၆. ဥပ္ပဇ္ဇနဝါရော

၃၃၀. (က) ယဿ ကာမရာဂါနုသယော ဥပ္ပဇ္ဇတိ တဿ ပဋိဃာနုသယော ဥပ္ပဇ္ဇတီတိ? အာမန္တာ.

(ခ) ယဿ ဝါ ပန ပဋိဃာနုသယော ဥပ္ပဇ္ဇတိ တဿ ကာမရာဂါနုသယော ဥပ္ပဇ္ဇတီတိ? အာမန္တာ.

(က) ယဿ ကာမရာဂါနုသယော ဥပ္ပဇ္ဇတိ တဿ မာနာနုသယော ဥပ္ပဇ္ဇတီတိ? အာမန္တာ.

(ခ) ယဿ ဝါ ပန မာနာနုသယော ဥပ္ပဇ္ဇတိ တဿ ကာမရာဂါနုသယော ဥပ္ပဇ္ဇတီတိ?

အနာဂါမိဿ မာနာနုသယော ဥပ္ပဇ္ဇတိ၊ နော စ တဿ ကာမရာဂါနုသယော ဥပ္ပဇ္ဇတိ. တိဏ္ဏံ ပုဂ္ဂလာနံ မာနာနုသယော စ ဥပ္ပဇ္ဇတိ ကာမရာဂါနုသယော စ ဥပ္ပဇ္ဇတိ (ဝိတ္ထာရေတဗ္ဗံ).

၃၃၁. (က) ယဿ ကာမရာဂါနုသယော နုပ္ပဇ္ဇတိ တဿ ပဋိဃာနုသယော နုပ္ပဇ္ဇတီတိ? အာမန္တာ.

(ခ) ယဿ ဝါ ပန ပဋိဃာနုသယော နုပ္ပဇ္ဇတိ တဿ ကာမရာဂါနုသယော နုပ္ပဇ္ဇတီတိ? အာမန္တာ.

(က) ယဿ ကာမရာဂါနုသယော နုပ္ပဇ္ဇတိ တဿ မာနာနုသယော နုပ္ပဇ္ဇတီတိ?

အနာဂါမိဿ ကာမရာဂါနုသယော နုပ္ပဇ္ဇတိ၊ နော စ တဿ မာနာနုသယော နုပ္ပဇ္ဇတိ. အရဟတော ကာမရာဂါနုသယော စ နုပ္ပဇ္ဇတိ မာနာနုသယော စ နုပ္ပဇ္ဇတိ.

(ခ) ယဿ ဝါ ပန မာနာနုသယော နုပ္ပဇ္ဇတိ တဿ ကာမရာဂါနုသယော နုပ္ပဇ္ဇတီတိ? အာမန္တာ. (ဝိတ္ထာရေတဗ္ဗံ).

ဥပ္ပဇ္ဇနဝါရော.