(၆) အတီတာနာဂတဝါရော
(က) အနုလောမပုဂ္ဂလော
၁၅၃. (က) ယဿ ကုသလာ ဓမ္မာ နိရုဇ္ဈိတ္ထ တဿ အကုသလာ ဓမ္မာ နိရုဇ္ဈိဿန္တီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ ကုသလာ ဓမ္မာ နိရုဇ္ဈိတ္ထ၊ နော စ တေသံ အကုသလာ ဓမ္မာ နိရုဇ္ဈိဿန္တိ. ဣတရေသံ တေသံ ကုသလာ စ ဓမ္မာ နိရုဇ္ဈိတ္ထ အကုသလာ စ ဓမ္မာ နိရုဇ္ဈိဿန္တိ.
(ခ) ယဿ ဝါ ပန အကုသလာ ဓမ္မာ နိရုဇ္ဈိဿန္တိ တဿ ကုသလာ ဓမ္မာ နိရုဇ္ဈိတ္ထာတိ? အာမန္တာ.
(က) ယဿ ကုသလာ ဓမ္မာ နိရုဇ္ဈိတ္ထ တဿ အဗျာကတာ ဓမ္မာ နိရုဇ္ဈိဿန္တီတိ?
ပစ္ဆိမစိတ္တဿ ဘင်္ဂက္ခဏေ တေသံ ကုသလာ ဓမ္မာ နိရုဇ္ဈိတ္ထ၊ နော စ တေသံ အဗျာကတာ ဓမ္မာ နိရုဇ္ဈိဿန္တိ. ဣတရေသံ တေသံ ကုသလာ စ ဓမ္မာ နိရုဇ္ဈိတ္ထ အဗျာကတာ စ ဓမ္မာ နိရုဇ္ဈိဿန္တိ.
(ခ) ယဿ ဝါ ပန အဗျာကတာ ဓမ္မာ နိရုဇ္ဈိဿန္တိ တဿ ကုသလာ ဓမ္မာ နိရုဇ္ဈိတ္ထာတိ? အာမန္တာ.
၁၅၄. (က) ယဿ အကုသလာ ဓမ္မာ နိရုဇ္ဈိတ္ထ တဿ အဗျာကတာ ဓမ္မာ နိရုဇ္ဈိဿန္တီတိ?
ပစ္ဆိမစိတ္တဿ ဘင်္ဂက္ခဏေ တေသံ အကုသလာ ဓမ္မာ နိရုဇ္ဈိတ္ထ၊ နော စ တေသံ အဗျာကတာ ဓမ္မာ နိရုဇ္ဈိဿန္တိ. ဣတရေသံ တေသံ အကုသလာ စ ဓမ္မာ နိရုဇ္ဈိတ္ထ အဗျာကတာ စ ဓမ္မာ နိရုဇ္ဈိဿန္တိ.
(ခ) ယဿ ဝါ ပန အဗျာကတာ ဓမ္မာ နိရုဇ္ဈိဿန္တိ တဿ အကုသလာ ဓမ္မာ နိရုဇ္ဈိတ္ထာတိ? အာမန္တာ.
(ခ) အနုလောမဩကာသော
၁၅၅. ယတ္ထ ကုသလာ ဓမ္မာ နိရုဇ္ဈိတ္ထ တတ္ထ အကုသလာ ဓမ္မာ နိရုဇ္ဈိဿန္တီတိ?။ပေ။.
(ဂ) အနုလောမပုဂ္ဂလောကာသာ
၁၅၆. (က) ယဿ ယတ္ထ ကုသလာ ဓမ္မာ နိရုဇ္ဈိတ္ထ တဿ တတ္ထ အကုသလာ ဓမ္မာ နိရုဇ္ဈိဿန္တီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ တတ္ထ ကုသလာ ဓမ္မာ နိရုဇ္ဈိတ္ထ၊ နော စ တေသံ တတ္ထ အကုသလာ ဓမ္မာ နိရုဇ္ဈိဿန္တိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ကုသလာ စ ဓမ္မာ နိရုဇ္ဈိတ္ထ အကုသလာ စ ဓမ္မာ နိရုဇ္ဈိဿန္တိ.
(ခ) ယဿ ဝါ ပန ယတ္ထ အကုသလာ ဓမ္မာ နိရုဇ္ဈိဿန္တိ တဿ တတ္ထ ကုသလာ ဓမ္မာ နိရုဇ္ဈိတ္ထာတိ?
သုဒ္ဓါဝါသာနံ ဒုတိယေ စိတ္တေ ဝတ္တမာနေ တေသံ တတ္ထ အကုသလာ ဓမ္မာ နိရုဇ္ဈိဿန္တိ၊ နော စ တေသံ တတ္ထ ကုသလာ ဓမ္မာ နိရုဇ္ဈိတ္ထ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ အကုသလာ စ ဓမ္မာ နိရုဇ္ဈိဿန္တိ ကုသလာ စ ဓမ္မာ နိရုဇ္ဈိတ္ထ.
(က) ယဿ ယတ္ထ ကုသလာ ဓမ္မာ နိရုဇ္ဈိတ္ထ တဿ တတ္ထ အဗျာကတာ ဓမ္မာ နိရုဇ္ဈိဿန္တီတိ?
ပစ္ဆိမစိတ္တဿ ဘင်္ဂက္ခဏေ တေသံ တတ္ထ ကုသလာ ဓမ္မာ နိရုဇ္ဈိတ္ထ၊ နော စ တေသံ တတ္ထ အဗျာကတာ ဓမ္မာ နိရုဇ္ဈိဿန္တိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ကုသလာ စ ဓမ္မာ နိရုဇ္ဈိတ္ထ အဗျာကတာ စ ဓမ္မာ နိရုဇ္ဈိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ နိရုဇ္ဈိဿန္တိ တဿ တတ္ထ ကုသလာ ဓမ္မာ နိရုဇ္ဈိတ္ထာတိ?
သုဒ္ဓါဝါသာနံ ဒုတိယေ စိတ္တေ ဝတ္တမာနေ အသညသတ္တာနံ တေသံ တတ္ထ အဗျာကတာ ဓမ္မာ နိရုဇ္ဈိဿန္တိ၊ နော စ တေသံ တတ္ထ ကုသလာ ဓမ္မာ နိရုဇ္ဈိတ္ထ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ အဗျာကတာ စ ဓမ္မာ နိရုဇ္ဈိဿန္တိ ကုသလာ စ ဓမ္မာ နိရုဇ္ဈိတ္ထ.
၁၅၇. (က) ယဿ ယတ္ထ အကုသလာ ဓမ္မာ နိရုဇ္ဈိတ္ထ တဿ တတ္ထ အဗျာကတာ ဓမ္မာ နိရုဇ္ဈိဿန္တီတိ?
ပစ္ဆိမစိတ္တဿ ဘင်္ဂက္ခဏေ တေသံ တတ္ထ အကုသလာ ဓမ္မာ နိရုဇ္ဈိတ္ထ၊ နော စ တေသံ တတ္ထ အဗျာကတာ ဓမ္မာ နိရုဇ္ဈိဿန္တိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ အကုသလာ စ ဓမ္မာ နိရုဇ္ဈိတ္ထ အဗျာကတာ စ ဓမ္မာ နိရုဇ္ဈိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ နိရုဇ္ဈိဿန္တိ တဿ တတ္ထ အကုသလာ ဓမ္မာ နိရုဇ္ဈိတ္ထာတိ?
သုဒ္ဓါဝါသာနံ ဒုတိယေ စိတ္တေ ဝတ္တမာနေ အသညသတ္တာနံ တေသံ တတ္ထ အဗျာကတာ ဓမ္မာ နိရုဇ္ဈိဿန္တိ၊ နော စ တေသံ တတ္ထ အကုသလာ ဓမ္မာ နိရုဇ္ဈိတ္ထ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ အဗျာကတာ စ ဓမ္မာ နိရုဇ္ဈိဿန္တိ အကုသလာ စ ဓမ္မာ နိရုဇ္ဈိတ္ထ.
(ဃ) ပစ္စနီကပုဂ္ဂလော
၁၅၈. (က) ယဿ ကုသလာ ဓမ္မာ န နိရုဇ္ဈိတ္ထ တဿ အကုသလာ ဓမ္မာ န နိရုဇ္ဈိဿန္တီတိ? နတ္ထိ.
(ခ) ယဿ ဝါ ပန အကုသလာ ဓမ္မာ န နိရုဇ္ဈိဿန္တိ တဿ ကုသလာ ဓမ္မာ န နိရုဇ္ဈိတ္ထာတိ? နိရုဇ္ဈိတ္ထ.
(က) ယဿ ကုသလာ ဓမ္မာ န နိရုဇ္ဈိတ္ထ တဿ အဗျာကတာ ဓမ္မာ န နိရုဇ္ဈိဿန္တီတိ? နတ္ထိ.
(ခ) ယဿ ဝါ ပန အဗျာကတာ ဓမ္မာ န နိရုဇ္ဈိဿန္တိ တဿ ကုသလာ ဓမ္မာ န နိရုဇ္ဈိတ္ထာတိ? နိရုဇ္ဈိတ္ထ.
၁၅၉. (က) ယဿ အကုသလာ ဓမ္မာ န နိရုဇ္ဈိတ္ထ တဿ အဗျာကတာ ဓမ္မာ န နိရုဇ္ဈိဿန္တီတိ? နတ္ထိ.
(ခ) ယဿ ဝါ ပန အဗျာကတာ ဓမ္မာ န နိရုဇ္ဈိဿန္တိ တဿ အကုသလာ ဓမ္မာ န နိရုဇ္ဈိတ္ထာတိ? နိရုဇ္ဈိတ္ထ.
(င) ပစ္စနီကဩကာသော
၁၆၀. ယတ္ထ ကုသလာ ဓမ္မာ န နိရုဇ္ဈိတ္ထ တတ္ထ အကုသလာ ဓမ္မာ န နိရုဇ္ဈိဿန္တီတိ?။ပေ။.
(စ) ပစ္စနီကပုဂ္ဂလောကာသာ
၁၆၁. (က) ယဿ ယတ္ထ ကုသလာ ဓမ္မာ န နိရုဇ္ဈိတ္ထ တဿ တတ္ထ အကုသလာ ဓမ္မာ န နိရုဇ္ဈိဿန္တီတိ?
သုဒ္ဓါဝါသာနံ ဒုတိယေ စိတ္တေ ဝတ္တမာနေ တေသံ တတ္ထ ကုသလာ ဓမ္မာ န နိရုဇ္ဈိတ္ထ၊ နော စ တေသံ တတ္ထ အကုသလာ ဓမ္မာ န နိရုဇ္ဈိဿန္တိ. အသညသတ္တာနံ တေသံ တတ္ထ ကုသလာ စ ဓမ္မာ န နိရုဇ္ဈိတ္ထ အကုသလာ စ ဓမ္မာ န နိရုဇ္ဈိဿန္တိ.
(ခ) ယဿ ဝါ ပန ယတ္ထ အကုသလာ ဓမ္မာ န နိရုဇ္ဈိဿန္တိ တဿ တတ္ထ ကုသလာ ဓမ္မာ န နိရုဇ္ဈိတ္ထာတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ တတ္ထ အကုသလာ ဓမ္မာ န နိရုဇ္ဈိဿန္တိ၊ နော စ တေသံ တတ္ထ ကုသလာ ဓမ္မာ န နိရုဇ္ဈိတ္ထ. အသညသတ္တာနံ တေသံ တတ္ထ အကုသလာ စ ဓမ္မာ န နိရုဇ္ဈိဿန္တိ ကုသလာ စ ဓမ္မာ န နိရုဇ္ဈိတ္ထ.
(က) ယဿ ယတ္ထ ကုသလာ ဓမ္မာ န နိရုဇ္ဈိတ္ထ တဿ တတ္ထ အဗျာကတာ ဓမ္မာ န နိရုဇ္ဈိဿန္တီတိ? နိရုဇ္ဈိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ န နိရုဇ္ဈိဿန္တိ တဿ တတ္ထ ကုသလာ ဓမ္မာ န နိရုဇ္ဈိတ္ထာတိ? နိရုဇ္ဈိတ္ထ.
၁၆၂. (က) ယဿ ယတ္ထ အကုသလာ ဓမ္မာ န နိရုဇ္ဈိတ္ထ တဿ တတ္ထ အဗျာကတာ ဓမ္မာ န နိရုဇ္ဈိဿန္တီတိ? နိရုဇ္ဈိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ န နိရုဇ္ဈိဿန္တိ တဿ တတ္ထ အကုသလာ ဓမ္မာ န နိရုဇ္ဈိတ္ထာတိ? နိရုဇ္ဈိတ္ထ.
နိရောဓဝါရော.