(၁၃) နိရုဒ္ဓနိရုဇ္ဈမာနဝါရော

၈၂. (က) နိရုဒ္ဓံ နိရုဇ္ဈမာနန္တိ? နော.

(ခ) နိရုဇ္ဈမာနံ နိရုဒ္ဓန္တိ? နော.

(က) န နိရုဒ္ဓံ န နိရုဇ္ဈမာနန္တိ?

ဘင်္ဂက္ခဏေ န နိရုဒ္ဓံ၊ နော စ န နိရုဇ္ဈမာနံ. ဥပ္ပါဒက္ခဏေ အနာဂတဉ္စ စိတ္တံ န စေဝ နိရုဒ္ဓံ န စ နိရုဇ္ဈမာနံ.

(ခ) န နိရုဇ္ဈမာနံ န နိရုဒ္ဓန္တိ?

အတီတံ စိတ္တံ န နိရုဇ္ဈမာနံ၊ နော စ န နိရုဒ္ဓံ. ဥပ္ပါဒက္ခဏေ အနာဂတဉ္စ စိတ္တံ န စေဝ နိရုဇ္ဈမာနံ န စ နိရုဒ္ဓံ.

(၁၄) အတိက္ကန္တကာလဝါရော

၈၃. (က) ယဿ စိတ္တံ ဥပ္ပဇ္ဇမာနံ ခဏံ ခဏံ ဝီတိက္ကန္တံ အတိက္ကန္တကာလံ၊ နိရုဇ္ဈမာနံ ခဏံ ခဏံ ဝီတိက္ကန္တံ အတိက္ကန္တကာလံ တဿ စိတ္တန္တိ?

ဘင်္ဂက္ခဏေ စိတ္တံ ဥပ္ပါဒက္ခဏံ ဝီတက္ကန္တံ ဘင်္ဂက္ခဏံ အဝီတိက္ကန္တံ၊ အတီတံ စိတ္တံ ဥပ္ပါဒက္ခဏဉ္စ ဝီတိက္ကန္တံ ဘင်္ဂက္ခဏဉ္စ ဝီတိက္ကန္တံ.

(ခ) ယဿ ဝါ ပန စိတ္တံ နိရုဇ္ဈမာနံ ခဏံ ခဏံ ဝီတိက္ကန္တံ အတိက္ကန္တကာလံ၊ ဥပ္ပဇ္ဇမာနံ ခဏံ ခဏံ ဝီတိက္ကန္တံ အတိက္ကန္တကာလံ တဿ စိတ္တန္တိ?

အတီတံ စိတ္တံ.

(က) ယဿ စိတ္တံ န ဥပ္ပဇ္ဇမာနံ ခဏံ ခဏံ ဝီတိက္ကန္တံ အတိက္ကန္တကာလံ၊ န နိရုဇ္ဈမာနံ ခဏံ ခဏံ ဝီတိက္ကန္တံ အတိက္ကန္တကာလံ တဿ စိတ္တန္တိ?

ဥပ္ပါဒက္ခဏေ အနာဂတံ စိတ္တံ.

(ခ) ယဿ ဝါ ပန စိတ္တံ န နိရုဇ္ဈမာနံ ခဏံ ခဏံ ဝီတိက္ကန္တံ အတိက္ကန္တကာလံ၊ န ဥပ္ပဇ္ဇမာနံ ခဏံ ခဏံ ဝီတိက္ကန္တံ အတိက္ကန္တကာလံ တဿ စိတ္တန္တိ?

ဘင်္ဂက္ခဏေ စိတ္တံ ဘင်္ဂက္ခဏံ အဝီတိက္ကန္တံ နော စ ဥပ္ပါဒက္ခဏံ အဝီတိက္ကန္တံ၊ ဥပ္ပါဒက္ခဏေ အနာဂတဉ္စ စိတ္တံ ဘင်္ဂက္ခဏဉ္စ အဝီတိက္ကန္တံ ဥပ္ပါဒက္ခဏဉ္စ အဝီတိက္ကန္တံ.