(၁၀) ဥပ္ပန္နုပ္ပါဒဝါရော

၉၉. (က) ယံ စိတ္တံ ဥပ္ပန္နံ တံ စိတ္တံ ဥပ္ပဇ္ဇိတ္ထာတိ? နော.

(ခ) ယံ ဝါ ပန စိတ္တံ ဥပ္ပဇ္ဇိတ္ထ တံ စိတ္တံ ဥပ္ပန္နန္တိ? နော.

(က) ယံ စိတ္တံ န ဥပ္ပန္နံ တံ စိတ္တံ န ဥပ္ပဇ္ဇိတ္ထာတိ?

အတီတံ စိတ္တံ န ဥပ္ပန္နံ၊ နော စ တံ စိတ္တံ န ဥပ္ပဇ္ဇိတ္ထ. အနာဂတံ စိတ္တံ န စေဝ ဥပ္ပန္နံ န စ ဥပ္ပဇ္ဇိတ္ထ.

(ခ) ယံ ဝါ ပန စိတ္တံ န ဥပ္ပဇ္ဇိတ္ထ တံ စိတ္တံ န ဥပ္ပန္နန္တိ?

ပစ္စုပ္ပန္နံ စိတ္တံ န ဥပ္ပဇ္ဇိတ္ထ၊ နော စ တံ စိတ္တံ န ဥပ္ပန္နံ. အနာဂတံ စိတ္တံ န စေဝ ဥပ္ပဇ္ဇိတ္ထ န စ ဥပ္ပန္နံ.

၁၀၀. (က) ယံ စိတ္တံ ဥပ္ပန္နံ တံ စိတ္တံ ဥပ္ပဇ္ဇိဿတီတိ? နော.

(ခ) ယံ ဝါ ပန စိတ္တံ ဥပ္ပဇ္ဇိဿတိ တံ စိတ္တံ ဥပ္ပန္နန္တိ? နော.

(က) ယံ စိတ္တံ န ဥပ္ပန္နံ တံ စိတ္တံ န ဥပ္ပဇ္ဇိဿတီတိ?

အနာဂတံ စိတ္တံ န ဥပ္ပန္နံ၊ နော စ တံ စိတ္တံ န ဥပ္ပဇ္ဇိဿတိ. အတီတံ စိတ္တံ န စေဝ ဥပ္ပန္နံ န စ ဥပ္ပဇ္ဇိဿတိ.

(ခ) ယံ ဝါ ပန စိတ္တံ န ဥပ္ပဇ္ဇိဿတိ တံ စိတ္တံ န ဥပ္ပန္နန္တိ?

ပစ္စုပ္ပန္နံ စိတ္တံ န ဥပ္ပဇ္ဇိဿတိ၊ နော စ တံ စိတ္တံ န ဥပ္ပန္နံ. အတီတံ စိတ္တံ န စေဝ ဥပ္ပဇ္ဇိဿတိ န စ ဥပ္ပန္နံ.