္ထ တဿ အကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ အကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ အဗျာကတာ ဓမ္မာ နိရုဇ္ဈိတ္ထ၊ နော စ တေသံ အကုသလာ ဓမ္မာ ဥပ္ပဇ္ဇန္တိ. အကုသလာနံ ဥပ္ပါဒက္ခဏေ တေသံ အဗျာကတာ စ ဓမ္မာ နိရုဇ္ဈိတ္ထ အကုသလာ စ ဓမ္မာ ဥပ္ပဇ္ဇန္တိ.
(ခ) အနုလောမဩကာသော
၂၀၁. ယတ္ထ ကုသလာ ဓမ္မာ ဥပ္ပဇ္ဇန္တိ တတ္ထ အကုသလာ ဓမ္မာ နိရုဇ္ဈိတ္ထာတိ?။ပေ။.
(ဂ) အနုလောမပုဂ္ဂလောကာသာ
၂၀၂. (က) ယဿ ယတ္ထ ကုသလာ ဓမ္မာ ဥပ္ပဇ္ဇန္တိ တဿ တတ္ထ အကုသလာ ဓမ္မာ နိရုဇ္ဈိတ္ထာတိ? အာမန္တာ.
(ခ) ယဿ ဝါ ပန ယတ္ထ အကုသလာ ဓမ္မာ နိရုဇ္ဈိတ္ထ တဿ တတ္ထ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ တေသံ တတ္ထ အကုသလာ ဓမ္မာ နိရုဇ္ဈိတ္ထ၊ နော စ တေသံ တတ္ထ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ တတ္ထ အကုသလာ စ ဓမ္မာ နိရုဇ္ဈိတ္ထ ကုသလာ စ ဓမ္မာ ဥပ္ပဇ္ဇန္တိ.
(က) ယဿ ယတ္ထ ကုသလာ ဓမ္မာ ဥပ္ပဇ္ဇန္တိ တဿ တတ္ထ အဗျာကတာ ဓမ္မာ နိရုဇ္ဈိတ္ထာတိ? အာမန္တာ.
(ခ) ယဿ ဝါ ပန ယတ္ထ အဗျာကတာ ဓမ္မာ နိရုဇ္ဈိတ္ထ တဿ တတ္ထ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ အဗျာကတာ ဓမ္မာ နိရုဇ္ဈိတ္ထ၊ နော စ တေသံ တတ္ထ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ တတ္ထ အဗျာကတာ စ ဓမ္မာ နိရုဇ္ဈိတ္ထ ကုသလာ စ ဓမ္မာ ဥပ္ပဇ္ဇန္တိ.
၂၀၃. (က) ယဿ ယတ္ထ အကုသလာ ဓမ္မာ ဥပ္ပဇ္ဇန္တိ တဿ တတ္ထ အဗျာကတာ ဓမ္မာ နိရုဇ္ဈိတ္ထာတိ? အာမန္တာ.
(ခ) ယဿ ဝါ ပန ယတ္ထ အဗျာကတာ ဓမ္မာ နိရုဇ္ဈိတ္ထ တဿ တတ္ထ အကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ အကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ အဗျာကတာ ဓမ္မာ နိရုဇ္ဈိတ္ထ၊ နော စ တေသံ တတ္ထ အကုသလာ ဓမ္မာ ဥပ္ပဇ္ဇန္တိ. အကုသလာနံ ဥပ္ပါဒက္ခဏေ တေသံ တတ္ထ အဗျာကတာ စ ဓမ္မာ နိရုဇ္ဈိတ္ထ အကုသလာ စ ဓမ္မာ ဥပ္ပဇ္ဇန္တိ.
(ဃ) ပစ္စနီကပုဂ္ဂလော
၂၀၄. (က) ယဿ ကုသလာ ဓမ္မာ န ဥပ္ပဇ္ဇန္တိ တဿ အကုသလာ ဓမ္မာ န နိရုဇ္ဈိတ္ထာတိ? နိရုဇ္ဈိတ္ထ.
(ခ) ယဿ ဝါ ပန အကုသလာ ဓမ္မာ န နိရုဇ္ဈိတ္ထ တဿ ကုသလာ ဓမ္မာ န ဥပ္ပဇ္ဇန္တီတိ? နတ္ထိ.
(က) ယဿ ကုသလာ ဓမ္မာ န ဥပ္ပဇ္ဇန္တိ တဿ အဗျာကတာ ဓမ္မာ န နိရုဇ္ဈိတ္ထာတိ? နိရုဇ္ဈိတ္ထ.
(ခ) ယဿ ဝါ ပန အဗျာကတာ ဓမ္မာ န နိရုဇ္ဈိတ္ထ တဿ ကုသလာ ဓမ္မာ န ဥပ္ပဇ္ဇန္တီတိ? နတ္ထိ.
၂၀၅. (က) ယဿ အကုသလာ ဓမ္မာ န ဥပ္ပဇ္ဇန္တိ တဿ အဗျာကတာ ဓမ္မာ န နိရုဇ္ဈိတ္ထာတိ? နိရုဇ္ဈိတ္ထ.
(ခ) ယဿ ဝါ ပန အဗျာကတာ ဓမ္မာ န နိရုဇ္ဈိတ္ထ တဿ အကုသလာ ဓမ္မာ န ဥပ္ပဇ္ဇန္တီတိ? နတ္ထိ.
(င) ပစ္စနီကဩကာသော
၂၀၆. ယတ္ထ ကုသလာ ဓမ္မာ န ဥပ္ပဇ္ဇန္တိ တတ္ထ အကုသလာ ဓမ္မာ န နိရုဇ္ဈိတ္ထာတိ?။ပေ။.
(စ) ပစ္စနီကပုဂ္ဂလောကာသာ
၂၀၇. (က) ယဿ ယတ္ထ ကုသလာ ဓမ္မာ န ဥပ္ပဇ္ဇန္တိ တဿ တတ္ထ အကုသလာ ဓမ္မာ န နိရုဇ္ဈိတ္ထာတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ တေသံ တတ္ထ ကုသလာ ဓမ္မာ န ဥပ္ပဇ္ဇန္တိ၊ နော စ တေသံ တတ္ထ အကုသလာ ဓမ္မာ န နိရုဇ္ဈိတ္ထ. သုဒ္ဓါဝါသာနံ ဒုတိယေ စိတ္တေ ဝတ္တမာနေ အသညသတ္တာနံ တေသံ တတ္ထ ကုသလာ စ ဓမ္မာ န ဥပ္ပဇ္ဇန္တိ အကုသလာ စ ဓမ္မာ န နိရုဇ္ဈိတ္ထ.
(ခ) ယဿ ဝါ ပန ယတ္ထ အကုသလာ ဓမ္မာ န နိရုဇ္ဈိတ္ထ တဿ တတ္ထ ကုသလာ ဓမ္မာ န ဥပ္ပဇ္ဇန္တီတိ? အာမန္တာ.
(က) ယဿ ယတ္ထ ကုသလာ ဓမ္မာ န ဥပ္ပဇ္ဇန္တိ တဿ တတ္ထ အဗျာကတာ ဓမ္မာ န နိရုဇ္ဈိတ္ထာတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ ကုသလာ ဓမ္မာ န ဥပ္ပဇ္ဇန္တိ၊ နော စ တေသံ တတ္ထ အဗျာကတာ ဓမ္မာ န နိရုဇ္ဈိတ္ထ. သုဒ္ဓါဝါသံ ဥပပဇ္ဇန္တာနံ တေသံ တတ္ထ ကုသလာ စ ဓမ္မာ န ဥပ္ပဇ္ဇန္တိ အဗျာကတာ စ ဓမ္မာ န နိရုဇ္ဈိတ္ထ.
(ခ) ယဿ ဝါ ပန ယတ္ထ အဗျာကတာ ဓမ္မာ န နိရုဇ္ဈိတ္ထ တဿ တတ္ထ ကုသလာ ဓမ္မာ န ဥပ္ပဇ္ဇန္တီတိ? အာမန္တာ.
၂၀၈. (က) ယဿ ယတ္ထ အကုသလာ ဓမ္မာ န ဥပ္ပဇ္ဇန္တိ တဿ တတ္ထ အဗျာကတာ ဓမ္မာ န နိရုဇ္ဈိတ္ထာတိ?
သဗ္ဗေသံ စိတ္တဿ ဘင်္ဂက္ခဏေ အကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ အကုသလာ ဓမ္မာ န ဥပ္ပဇ္ဇန္တိ၊ နော စ တေသံ တတ္ထ အဗျာကတာ ဓမ္မာ န နိရုဇ္ဈိတ္ထ. သုဒ္ဓါဝါသံ ဥပပဇ္ဇန္တာနံ တေသံ တတ္ထ အကုသလာ စ ဓမ္မာ န ဥပ္ပဇ္ဇန္တိ အဗျာကတာ စ ဓမ္မာ န နိရုဇ္ဈိတ္ထ.
(ခ) ယဿ ဝါ ပန ယတ္ထ အဗျာကတာ ဓမ္မာ န နိရုဇ္ဈိတ္ထ တဿ တတ္ထ အကုသလာ ဓမ္မာ န ဥပ္ပဇ္ဇန္တီတိ? အာမန္တာ.