(၄) ဥပ္ပါဒဝါရော

၆၆. (က) ယဿ စိတ္တံ ဥပ္ပဇ္ဇတိ တဿ စိတ္တံ ဥပ္ပဇ္ဇိတ္ထာတိ? အာမန္တာ.

(ခ) ယဿ ဝါ ပန စိတ္တံ ဥပ္ပဇ္ဇိတ္ထ တဿ စိတ္တံ ဥပ္ပဇ္ဇတီတိ?

စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ စိတ္တံ ဥပ္ပဇ္ဇိတ္ထ၊ နော စ တေသံ စိတ္တံ ဥပ္ပဇ္ဇတိ. စိတ္တဿ ဥပ္ပါဒက္ခဏေ တေသံ စိတ္တံ ဥပ္ပဇ္ဇိတ္ထ စေဝ ဥပ္ပဇ္ဇတိ စ.

(က) ယဿ စိတ္တံ န ဥပ္ပဇ္ဇတိ တဿ စိတ္တံ န ဥပ္ပဇ္ဇိတ္ထာတိ? ဥပ္ပဇ္ဇိတ္ထ.

(ခ) ယဿ ဝါ ပန စိတ္တံ န ဥပ္ပဇ္ဇိတ္ထ တဿ စိတ္တံ န ဥပ္ပဇ္ဇတီတိ? နတ္ထိ.

၆၇. (က) ယဿ စိတ္တံ ဥပ္ပဇ္ဇတိ တဿ စိတ္တံ ဥပ္ပဇ္ဇိဿတီတိ?

ပစ္ဆိမစိတ္တဿ ဥပ္ပါဒက္ခဏေ တေသံ စိတ္တံ ဥပ္ပဇ္ဇတိ၊ နော စ တေသံ စိတ္တံ ဥပ္ပဇ္ဇိဿတိ. ဣတရေသံ စိတ္တဿ ဥပ္ပါဒက္ခဏေ တေသံ စိတ္တံ ဥပ္ပဇ္ဇတိ စေဝ ဥပ္ပဇ္ဇိဿတိ စ.

(ခ) ယဿ ဝါ ပန စိတ္တံ ဥပ္ပဇ္ဇိဿတိ တဿ စိတ္တံ ဥပ္ပဇ္ဇတီတိ?

စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ စိတ္တံ ဥပ္ပဇ္ဇိဿတိ၊ နော စ တေသံ စိတ္တံ ဥပ္ပဇ္ဇတိ. စိတ္တဿ ဥပ္ပါဒက္ခဏေ တေသံ စိတ္တံ ဥပ္ပဇ္ဇိဿတိ စေဝ ဥပ္ပဇ္ဇတိ စ.

(က) ယဿ စိတ္တံ န ဥပ္ပဇ္ဇတိ တဿ စိတ္တံ န ဥပ္ပဇ္ဇိဿတီတိ?

စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ စိတ္တံ န ဥပ္ပဇ္ဇတိ၊ နော စ တေသံ စိတ္တံ န ဥပ္ပဇ္ဇိဿတိ. ပစ္ဆိမစိတ္တဿ ဘင်္ဂက္ခဏေ တေသံ စိတ္တံ န စေဝ ဥပ္ပဇ္ဇတိ န စ ဥပ္ပဇ္ဇိဿတိ.

(ခ) ယဿ ဝါ ပန စိတ္တံ န ဥပ္ပဇ္ဇိဿတိ တဿ စိတ္တံ န ဥပ္ပဇ္ဇတီတိ?

ပစ္ဆိမစိတ္တဿ ဥပ္ပါဒက္ခဏေ တေသံ စိတ္တံ န ဥပ္ပဇ္ဇိဿတိ၊ နော စ တေသံ စိတ္တံ န ဥပ္ပဇ္ဇတိ. ပစ္ဆိမစိတ္တဿ ဘင်္ဂက္ခဏေ တေသံ စိတ္တံ န စေဝ ဥပ္ပဇ္ဇိဿတိ န စ ဥပ္ပဇ္ဇတိ.

၆၈. (က) ယဿ စိတ္တံ ဥပ္ပဇ္ဇိတ္ထ တဿ စိတ္တံ ဥပ္ပဇ္ဇိဿတီတိ?

ပစ္ဆိမစိတ္တသမင်္ဂီနံ တေသံ စိတ္တံ ဥပ္ပဇ္ဇိတ္ထ၊ နော စ တေသံ စိတ္တံ ဥပ္ပဇ္ဇိဿတိ. ဣတရေသံ တေသံ စိတ္တံ ဥပ္ပဇ္ဇိတ္ထ စေဝ ဥပ္ပဇ္ဇိဿတိ စ.

(ခ) ယဿ ဝါ ပန စိတ္တံ ဥပ္ပဇ္ဇိဿတိ တဿ စိတ္တံ ဥပ္ပဇ္ဇိတ္ထာတိ? အာမန္တာ.

(က) ယဿ စိတ္တံ န ဥပ္ပဇ္ဇိတ္ထ တဿ စိတ္တံ န ဥပ္ပဇ္ဇိဿတီတိ? နတ္ထိ.

(ခ) ယဿ ဝါ ပန စိတ္တံ န ဥပ္ပဇ္ဇိဿတိ တဿ စိတ္တံ န ဥပ္ပဇ္ဇိတ္ထာတိ? ဥပ္ပဇ္ဇိတ္ထ.