၁. ဥပ္ပတ္တိဋ္ဌာနဝါရော

၂. ကတ္ထ ကာမရာဂါနုသယော အနုသေတိ? ကာမဓာတုယာ ဒွီသု ဝေဒနာသု ဧတ္ထ ကာမရာဂါနုသယော အနုသေတိ.

ကတ္ထ ပဋိဃာနုသယော အနုသေတိ? ဒုက္ခာယ ဝေဒနာယ ဧတ္ထ ပဋိဃာနုသယော အနုသေတိ.

ကတ္ထ မာနာနုသယော အနုသေတိ? ကာမဓာတုယာ ဒွီသု ဝေဒနာသု ရူပဓာတုယာ အရူပဓာတုယာ ဧတ္ထ မာနာနုသယော အနုသေတိ.

ကတ္ထ ဒိဋ္ဌာနုသယော အနုသေတိ? သဗ္ဗသက္ကာယပရိယာပန္နေသု ဓမ္မေသု ဧတ္ထ ဒိဋ္ဌာနုသယော အနုသေတိ.

ကတ္ထ ဝိစိကိစ္ဆာနုသယော အနုသေတိ? သဗ္ဗသက္ကာယပရိယာပန္နေသု ဓမ္မေသု ဧတ္ထ ဝိစိကိစ္ဆာနုသယော အနုသေတိ.

ကတ္ထ ဘဝရာဂါနုသယော အနုသေတိ? ရူပဓာတုယာ အရူပဓာတုယာ ဧတ္ထ ဘဝရာဂါနုသယော အနုသေတိ.

ကတ္ထ အဝိဇ္ဇာနုသယော အနုသေတိ? သဗ္ဗသက္ကာယပရိယာပန္နေသု ဓမ္မေသု ဧတ္ထ အဝိဇ္ဇာနုသယော အနုသေတိ.

ဥပ္ပတ္တိဋ္ဌာနဝါရော.