(၅) ပစ္စုပ္ပန္နာနာဂတဝါရော
(က) အနုလောမပုဂ္ဂလော
၇၉. (က) ယဿ ကုသလာ ဓမ္မာ ဥပ္ပဇ္ဇန္တိ တဿ အကုသလာ ဓမ္မာ ဥပ္ပဇ္ဇိဿန္တီတိ?
အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ ကုသလာ ဓမ္မာ ဥပ္ပဇ္ဇန္တိ၊ နော စ တေသံ အကုသလာ ဓမ္မာ ဥပ္ပဇ္ဇိဿန္တိ. ဣတရေသံ ကုသလာနံ ဥပ္ပါဒက္ခဏေ တေသံ ကုသလာ စ ဓမ္မာ ဥပ္ပဇ္ဇန္တိ အကုသလာ စ ဓမ္မာ ဥပ္ပဇ္ဇိဿန္တိ.
(ခ) ယဿ ဝါ ပန အကုသလာ ဓမ္မာ ဥပ္ပဇ္ဇိဿန္တိ တဿ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ အကုသလာ ဓမ္မာ ဥပ္ပဇ္ဇိဿန္တိ၊ နော စ တေသံ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ အကုသလာ စ ဓမ္မာ ဥပ္ပဇ္ဇိဿန္တိ ကုသလာ စ ဓမ္မာ ဥပ္ပဇ္ဇန္တိ.
(က) ယဿ ကုသလာ ဓမ္မာ ဥပ္ပဇ္ဇန္တိ တဿ အဗျာကတာ ဓမ္မာ ဥပ္ပဇ္ဇိဿန္တီတိ? အာမန္တာ.
(ခ) ယဿ ဝါ ပန အဗျာကတာ ဓမ္မာ ဥပ္ပဇ္ဇိဿန္တိ တဿ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ အဗျာကတာ ဓမ္မာ ဥပ္ပဇ္ဇိဿန္တိ၊ နော စ တေသံ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ အဗျာကတာ စ ဓမ္မာ ဥပ္ပဇ္ဇိဿန္တိ ကုသလာ စ ဓမ္မာ ဥပ္ပဇ္ဇန္တိ.
၈၀. (က) ယဿ အကုသလာ ဓမ္မာ ဥပ္ပဇ္ဇန္တိ တဿ အဗျာကတာ ဓမ္မာ ဥပ္ပဇ္ဇိဿန္တီတိ? အာမန္တာ.
(ခ) ယဿ ဝါ ပန အဗျာကတာ ဓမ္မာ ဥပ္ပဇ္ဇိဿန္တိ တဿ အကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ အကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ အဗျာကတာ ဓမ္မာ ဥပ္ပဇ္ဇိဿန္တိ၊ နော စ တေသံ အကုသလာ ဓမ္မာ ဥပ္ပဇ္ဇန္တိ. အကုသလာနံ ဥပ္ပါဒက္ခဏေ တေသံ အဗျာကတာ စ ဓမ္မာ ဥပ္ပဇ္ဇိဿန္တိ အကုသလာ စ ဓမ္မာ ဥပ္ပဇ္ဇန္တိ.
(ခ) အနုလောမဩကာသော
၈၁. ယတ္ထ ကုသလာ ဓမ္မာ ဥပ္ပဇ္ဇန္တိ တတ္ထ အကုသလာ ဓမ္မာ ဥပ္ပဇ္ဇိဿန္တီတိ?။ပေ။.
(ဂ) အနုလောမပုဂ္ဂလောကာသာ
၈၂. (က) ယဿ ယတ္ထ ကုသလာ ဓမ္မာ ဥပ္ပဇ္ဇန္တိ တဿ တတ္ထ အကုသလာ ဓမ္မာ ဥပ္ပဇ္ဇိဿန္တီတိ?
အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ တတ္ထ ကုသလာ ဓမ္မာ ဥပ္ပဇ္ဇန္တိ၊ နော စ တေသံ တတ္ထ အကုသလာ ဓမ္မာ ဥပ္ပဇ္ဇိဿန္တိ. ဣတရေသံ ကုသလာနံ ဥပ္ပါဒက္ခဏေ တေသံ တတ္ထ ကုသလာ စ ဓမ္မာ ဥပ္ပဇ္ဇန္တိ အကုသလာ စ ဓမ္မာ ဥပ္ပဇ္ဇိဿန္တိ.
(ခ) ယဿ ဝါ ပန ယတ္ထ အကုသလာ ဓမ္မာ ဥပ္ပဇ္ဇိဿန္တိ တဿ တတ္ထ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ တေသံ တတ္ထ အကုသလာ ဓမ္မာ ဥပ္ပဇ္ဇိဿန္တိ၊ နော စ တေသံ တတ္ထ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ တတ္ထ အကုသလာ စ ဓမ္မာ ဥပ္ပဇ္ဇိဿန္တိ ကုသလာ စ ဓမ္မာ ဥပ္ပဇ္ဇန္တိ.
(က) ယဿ ယတ္ထ ကုသလာ ဓမ္မာ ဥပ္ပဇ္ဇန္တိ တဿ တတ္ထ အဗျာကတာ ဓမ္မာ ဥပ္ပဇ္ဇိဿန္တီတိ? အာမန္တာ.
(ခ) ယဿ ဝါ ပန ယတ္ထ အဗျာကတာ ဓမ္မာ ဥပ္ပဇ္ဇိဿန္တိ တဿ တတ္ထ ကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ အဗျာကတာ ဓမ္မာ ဥပ္ပဇ္ဇိဿန္တိ၊ နော စ တေသံ တတ္ထ ကုသလာ ဓမ္မာ ဥပ္ပဇ္ဇန္တိ. ကုသလာနံ ဥပ္ပါဒက္ခဏေ တေသံ တတ္ထ အဗျာကတာ စ ဓမ္မာ ဥပ္ပဇ္ဇိဿန္တိ ကုသလာ စ ဓမ္မာ ဥပ္ပဇ္ဇန္တိ.
၈၃. (က) ယဿ ယတ္ထ အကုသလာ ဓမ္မာ ဥပ္ပဇ္ဇန္တိ တဿ တတ္ထ အဗျာကတာ ဓမ္မာ ဥပ္ပဇ္ဇိဿန္တီတိ? အာမန္တာ.
(ခ) ယဿ ဝါ ပန ယတ္ထ အဗျာကတာ ဓမ္မာ ဥပ္ပဇ္ဇိဿန္တိ တဿ တတ္ထ အကုသလာ ဓမ္မာ ဥပ္ပဇ္ဇန္တီတိ?
သဗ္ဗေသံ စိတ္တဿ ဘင်္ဂက္ခဏေ အကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ အဗျာကတာ ဓမ္မာ ဥပ္ပဇ္ဇိဿန္တိ၊ နော စ တေသံ တတ္ထ အကုသလာ ဓမ္မာ ဥပ္ပဇ္ဇန္တိ. အကုသလာနံ ဥပ္ပါဒက္ခဏေ တေသံ တတ္ထ အဗျာကတာ စ ဓမ္မာ ဥပ္ပဇ္ဇိဿန္တိ အကုသလာ စ ဓမ္မာ ဥပ္ပဇ္ဇန္တိ.
(ဃ) ပစ္စနီကပုဂ္ဂလော
၈၄. (က) ယဿ ကုသလာ ဓမ္မာ န ဥပ္ပဇ္ဇန္တိ တဿ အကုသလာ ဓမ္မာ န ဥပ္ပဇ္ဇိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ကုသလာ ဓမ္မာ န ဥပ္ပဇ္ဇန္တိ၊ နော စ တေသံ အကုသလာ ဓမ္မာ န ဥပ္ပဇ္ဇိဿန္တိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ တေသံ ကုသလာ စ ဓမ္မာ န ဥပ္ပဇ္ဇန္တိ အကုသလာ စ ဓမ္မာ န ဥပ္ပဇ္ဇိဿန္တိ.
(ခ) ယဿ ဝါ ပန အကုသလာ ဓမ္မာ န ဥပ္ပဇ္ဇိဿန္တိ တဿ ကုသလာ ဓမ္မာ န ဥပ္ပဇ္ဇန္တီတိ?
အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ အကုသလာ ဓမ္မာ န ဥပ္ပဇ္ဇိဿန္တိ၊ နော စ တေသံ ကုသလာ ဓမ္မာ န ဥပ္ပဇ္ဇန္တိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ တေသံ အကုသလာ စ ဓမ္မာ န ဥပ္ပဇ္ဇိဿန္တိ ကုသလာ စ ဓမ္မာ န ဥပ္ပဇ္ဇန္တိ.
(က) ယဿ ကုသလာ ဓမ္မာ န ဥပ္ပဇ္ဇန္တိ တဿ အဗျာကတာ ဓမ္မာ န ဥပ္ပဇ္ဇိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ကုသလာ ဓမ္မာ န ဥပ္ပဇ္ဇန္တိ၊ နော စ တေသံ အဗျာကတာ ဓမ္မာ န ဥပ္ပဇ္ဇိဿန္တိ. ပစ္ဆိမစိတ္တသမင်္ဂီနံ တေသံ ကုသလာ စ ဓမ္မာ န ဥပ္ပဇ္ဇန္တိ အဗျာကတာ စ ဓမ္မာ န ဥပ္ပဇ္ဇိဿန္တိ.
(ခ) ယဿ ဝါ ပန အဗျာကတာ ဓမ္မာ န ဥပ္ပဇ္ဇိဿန္တိ တဿ ကုသလာ ဓမ္မာ န ဥပ္ပဇ္ဇန္တီတိ? အာမန္တာ.
၈၅. (က) ယဿ အကုသလာ ဓမ္မာ န ဥပ္ပဇ္ဇန္တိ တဿ အဗျာကတာ ဓမ္မာ န ဥပ္ပဇ္ဇိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ အကုသလဝိပ္ပယုတ္တစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ အကုသလာ ဓမ္မာ န ဥပ္ပဇ္ဇန္တိ၊ နော စ တေသံ အဗျာကတာ ဓမ္မာ န ဥပ္ပဇ္ဇိဿန္တိ. ပစ္ဆိမစိတ္တသမင်္ဂီနံ တေသံ အကုသလာ စ ဓမ္မာ န ဥပ္ပဇ္ဇန္တိ အဗျာကတာ စ ဓမ္မာ န ဥပ္ပဇ္ဇိဿန္တိ.
(ခ) ယဿ ဝါ ပန အဗျာကတာ ဓမ္မာ န ဥပ္ပဇ္ဇိဿန္တိ တဿ အကုသလာ ဓမ္မာ န ဥပ္ပဇ္ဇန္တီတိ? အာမန္တာ.
(င) ပစ္စနီကဩကာသော
၈၆. ယတ္ထ ကုသလာ ဓမ္မာ န ဥပ္ပဇ္ဇန္တိ တတ္ထ အကုသလာ ဓမ္မာ န ဥပ္ပဇ္ဇိဿန္တီတိ?။ပေ။.
(စ) ပစ္စနီကပုဂ္ဂလောကာသာ
၈၇. (က) ယဿ ယတ္ထ ကုသလာ ဓမ္မာ န ဥပ္ပဇ္ဇန္တိ တဿ တတ္ထ အကုသလာ ဓမ္မာ န ဥပ္ပဇ္ဇိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ တေသံ တတ္ထ ကုသလာ ဓမ္မာ န ဥပ္ပဇ္ဇန္တိ၊ နော စ တေသံ တတ္ထ အကုသလာ ဓမ္မာ န ဥပ္ပဇ္ဇိဿန္တိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ကုသလာ စ ဓမ္မာ န ဥပ္ပဇ္ဇန္တိ အကုသလာ စ ဓမ္မာ န ဥပ္ပဇ္ဇိဿန္တိ.
(ခ) ယဿ ဝါ ပန ယတ္ထ အကုသလာ ဓမ္မာ န ဥပ္ပဇ္ဇိဿန္တိ တဿ တတ္ထ ကုသလာ ဓမ္မာ န ဥပ္ပဇ္ဇန္တီတိ?
အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ တေသံ တတ္ထ အကုသလာ ဓမ္မာ န ဥပ္ပဇ္ဇိဿန္တိ၊ နော စ တေသံ တတ္ထ ကုသလာ ဓမ္မာ န ဥပ္ပဇ္ဇန္တိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အသညသတ္တာနံ တေသံ တတ္ထ အကုသလာ စ ဓမ္မာ န ဥပ္ပဇ္ဇိဿန္တိ ကုသလာ စ ဓမ္မာ န ဥပ္ပဇ္ဇန္တိ.
(က) ယဿ ယတ္ထ ကုသလာ ဓမ္မာ န ဥပ္ပဇ္ဇန္တိ တဿ တတ္ထ အဗျာကတာ ဓမ္မာ န ဥပ္ပဇ္ဇိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ ကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ ကုသလာ ဓမ္မာ န ဥပ္ပဇ္ဇန္တိ၊ နော စ တေသံ တတ္ထ အဗျာကတာ ဓမ္မာ န ဥပ္ပဇ္ဇိဿန္တိ. ပစ္ဆိမစိတ္တသမင်္ဂီနံ တေသံ တတ္ထ ကုသလာ စ ဓမ္မာ န ဥပ္ပဇ္ဇန္တိ အဗျာကတာ စ ဓမ္မာ န ဥပ္ပဇ္ဇိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ န ဥပ္ပဇ္ဇိဿန္တိ တဿ တတ္ထ ကုသလာ ဓမ္မာ န ဥပ္ပဇ္ဇန္တီတိ? အာမန္တာ.
၈၈. (က) ယဿ ယတ္ထ အကုသလာ ဓမ္မာ န ဥပ္ပဇ္ဇန္တိ တဿ တတ္ထ အဗျာကတာ ဓမ္မာ န ဥပ္ပဇ္ဇိဿန္တီတိ?
သဗ္ဗေသံ စိတ္တဿ ဘင်္ဂက္ခဏေ အကုသလဝိပ္ပယုတ္တစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ အကုသလာ ဓမ္မာ န ဥပ္ပဇ္ဇန္တိ၊ နော စ တေသံ တတ္ထ အဗျာကတာ ဓမ္မာ န ဥပ္ပဇ္ဇိဿန္တိ. ပစ္ဆိမစိတ္တသမင်္ဂီနံ တေသံ တတ္ထ အကုသလာ စ ဓမ္မာ န ဥပ္ပဇ္ဇန္တိ အဗျာကတာ စ ဓမ္မာ န ဥပ္ပဇ္ဇိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ န ဥပ္ပဇ္ဇိဿန္တိ တဿ တတ္ထ အကုသလာ ဓမ္မာ န ဥပ္ပဇ္ဇန္တီတိ? အာမန္တာ.