(၆) အတီတာနာဂတဝါရော
(က) အနုလောမပုဂ္ဂလော
၈၉. (က) ယဿ ကုသလာ ဓမ္မာ ဥပ္ပဇ္ဇိတ္ထ တဿ အကုသလာ ဓမ္မာ ဥပ္ပဇ္ဇိဿန္တီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ ကုသလာ ဓမ္မာ ဥပ္ပဇ္ဇိတ္ထ၊ နော စ တေသံ အကုသလာ ဓမ္မာ ဥပ္ပဇ္ဇိဿန္တိ. ဣတရေသံ တေသံ ကုသလာ စ ဓမ္မာ ဥပ္ပဇ္ဇိတ္ထ အကုသလာ စ ဓမ္မာ ဥပ္ပဇ္ဇိဿန္တိ.
(ခ) ယဿ ဝါ ပန အကုသလာ ဓမ္မာ ဥပ္ပဇ္ဇိဿန္တိ တဿ ကုသလာ ဓမ္မာ ဥပ္ပဇ္ဇိတ္ထာတိ? အာမန္တာ.
(က) ယဿ ကုသလာ ဓမ္မာ ဥပ္ပဇ္ဇိတ္ထ တဿ အဗျာကတာ ဓမ္မာ ဥပ္ပဇ္ဇိဿန္တီတိ?
ပစ္ဆိမစိတ္တသမင်္ဂီနံ တေသံ ကုသလာ ဓမ္မာ ဥပ္ပဇ္ဇိတ္ထ၊ နော စ တေသံ အဗျာကတာ ဓမ္မာ ဥပ္ပဇ္ဇိဿန္တိ. ဣတရေသံ တေသံ ကုသလာ စ ဓမ္မာ ဥပ္ပဇ္ဇိတ္ထ အဗျာကတာ စ ဓမ္မာ ဥပ္ပဇ္ဇိဿန္တိ.
(ခ) ယဿ ဝါ ပန အဗျာကတာ ဓမ္မာ ဥပ္ပဇ္ဇိဿန္တိ တဿ ကုသလာ ဓမ္မာ ဥပ္ပဇ္ဇိတ္ထာတိ? အာမန္တာ.
၉၀. (က) ယဿ အကုသလာ ဓမ္မာ ဥပ္ပဇ္ဇိတ္ထ တဿ အဗျာကတာ ဓမ္မာ ဥပ္ပဇ္ဇိဿန္တီတိ?
ပစ္ဆိမစိတ္တသမင်္ဂီနံ တေသံ အကုသလာ ဓမ္မာ ဥပ္ပဇ္ဇိတ္ထ၊ နော စ တေသံ အဗျာကတာ ဓမ္မာ ဥပ္ပဇ္ဇိဿန္တိ. ဣတရေသံ တေသံ အကုသလာ စ ဓမ္မာ ဥပ္ပဇ္ဇိတ္ထ အဗျာကတာ စ ဓမ္မာ ဥပ္ပဇ္ဇိဿန္တိ.
(ခ) ယဿ ဝါ ပန အဗျာကတာ ဓမ္မာ ဥပ္ပဇ္ဇိဿန္တိ တဿ အကုသလာ ဓမ္မာ ဥပ္ပဇ္ဇိတ္ထာတိ? အာမန္တာ.
(ခ) အနုလောမဩကာသော
၉၁. ယတ္ထ ကုသလာ ဓမ္မာ ဥပ္ပဇ္ဇိတ္ထ တတ္ထ အကုသလာ ဓမ္မာ ဥပ္ပဇ္ဇိဿန္တီတိ?။ပေ။.
(ဂ) အနုလောမပုဂ္ဂလောကာသာ
၉၂. (က) ယဿ ယတ္ထ ကုသလာ ဓမ္မာ ဥပ္ပဇ္ဇိတ္ထ တဿ တတ္ထ အကုသလာ ဓမ္မာ ဥပ္ပဇ္ဇိဿန္တီတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ တတ္ထ ကုသလာ ဓမ္မာ ဥပ္ပဇ္ဇိတ္ထ၊ နော စ တေသံ တတ္ထ အကုသလာ ဓမ္မာ ဥပ္ပဇ္ဇိဿန္တိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ကုသလာ စ ဓမ္မာ ဥပ္ပဇ္ဇိတ္ထ အကုသလာ စ ဓမ္မာ ဥပ္ပဇ္ဇိဿန္တိ.
(ခ) ယဿ ဝါ ပန ယတ္ထ အကုသလာ ဓမ္မာ ဥပ္ပဇ္ဇိဿန္တိ တဿ တတ္ထ ကုသလာ ဓမ္မာ ဥပ္ပဇ္ဇိတ္ထာတိ?
သုဒ္ဓါဝါသာနံ ဒုတိယေ စိတ္တေ ဝတ္တမာနေ တေသံ တတ္ထ အကုသလာ ဓမ္မာ ဥပ္ပဇ္ဇိဿန္တိ၊ နော စ တေသံ တတ္ထ ကုသလာ ဓမ္မာ ဥပ္ပဇ္ဇိတ္ထ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ အကုသလာ စ ဓမ္မာ ဥပ္ပဇ္ဇိဿန္တိ ကုသလာ စ ဓမ္မာ ဥပ္ပဇ္ဇိတ္ထ.
(က) ယဿ ယတ္ထ ကုသလာ ဓမ္မာ ဥပ္ပဇ္ဇိတ္ထ တဿ တတ္ထ အဗျာကတာ ဓမ္မာ ဥပ္ပဇ္ဇိဿန္တီတိ?
ပစ္ဆိမစိတ္တသမင်္ဂီနံ တေသံ တတ္ထ ကုသလာ ဓမ္မာ ဥပ္ပဇ္ဇိတ္ထ၊ နော စ တေသံ တတ္ထ အဗျာကတာ ဓမ္မာ ဥပ္ပဇ္ဇိဿန္တိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ ကုသလာ စ ဓမ္မာ ဥပ္ပဇ္ဇိတ္ထ အဗျာကတာ စ ဓမ္မာ ဥပ္ပဇ္ဇိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ ဥပ္ပဇ္ဇိဿန္တိ တဿ တတ္ထ ကုသလာ ဓမ္မာ ဥပ္ပဇ္ဇိတ္ထာတိ?
သုဒ္ဓါဝါသာနံ ဒုတိယေ စိတ္တေ ဝတ္တမာနေ အသညသတ္တာနံ တေသံ တတ္ထ အဗျာကတာ ဓမ္မာ ဥပ္ပဇ္ဇိဿန္တိ၊ နော စ တေသံ တတ္ထ ကုသလာ ဓမ္မာ ဥပ္ပဇ္ဇိတ္ထ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ အဗျာကတာ စ ဓမ္မာ ဥပ္ပဇ္ဇိဿန္တိ ကုသလာ စ ဓမ္မာ ဥပ္ပဇ္ဇိတ္ထ.
၉၃. (က) ယဿ ယတ္ထ အကုသလာ ဓမ္မာ ဥပ္ပဇ္ဇိတ္ထ တဿ တတ္ထ အဗျာကတာ ဓမ္မာ ဥပ္ပဇ္ဇိဿန္တီတိ?
ပစ္ဆိမစိတ္တသမင်္ဂီနံ တေသံ တတ္ထ အကုသလာ ဓမ္မာ ဥပ္ပဇ္ဇိတ္ထ၊ နော စ တေသံ တတ္ထ အဗျာကတာ ဓမ္မာ ဥပ္ပဇ္ဇိဿန္တိ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ အကုသလာ စ ဓမ္မာ ဥပ္ပဇ္ဇိတ္ထ အဗျာကတာ စ ဓမ္မာ ဥပ္ပဇ္ဇိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ ဥပ္ပဇ္ဇိဿန္တိ တဿ တတ္ထ အကုသလာ ဓမ္မာ ဥပ္ပဇ္ဇိတ္ထာတိ?
သုဒ္ဓါဝါသာနံ ဒုတိယေ စိတ္တေ ဝတ္တမာနေ အသညသတ္တာနံ တေသံ တတ္ထ အဗျာကတာ ဓမ္မာ ဥပ္ပဇ္ဇိဿန္တိ၊ နော စ တေသံ တတ္ထ အကုသလာ ဓမ္မာ ဥပ္ပဇ္ဇိတ္ထ. ဣတရေသံ စတုဝေါကာရာနံ ပဉ္စဝေါကာရာနံ တေသံ တတ္ထ အဗျာကတာ စ ဓမ္မာ ဥပ္ပဇ္ဇိဿန္တိ အကုသလာ စ ဓမ္မာ ဥပ္ပဇ္ဇိတ္ထ.
(ဃ) ပစ္စနီကပုဂ္ဂလော
၉၄. (က) ယဿ ကုသလာ ဓမ္မာ န ဥပ္ပဇ္ဇိတ္ထ တဿ အကုသလာ ဓမ္မာ န ဥပ္ပဇ္ဇိဿန္တီတိ? နတ္ထိ.
(ခ) ယဿ ဝါ ပန အကုသလာ ဓမ္မာ န ဥပ္ပဇ္ဇိဿန္တိ တဿ ကုသလာ ဓမ္မာ န ဥပ္ပဇ္ဇိတ္ထာတိ? ဥပ္ပဇ္ဇိတ္ထ.
(က) ယဿ ကုသလာ ဓမ္မာ န ဥပ္ပဇ္ဇိတ္ထ တဿ အဗျာကတာ ဓမ္မာ န ဥပ္ပဇ္ဇိဿန္တီတိ? နတ္ထိ.
(ခ) ယဿ ဝါ ပန အဗျာကတာ ဓမ္မာ န ဥပ္ပဇ္ဇိဿန္တိ တဿ ကုသလာ ဓမ္မာ န ဥပ္ပဇ္ဇိတ္ထာတိ? ဥပ္ပဇ္ဇိတ္ထ.
၉၅. (က) ယဿ အကုသလာ ဓမ္မာ န ဥပ္ပဇ္ဇိတ္ထ တဿ အဗျာကတာ ဓမ္မာ န ဥပ္ပဇ္ဇိဿန္တီတိ? နတ္ထိ.
(ခ) ယဿ ဝါ ပန အဗျာကတာ ဓမ္မာ န ဥပ္ပဇ္ဇိဿန္တိ တဿ အကုသလာ ဓမ္မာ န ဥပ္ပဇ္ဇိတ္ထာတိ? ဥပ္ပဇ္ဇိတ္ထ.
(င) ပစ္စနီကဩကာသော
၉၆. ယတ္ထ ကုသလာ ဓမ္မာ န ဥပ္ပဇ္ဇိတ္ထ တတ္ထ အကုသလာ ဓမ္မာ န ဥပ္ပဇ္ဇိဿန္တီတိ?။ပေ။.
(စ) ပစ္စနီကပုဂ္ဂလောကာသာ
၉၇. (က) ယဿ ယတ္ထ ကုသလာ ဓမ္မာ န ဥပ္ပဇ္ဇိတ္ထ တဿ တတ္ထ အကုသလာ ဓမ္မာ န ဥပ္ပဇ္ဇိဿန္တီတိ?
သုဒ္ဓါဝါသာနံ ဒုတိယေ စိတ္တေ ဝတ္တမာနေ တေသံ တတ္ထ ကုသလာ ဓမ္မာ န ဥပ္ပဇ္ဇိတ္ထ၊ နော စ တေသံ တတ္ထ အကုသလာ ဓမ္မာ န ဥပ္ပဇ္ဇိဿန္တိ. အသညသတ္တာနံ တေသံ တတ္ထ ကုသလာ စ ဓမ္မာ န ဥပ္ပဇ္ဇိတ္ထ အကုသလာ စ ဓမ္မာ န ဥပ္ပဇ္ဇိဿန္တိ.
(ခ) ယဿ ဝါ ပန ယတ္ထ အကုသလာ ဓမ္မာ န ဥပ္ပဇ္ဇိဿန္တိ တဿ တတ္ထ ကုသလာ ဓမ္မာ န ဥပ္ပဇ္ဇိတ္ထာတိ?
အဂ္ဂမဂ္ဂသမင်္ဂီနံ အရဟန္တာနံ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တေသံ တတ္ထ အကုသလာ ဓမ္မာ န ဥပ္ပဇ္ဇိဿန္တိ၊ နော စ တေသံ တတ္ထ ကုသလာ ဓမ္မာ န ဥပ္ပဇ္ဇိတ္ထ. အသညသတ္တာနံ တေသံ တတ္ထ အကုသလာ စ ဓမ္မာ န ဥပ္ပဇ္ဇိဿန္တိ ကုသလာ စ ဓမ္မာ န ဥပ္ပဇ္ဇိတ္ထ.
(က) ယဿ ယတ္ထ ကုသလာ ဓမ္မာ န ဥပ္ပဇ္ဇိတ္ထ တဿ တတ္ထ အဗျာကတာ ဓမ္မာ န ဥပ္ပဇ္ဇိဿန္တီတိ? ဥပ္ပဇ္ဇိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ န ဥပ္ပဇ္ဇိဿန္တိ တဿ တတ္ထ ကုသလာ ဓမ္မာ န ဥပ္ပဇ္ဇိတ္ထာတိ? ဥပ္ပဇ္ဇိတ္ထ.
၉၈. (က) ယဿ ယတ္ထ အကုသလာ ဓမ္မာ န ဥပ္ပဇ္ဇိတ္ထ တဿ တတ္ထ အဗျာကတာ ဓမ္မာ န ဥပ္ပဇ္ဇိဿန္တီတိ? ဥပ္ပဇ္ဇိဿန္တိ.
(ခ) ယဿ ဝါ ပန ယတ္ထ အဗျာကတာ ဓမ္မာ န ဥပ္ပဇ္ဇိဿန္တိ တဿ တတ္ထ အကုသလာ ဓမ္မာ န ဥပ္ပဇ္ဇိတ္ထာတိ? ဥပ္ပဇ္ဇိတ္ထ.
ဥပ္ပါဒဝါရော.