(၅) ပစ္စုပ္ပန္နာနာဂတဝါရော
(က) အနုလောမပုဂ္ဂလော
၂၀၉. (က) ယဿ ကုသလာ ဓမ္မာ ဥပ္ပဇ္ဇန္တိ တဿ အကုသလာ ဓမ္မာ နိရုဇ္ဈိဿန္တီတိ?
အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ ကုသလာ ဓမ္မာ ဥပ္ပဇ္ဇန္တိ၊ နော စ တေသံ အကုသလာ ဓမ္မာ နိရုဇ္ဈိဿန္တိ. ဣတရေသံ ကုသလာနံ ဥပ္ပါဒက္ခဏေ တေသံ ကုသလာ စ ဓမ္မာ ဥပ္ပဇ္ဇန္တိ အကုသလာ စ ဓမ္မာ နိရုဇ္ဈိဿန္တိ.
(ခ) ယဿ ဝါ ပန အကုသလာ ဓမ္မာ နိရုဇ္ဈိဿန္တိ တဿ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ အကုသလာ ဓမ္မာ နိရုဇ္ဈိဿန္တိ၊ နော စ တေသံ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ အကုသလာ စ ဓမ္မာ နိရုဇ္ဈိဿန္တိ ကုသလာ စ ဓမ္မာ ဥပ္ပဇ္ဇန္တိ.
(က) ယဿ ကုသလာ ဓမ္မာ ဥပ္ပဇ္ဇန္တိ တဿ အဗျာကတာ ဓမ္မာ နိရုဇ္ဈိဿန္တီတိ? အာမန္တာ.
(ခ) ယဿ ဝါ ပန အဗျာကတာ ဓမ္မာ နိရုဇ္ဈိဿန္တိ တဿ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ အဗျာကတာ ဓမ္မာ နိရုဇ္ဈိဿန္တိ၊ နော စ တေသံ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ အဗျာကတာ စ ဓမ္မာ နိရုဇ္ဈိဿန္တိ ကုသလာ စ ဓမ္မာ ဥပ္ပဇ္ဇန္တိ.
၂၁၀. (က) ယဿ အကုသလာ ဓမ္မာ ဥပ္ပဇ္ဇန္တိ တဿ အဗျာကတာ ဓမ္မာ နိရုဇ္ဈိဿန္တီတိ? အာမန္တာ.
(ခ) ယဿ ဝါ ပန အဗျာကတာ ဓမ္မာ နိရုဇ္ဈိဿန္တိ တဿ အကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ အကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ အဗျာကတာ ဓမ္မာ နိရုဇ္ဈိဿန္တိ၊ နော စ တေသံ အကုသလာ ဓမ္မာ ဥပ္ပဇ္ဇန္တိ. အကုသလာနံ ဥပ္ပါဒက္ခဏေ တေသံ အဗျာကတာ စ ဓမ္မာ နိရုဇ္ဈိဿန္တိ အကုသလာ စ ဓမ္မာ ဥပ္ပဇ္ဇန္တိ.
(ခ) အနုလောမဩကာသော
၂၁၁. ယတ္ထ ကုသလာ ဓမ္မာ ဥပ္ပဇ္ဇန္တိ တတ္ထ အကုသလာ ဓမ္မာ နိရုဇ္ဈိဿန္တီတိ?။ပေ။.
(ဂ) အနုလောမပုဂ္ဂလောကာသာ
၂၁၂. (က) ယဿ ယတ္ထ ကုသလာ ဓမ္မာ ဥပ္ပဇ္ဇန္တိ တဿ တတ္ထ အကုသလာ ဓမ္မာ နိရုဇ္ဈိဿန္တီတိ?
အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ တတ္ထ ကုသလာ ဓမ္မာ ဥပ္ပဇ္ဇန္တိ၊ နော စ တေသံ တတ္ထ အကုသလာ ဓမ္မာ နိရုဇ္ဈိဿန္တိ. ဣတရေသံ ကုသလာနံ ဥပ္ပါဒက္ခဏေ တေသံ တတ္ထ ကုသလာ စ ဓမ္မာ ဥပ္ပဇ္ဇန္တိ အကုသလာ စ ဓမ္မာ နိရုဇ္ဈိဿန္တိ.
(ခ) ယဿ ဝါ ပန ယတ္ထ အကုသလာ ဓမ္မာ နိရုဇ္ဈိဿန္တိ တဿ တတ္ထ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ တေသံ တတ္ထ အကုသလာ ဓမ္မာ နိရုဇ္ဈိဿန္တိ၊ နော စ တေသံ တတ္ထ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ တတ္ထ အကုသလာ စ ဓမ္မာ နိရုဇ္ဈိဿန္တိ ကုသလာ စ ဓမ္မာ ဥပ္ပဇ္ဇန္တိ.
(က) ယဿ ယတ္ထ ကုသလာ ဓမ္မာ ဥပ္ပဇ္ဇန္တိ တဿ တတ္ထ အဗျာကတာ ဓမ္မာ နိရုဇ္ဈိဿန္တီတိ? အာမန္တာ.
(ခ) ယဿ ဝါ ပန ယတ္ထ အဗျာကတာ ဓမ္မာ နိရုဇ္ဈိဿန္တိ တဿ တတ္ထ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ အဗျာကတာ ဓမ္မာ နိရုဇ္ဈိဿန္တိ၊ နော စ တေသံ တတ္ထ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ တတ္ထ အဗျာကတာ စ ဓမ္မာ နိရုဇ္ဈိဿန္တိ ကုသလာ စ ဓမ္မာ ဥပ္ပဇ္ဇန္တိ.
၂၁၃. (က) ယဿ ယတ္ထ အကုသလာ ဓမ္မာ ဥပ္ပဇ္ဇန္တိ တဿ တတ္ထ အဗျာကတာ ဓမ္မာ နိရုဇ္ဈိဿန္တီတိ? အာမန္တာ.
(ခ) ယဿ ဝါ ပန ယတ္ထ အဗျာကတာ ဓမ္မာ နိရုဇ္ဈိဿန္တိ တဿ တတ္ထ အကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ အကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ အဗျာကတာ ဓမ္မာ နိရုဇ္ဈိဿန္တိ၊ နော စ တေသံ တတ္ထ အကုသလာ ဓမ္မာ ဥပ္ပဇ္ဇန္တိ. အကုသလာနံ ဥပ္ပါဒက္ခဏေ တေသံ တတ္ထ အဗျာကတာ စ ဓမ္မာ နိရုဇ္ဈိဿန္တိ အကုသလာ စ ဓမ္မာ ဥပ္ပဇ္ဇန္တိ.
(ဃ) ပစ္စနီကပုဂ္ဂလော
၂၁၄. (က) ယဿ ကုသလာ ဓမ္မာ န ဥပ္ပဇ္ဇန္တိ တဿ အကုသလာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ကုသလာ ဓမ္မာ န ဥပ္ပဇ္ဇန္တိ၊ နော စ တေသံ အကုသလာ ဓမ္မာ န နိရုဇ္ဈိဿန္တိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ တေသံ ကုသလာ စ ဓမ္မာ န ဥပ္ပဇ္ဇန္တိ အကုသလာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန အကုသလာ ဓမ္မာ န နိရုဇ္ဈိဿန္တိ တဿ ကုသလာ ဓမ္မာ န ဥပ္ပဇ္ဇန္တီတိ?
အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ အကုသလာ ဓမ္မာ န နိရုဇ္ဈိဿန္တိ၊ နော စ တေသံ ကုသလာ ဓမ္မာ န ဥပ္ပဇ္ဇန္တိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ တေသံ အကုသလာ စ ဓမ္မာ န နိရုဇ္ဈိဿန္တိ ကုသလာ စ ဓမ္မာ န ဥပ္ပဇ္ဇန္တိ.
(က) ယဿ ကုသလာ ဓမ္မာ န ဥပ္ပဇ္ဇန္တိ တဿ အဗျာကတာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ကုသလာ ဓမ္မာ န ဥပ္ပဇ္ဇန္တိ၊ နော စ တေသံ အဗျာကတာ ဓမ္မာ န နိရုဇ္ဈိဿန္တိ. ပစ္ဆိမစိတ္တဿ ဘင်္ဂက္ခဏေ တေသံ ကုသလာ စ ဓမ္မာ န ဥပ္ပဇ္ဇန္တိ အဗျာကတာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန အဗျာကတာ ဓမ္မာ န နိရုဇ္ဈိဿန္တိ တဿ ကုသလာ ဓမ္မာ န ဥပ္ပဇ္ဇန္တီတိ? အာမန္တာ.
၂၁၅. (က) ယဿ အကုသလာ ဓမ္မာ န ဥပ္ပဇ္ဇန္တိ တဿ အဗျာကတာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ အကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ အကုသလာ ဓမ္မာ န ဥပ္ပဇ္ဇန္တိ၊ နော စ တေသံ အဗျာကတာ ဓမ္မာ န နိရုဇ္ဈိဿန္တိ. ပစ္ဆိမစိတ္တဿ ဘင်္ဂက္ခဏေ တေသံ အကုသလာ စ ဓမ္မာ န ဥပ္ပဇ္ဇန္တိ အဗျာကတာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန အဗျာကတာ ဓမ္မာ န နိရုဇ္ဈိဿန္တိ တဿ အကုသလာ ဓမ္မာ န ဥပ္ပဇ္ဇန္တီတိ? အာမန္တာ.
(င) ပစ္စနီကဩကာသော
၂၁၆. ယတ္ထ ကုသလာ ဓမ္မာ န ဥပ္ပဇ္ဇန္တိ တတ္ထ အကုသလာ ဓမ္မာ န နိရုဇ္ဈိဿန္တီတိ?။ပေ။.
(စ) ပစ္စနီကပုဂ္ဂလောကာသာ
၂၁၇. (က) ယဿ ယတ္ထ ကုသလာ ဓမ္မာ န ဥပ္ပဇ္ဇန္တိ တဿ တတ္ထ အကုသလာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ တေသံ တတ္ထ ကုသလာ ဓမ္မာ န ဥပ္ပဇ္ဇန္တိ၊ နော စ တေသံ တတ္ထ အကုသလာ ဓမ္မာ န နိရုဇ္ဈိဿန္တိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ကုသလာ စ ဓမ္မာ န ဥပ္ပဇ္ဇန္တိ အကုသလာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန ယတ္ထ အကုသလာ ဓမ္မာ န နိရုဇ္ဈိဿန္တိ တဿ တတ္ထ ကုသလာ ဓမ္မာ န ဥပ္ပဇ္ဇန္တီတိ?
အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ တတ္ထ အကုသလာ ဓမ္မာ န နိရုဇ္ဈိဿန္တိ၊ နော စ တေသံ တတ္ထ ကုသလာ ဓမ္မာ န ဥပ္ပဇ္ဇန္တိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အသညသတ္တာနံ တေသံ တတ္ထ အကုသလာ စ ဓမ္မာ န နိရုဇ္ဈိဿန္တိ ကုသလာ စ ဓမ္မာ န ဥပ္ပဇ္ဇန္တိ.
(က) ယဿ ယတ္ထ ကုသလာ ဓမ္မာ န ဥပ္ပဇ္ဇန္တိ တဿ တတ္ထ အဗျာကတာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ ကုသလာ ဓမ္မာ န ဥပ္ပဇ္ဇန္တိ၊ နော စ တေသံ တတ္ထ အဗျာကတာ ဓမ္မာ န နိရုဇ္ဈိဿန္တိ. ပစ္ဆိမစိတ္တဿ ဘင်္ဂက္ခဏေ တေသံ တတ္ထ ကုသလာ စ ဓမ္မာ န ဥပ္ပဇ္ဇန္တိ အဗျာကတာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ န နိရုဇ္ဈိဿန္တိ တဿ တတ္ထ ကုသလာ ဓမ္မာ န ဥပ္ပဇ္ဇန္တီတိ? အာမန္တာ.
၂၁၈. (က) ယဿ ယတ္ထ အကုသလာ ဓမ္မာ န ဥပ္ပဇ္ဇန္တိ တဿ တတ္ထ အဗျာကတာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ အကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ အကုသလာ ဓမ္မာ န ဥပ္ပဇ္ဇန္တိ၊ နော စ တေသံ တတ္ထ အဗျာကတာ ဓမ္မာ န နိရုဇ္ဈိဿန္တိ. ပစ္ဆိမစိတ္တဿ ဘင်္ဂက္ခဏေ တေသံ တတ္ထ အကုသလာ စ ဓမ္မာ န ဥပ္ပဇ္ဇန္တိ အဗျာကတာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ န နိရုဇ္ဈိဿန္တိ တဿ တတ္ထ အကုသလာ ဓမ္မာ န ဥပ္ပဇ္ဇန္တီတိ? အာမန္တာ.