(၅) ပစ္စုပ္ပန္နာနာဂတဝါရော
(က) အနုလောမပုဂ္ဂလော
၁၄၃. (က) ယဿ ကုသလာ ဓမ္မာ နိရုဇ္ဈန္တိ တဿ အကုသလာ ဓမ္မာ နိရုဇ္ဈိဿန္တီတိ?
အဂ္ဂမဂ္ဂဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ တေသံ ကုသလာ ဓမ္မာ နိရုဇ္ဈန္တိ၊ နော စ တေသံ အကုသလာ ဓမ္မာ နိရုဇ္ဈိဿန္တိ. ဣတရေသံ ကုသလာနံ ဘင်္ဂက္ခဏေ တေသံ ကုသလာ စ ဓမ္မာ နိရုဇ္ဈန္တိ အကုသလာ စ ဓမ္မာ နိရုဇ္ဈိဿန္တိ.
(ခ) ယဿ ဝါ ပန အကုသလာ ဓမ္မာ နိရုဇ္ဈိဿန္တိ တဿ ကုသလာ ဓမ္မာ နိရုဇ္ဈန္တီတိ?
သဗ္ဗေသံ စိတ္တဿ ဥပ္ပါဒက္ခဏေ ကုသလဝိပ္ပယုတ္တစိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ အကုသလာ ဓမ္မာ နိရုဇ္ဈိဿန္တိ၊ နော စ တေသံ ကုသလာ ဓမ္မာ နိရုဇ္ဈန္တိ. ကုသလာနံ ဘင်္ဂက္ခဏေ တေသံ အကုသလာ စ ဓမ္မာ နိရုဇ္ဈိဿန္တိ ကုသလာ စ ဓမ္မာ နိရုဇ္ဈန္တိ.
(က) ယဿ ကုသလာ ဓမ္မာ နိရုဇ္ဈန္တိ တဿ အဗျာကတာ ဓမ္မာ နိရုဇ္ဈိဿန္တီတိ? အာမန္တာ.
(ခ) ယဿ ဝါ ပန အဗျာကတာ ဓမ္မာ နိရုဇ္ဈိဿန္တိ တဿ ကုသလာ ဓမ္မာ နိရုဇ္ဈန္တီတိ?
သဗ္ဗေသံ စိတ္တဿ ဥပ္ပါဒက္ခဏေ ကုသလဝိပ္ပယုတ္တစိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ အဗျာကတာ ဓမ္မာ နိရုဇ္ဈိဿန္တိ၊ နော စ တေသံ ကုသလာ ဓမ္မာ နိရုဇ္ဈန္တိ. ကုသလာနံ ဘင်္ဂက္ခဏေ တေသံ အဗျာကတာ စ ဓမ္မာ နိရုဇ္ဈိဿန္တိ ကုသလာ စ ဓမ္မာ နိရုဇ္ဈန္တိ.
၁၄၄. (က) ယဿ အကုသလာ ဓမ္မာ နိရုဇ္ဈန္တိ တဿ အဗျာကတာ ဓမ္မာ နိရုဇ္ဈိဿန္တီတိ? အာမန္တာ.
(ခ) ယဿ ဝါ ပန အဗျာကတာ ဓမ္မာ နိရုဇ္ဈိဿန္တိ တဿ အကုသလာ ဓမ္မာ နိရုဇ္ဈန္တီတိ?
သဗ္ဗေသံ စိတ္တဿ ဥပ္ပါဒက္ခဏေ အကုသလဝိပ္ပယုတ္တစိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ အဗျာကတာ ဓမ္မာ နိရုဇ္ဈိဿန္တိ၊ နော စ တေသံ အကုသလာ ဓမ္မာ နိရုဇ္ဈန္တိ. အကုသလာနံ ဘင်္ဂက္ခဏေ တေသံ အဗျာကတာ စ ဓမ္မာ နိရုဇ္ဈိဿန္တိ အကုသလာ စ ဓမ္မာ နိရုဇ္ဈန္တိ.
(ခ) အနုလောမဩကာသော
၁၄၅. ယတ္ထ ကုသလာ ဓမ္မာ နိရုဇ္ဈန္တိ တတ္ထ အကုသလာ ဓမ္မာ နိရုဇ္ဈိဿန္တီတိ?။ပေ။.
(ဂ) အနုလောမပုဂ္ဂလောကာသာ
၁၄၆. (က) ယဿ ယတ္ထ ကုသလာ ဓမ္မာ နိရုဇ္ဈန္တိ တဿ တတ္ထ အကုသလာ ဓမ္မာ နိရုဇ္ဈိဿန္တီတိ?
အဂ္ဂမဂ္ဂဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ တေသံ တတ္ထ ကုသလာ ဓမ္မာ နိရုဇ္ဈန္တိ၊ နော စ တေသံ တတ္ထ အကုသလာ ဓမ္မာ နိရုဇ္ဈိဿန္တိ. ဣတရေသံ ကုသလာနံ ဘင်္ဂက္ခဏေ တေသံ တတ္ထ ကုသလာ စ ဓမ္မာ နိရုဇ္ဈန္တိ အကုသလာ စ ဓမ္မာ နိရုဇ္ဈိဿန္တိ.
(ခ) ယဿ ဝါ ပန ယတ္ထ အကုသလာ ဓမ္မာ နိရုဇ္ဈိဿန္တိ တဿ တတ္ထ ကုသလာ ဓမ္မာ နိရုဇ္ဈန္တီတိ?
သဗ္ဗေသံ စိတ္တဿ ဥပ္ပါဒက္ခဏေ ကုသလဝိပ္ပယုတ္တစိတ္တဿ ဘင်္ဂက္ခဏေ တေသံ တတ္ထ အကုသလာ ဓမ္မာ နိရုဇ္ဈိဿန္တိ၊ နော စ တေသံ တတ္ထ ကုသလာ ဓမ္မာ နိရုဇ္ဈန္တိ. ကုသလာနံ ဘင်္ဂက္ခဏေ တေသံ တတ္ထ အကုသလာ စ ဓမ္မာ နိရုဇ္ဈိဿန္တိ ကုသလာ စ ဓမ္မာ နိရုဇ္ဈန္တိ.
(က) ယဿ ယတ္ထ ကုသလာ ဓမ္မာ နိရုဇ္ဈန္တိ တဿ တတ္ထ အဗျာကတာ ဓမ္မာ နိရုဇ္ဈိဿန္တီတိ? အာမန္တာ.
(ခ) ယဿ ဝါ ပန ယတ္ထ အဗျာကတာ ဓမ္မာ နိရုဇ္ဈိဿန္တိ တဿ တတ္ထ ကုသလာ ဓမ္မာ နိရုဇ္ဈန္တီတိ?
သဗ္ဗေသံ စိတ္တဿ ဥပ္ပါဒက္ခဏေ ကုသလဝိပ္ပယုတ္တစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ အဗျာကတာ ဓမ္မာ နိရုဇ္ဈိဿန္တိ၊ နော စ တေသံ တတ္ထ ကုသလာ ဓမ္မာ နိရုဇ္ဈန္တိ. ကုသလာနံ ဘင်္ဂက္ခဏေ တေသံ တတ္ထ အဗျာကတာ စ ဓမ္မာ နိရုဇ္ဈိဿန္တိ ကုသလာ စ ဓမ္မာ နိရုဇ္ဈန္တိ.
၁၄၇. (က) ယဿ ယတ္ထ အကုသလာ ဓမ္မာ နိရုဇ္ဈန္တိ တဿ တတ္ထ အဗျာကတာ ဓမ္မာ နိရုဇ္ဈိဿန္တီတိ? အာမန္တာ.
(ခ) ယဿ ဝါ ပန ယတ္ထ အဗျာကတာ ဓမ္မာ နိရုဇ္ဈိဿန္တိ တဿ တတ္ထ အကုသလာ ဓမ္မာ နိရုဇ္ဈန္တီတိ?
သဗ္ဗေသံ စိတ္တဿ ဥပ္ပါဒက္ခဏေ အကုသလဝိပ္ပယုတ္တစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ အဗျာကတာ ဓမ္မာ နိရုဇ္ဈိဿန္တိ၊ နော စ တေသံ တတ္ထ အကုသလာ ဓမ္မာ နိရုဇ္ဈန္တိ. အကုသလာနံ ဘင်္ဂက္ခဏေ တေသံ တတ္ထ အဗျာကတာ စ ဓမ္မာ နိရုဇ္ဈိဿန္တိ အကုသလာ စ ဓမ္မာ နိရုဇ္ဈန္တိ.
(ဃ) ပစ္စနီကပုဂ္ဂလော
၁၄၈. (က) ယဿ ကုသလာ ဓမ္မာ န နိရုဇ္ဈန္တိ တဿ အကုသလာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဥပ္ပါဒက္ခဏေ ကုသလဝိပ္ပယုတ္တစိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ကုသလာ ဓမ္မာ န နိရုဇ္ဈန္တိ၊ နော စ တေသံ အကုသလာ ဓမ္မာ န နိရုဇ္ဈိဿန္တိ. အဂ္ဂမဂ္ဂဿ ဥပ္ပါဒက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ ကုသလာ စ ဓမ္မာ န နိရုဇ္ဈန္တိ အကုသလာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန အကုသလာ ဓမ္မာ န နိရုဇ္ဈိဿန္တိ တဿ ကုသလာ ဓမ္မာ န နိရုဇ္ဈန္တီတိ?
အဂ္ဂမဂ္ဂဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ တေသံ အကုသလာ ဓမ္မာ န နိရုဇ္ဈိဿန္တိ၊ နော စ တေသံ ကုသလာ ဓမ္မာ န နိရုဇ္ဈန္တိ. အဂ္ဂမဂ္ဂဿ ဥပ္ပါဒက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ အကုသလာ စ ဓမ္မာ န နိရုဇ္ဈိဿန္တိ ကုသလာ စ ဓမ္မာ န နိရုဇ္ဈန္တိ.
(က) ယဿ ကုသလာ ဓမ္မာ န နိရုဇ္ဈန္တိ တဿ အဗျာကတာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဥပ္ပါဒက္ခဏေ ကုသလဝိပ္ပယုတ္တစိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ကုသလာ ဓမ္မာ န နိရုဇ္ဈန္တိ၊ နော စ တေသံ အဗျာကတာ ဓမ္မာ န နိရုဇ္ဈိဿန္တိ. ပစ္ဆိမစိတ္တဿ ဘင်္ဂက္ခဏေ တေသံ ကုသလာ စ ဓမ္မာ န နိရုဇ္ဈန္တိ အဗျာကတာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန အဗျာကတာ ဓမ္မာ န နိရုဇ္ဈိဿန္တိ တဿ ကုသလာ ဓမ္မာ န နိရုဇ္ဈန္တီတိ? အာမန္တာ.
၁၄၉. (က) ယဿ အကုသလာ ဓမ္မာ န နိရုဇ္ဈန္တိ တဿ အဗျာကတာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဥပ္ပါဒက္ခဏေ အကုသလဝိပ္ပယုတ္တစိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ အကုသလာ ဓမ္မာ န နိရုဇ္ဈန္တိ၊ နော စ တေသံ အဗျာကတာ ဓမ္မာ န နိရုဇ္ဈိဿန္တိ. ပစ္ဆိမစိတ္တဿ ဘင်္ဂက္ခဏေ တေသံ အကုသလာ စ ဓမ္မာ န နိရုဇ္ဈန္တိ အဗျာကတာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန အဗျာကတာ ဓမ္မာ န နိရုဇ္ဈိဿန္တိ တဿ အကုသလာ ဓမ္မာ န နိရုဇ္ဈန္တီတိ? အာမန္တာ.
(င) ပစ္စနီကဩကာသော
၁၅၀. ယတ္ထ ကုသလာ ဓမ္မာ န နိရုဇ္ဈန္တိ တတ္ထ အကုသလာ ဓမ္မာ န နိရုဇ္ဈိဿန္တီတိ?။ပေ။.
(စ) ပစ္စနီကပုဂ္ဂလောကာသာ
၁၅၁. (က) ယဿ ယတ္ထ ကုသလာ ဓမ္မာ န နိရုဇ္ဈန္တိ တဿ တတ္ထ အကုသလာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဥပ္ပါဒက္ခဏေ ကုသလဝိပ္ပယုတ္တစိတ္တဿ ဘင်္ဂက္ခဏေ တေသံ တတ္ထ ကုသလာ ဓမ္မာ န နိရုဇ္ဈန္တိ၊ နော စ တေသံ တတ္ထ အကုသလာ ဓမ္မာ န နိရုဇ္ဈိဿန္တိ. အဂ္ဂမဂ္ဂဿ ဥပ္ပါဒက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ ကုသလာ စ ဓမ္မာ န နိရုဇ္ဈန္တိ အကုသလာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန ယတ္ထ အကုသလာ ဓမ္မာ န နိရုဇ္ဈိဿန္တိ တဿ တတ္ထ ကုသလာ ဓမ္မာ န နိရုဇ္ဈန္တီတိ?
အဂ္ဂမဂ္ဂဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ တေသံ တတ္ထ အကုသလာ ဓမ္မာ န နိရုဇ္ဈိဿန္တိ၊ နော စ တေသံ တတ္ထ ကုသလာ ဓမ္မာ န နိရုဇ္ဈန္တိ. အဂ္ဂမဂ္ဂဿ ဥပ္ပါဒက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ အကုသလာ စ ဓမ္မာ န နိရုဇ္ဈိဿန္တိ ကုသလာ စ ဓမ္မာ န နိရုဇ္ဈန္တိ.
(က) ယဿ ယတ္ထ ကုသလာ ဓမ္မာ န နိရုဇ္ဈန္တိ တဿ တတ္ထ အဗျာကတာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဥပ္ပါဒက္ခဏေ ကုသလဝိပ္ပယုတ္တစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ကုသလာ ဓမ္မာ န နိရုဇ္ဈန္တိ၊ နော စ တေသံ တတ္ထ အဗျာကတာ ဓမ္မာ န နိရုဇ္ဈိဿန္တိ. ပစ္ဆိမစိတ္တဿ ဘင်္ဂက္ခဏေ တေသံ တတ္ထ ကုသလာ စ ဓမ္မာ န နိရုဇ္ဈန္တိ အဗျာကတာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ န နိရုဇ္ဈိဿန္တိ တဿ တတ္ထ ကုသလာ ဓမ္မာ န နိရုဇ္ဈန္တီတိ? အာမန္တာ.
၁၅၂. (က) ယဿ ယတ္ထ အကုသလာ ဓမ္မာ န နိရုဇ္ဈန္တိ တဿ တတ္ထ အဗျာကတာ ဓမ္မာ န နိရုဇ္ဈိဿန္တီတိ?
သဗ္ဗေသံ စိတ္တဿ ဥပ္ပါဒက္ခဏေ အကုသလဝိပ္ပယုတ္တစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ အကုသလာ ဓမ္မာ န နိရုဇ္ဈန္တိ၊ နော စ တေသံ တတ္ထ အဗျာကတာ ဓမ္မာ န နိရုဇ္ဈိဿန္တိ. ပစ္ဆိမစိတ္တဿ ဘင်္ဂက္ခဏေ တေသံ တတ္ထ အကုသလာ စ ဓမ္မာ န နိရုဇ္ဈန္တိ အဗျာကတာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ န နိရုဇ္ဈိဿန္တိ တဿ တတ္ထ အကုသလာ ဓမ္မာ န နိရုဇ္ဈန္တီတိ? အာမန္တာ.