(၁) ပစ္စုပ္ပန္နဝါရော
(က) အနုလောမပုဂ္ဂလော
၁၉. (က) ယဿ ကာယသင်္ခါရော ဥပ္ပဇ္ဇတိ တဿ ဝစီသင်္ခါရော ဥပ္ပဇ္ဇတီတိ?
ဝိနာ ဝိတက္ကဝိစာရေဟိ အဿာသပဿာသာနံ ဥပ္ပါဒက္ခဏေ တေသံ ကာယသင်္ခါရော ဥပ္ပဇ္ဇတိ၊ နော စ တေသံ ဝစီသင်္ခါရော ဥပ္ပဇ္ဇတိ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဥပ္ပါဒက္ခဏေ တေသံ ကာယသင်္ခါရော စ ဥပ္ပဇ္ဇတိ ဝစီသင်္ခါရော စ ဥပ္ပဇ္ဇတိ.
(ခ) ယဿ ဝါ ပန ဝစီသင်္ခါရော ဥပ္ပဇ္ဇတိ တဿ ကာယသင်္ခါရော ဥပ္ပဇ္ဇတီတိ?
ဝိနာ အဿာသပဿာသေဟိ ဝိတက္ကဝိစာရာနံ ဥပ္ပါဒက္ခဏေ တေသံ ဝစီသင်္ခါရော ဥပ္ပဇ္ဇတိ၊ နော စ တေသံ ကာယသင်္ခါရော ဥပ္ပဇ္ဇတိ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဥပ္ပါဒက္ခဏေ တေသံ ဝစီသင်္ခါရော စ ဥပ္ပဇ္ဇတိ ကာယသင်္ခါရော စ ဥပ္ပဇ္ဇတိ.
(က) ယဿ ကာယသင်္ခါရော ဥပ္ပဇ္ဇတိ တဿ စိတ္တသင်္ခါရော ဥပ္ပဇ္ဇတီတိ? အာမန္တာ.
(ခ) ယဿ ဝါ ပန စိတ္တသင်္ခါရော ဥပ္ပဇ္ဇတိ တဿ ကာယသင်္ခါရော ဥပ္ပဇ္ဇတီတိ?
ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ တေသံ စိတ္တသင်္ခါရော ဥပ္ပဇ္ဇတိ၊ နော စ တေသံ ကာယသင်္ခါရော ဥပ္ပဇ္ဇတိ. အဿာသပဿာသာနံ ဥပ္ပါဒက္ခဏေ တေသံ စိတ္တသင်္ခါရော စ ဥပ္ပဇ္ဇတိ ကာယသင်္ခါရော စ ဥပ္ပဇ္ဇတိ.
၂၀. (က) ယဿ ဝစီသင်္ခါရော ဥပ္ပဇ္ဇတိ တဿ စိတ္တသင်္ခါရော ဥပ္ပဇ္ဇတီတိ? အာမန္တာ.
(ခ) ယဿ ဝါ ပန စိတ္တသင်္ခါရော ဥပ္ပဇ္ဇတိ တဿ ဝစီသင်္ခါရော ဥပ္ပဇ္ဇတီတိ?
ဝိနာ ဝိတက္ကဝိစာရေဟိ စိတ္တဿ ဥပ္ပါဒက္ခဏေ တေသံ စိတ္တသင်္ခါရော ဥပ္ပဇ္ဇတိ၊ နော စ တေသံ ဝစီသင်္ခါရော ဥပ္ပဇ္ဇတိ. ဝိတက္ကဝိစာရာနံ ဥပ္ပါဒက္ခဏေ တေသံ စိတ္တသင်္ခါရော စ ဥပ္ပဇ္ဇတိ ဝစီသင်္ခါရော စ ဥပ္ပဇ္ဇတိ.
(ခ) အနုလောမဩကာသော
၂၁. (က) ယတ္ထ ကာယသင်္ခါရော ဥပ္ပဇ္ဇတိ တတ္ထ ဝစီသင်္ခါရော ဥပ္ပဇ္ဇတီတိ?
ဒုတိယဇ္ဈာနေ တတိယဇ္ဈာနေ တတ္ထ ကာယသင်္ခါရော ဥပ္ပဇ္ဇတိ၊ နော စ တတ္ထ ဝစီသင်္ခါရော ဥပ္ပဇ္ဇတိ. ပဌမဇ္ဈာနေ ကာမာဝစရေ တတ္ထ ကာယသင်္ခါရော စ ဥပ္ပဇ္ဇတိ ဝစီသင်္ခါရော စ ဥပ္ပဇ္ဇတိ.
(ခ) ယတ္ထ ဝါ ပန ဝစီသင်္ခါရော ဥပ္ပဇ္ဇတိ တတ္ထ ကာယသင်္ခါရော ဥပ္ပဇ္ဇတီတိ?
ရူပါဝစရေ အရူပါဝစရေ တတ္ထ ဝစီသင်္ခါရော ဥပ္ပဇ္ဇတိ၊ နော စ တတ္ထ ကာယသင်္ခါရော ဥပ္ပဇ္ဇတိ. ပဌမဇ္ဈာနေ ကာမာဝစရေ တတ္ထ ဝစီသင်္ခါရော စ ဥပ္ပဇ္ဇတိ ကာယသင်္ခါရော စ ဥပ္ပဇ္ဇတိ.
(က) ယတ္ထ ကာယသင်္ခါရော ဥပ္ပဇ္ဇတိ တတ္ထ စိတ္တသင်္ခါရော ဥပ္ပဇ္ဇတီတိ? အာမန္တာ.
(ခ) ယတ္ထ ဝါ ပန စိတ္တသင်္ခါရော ဥပ္ပဇ္ဇတိ တတ္ထ ကာယသင်္ခါရော ဥပ္ပဇ္ဇတီတိ?
စတုတ္ထဇ္ဈာနေ ရူပါဝစရေ အရူပါဝစရေ တတ္ထ စိတ္တသင်္ခါရော ဥပ္ပဇ္ဇတိ၊ နော စ တတ္ထ ကာယသင်္ခါရော ဥပ္ပဇ္ဇတိ. ပဌမဇ္ဈာနေ ဒုတိယဇ္ဈာနေ တတိယဇ္ဈာနေ ကာမာဝစရေ တတ္ထ စိတ္တသင်္ခါရော စ ဥပ္ပဇ္ဇတိ ကာယသင်္ခါရော စ ဥပ္ပဇ္ဇတိ.
၂၂. (က) ယတ္ထ ဝစီသင်္ခါရော ဥပ္ပဇ္ဇတိ တတ္ထ စိတ္တသင်္ခါရော ဥပ္ပဇ္ဇတီတိ? အာမန္တာ.
(ခ) ယတ္ထ ဝါ ပန စိတ္တသင်္ခါရော ဥပ္ပဇ္ဇတိ တတ္ထ ဝစီသင်္ခါရော ဥပ္ပဇ္ဇတီတိ?
ဒုတိယဇ္ဈာနေ တတိယဇ္ဈာနေ စတုတ္ထဇ္ဈာနေ တတ္ထ စိတ္တသင်္ခါရော ဥပ္ပဇ္ဇတိ၊ နော စ တတ္ထ ဝစီသင်္ခါရော ဥပ္ပဇ္ဇတိ. ပဌမဇ္ဈာနေ ကာမာဝစရေ ရူပါဝစရေ အရူပါဝစရေ တတ္ထ စိတ္တသင်္ခါရော စ ဥပ္ပဇ္ဇတိ ဝစီသင်္ခါရော စ ဥပ္ပဇ္ဇတိ.
(ဂ) အနုလောမပုဂ္ဂလောကာသာ
၂၃. ယဿ ယတ္ထ ကာယသင်္ခါရော ဥပ္ပဇ္ဇတိ။ပေ။.
(ယဿကမ္ပိ ယဿယတ္ထကမ္ပိ သဒိသံ.)
(ဃ) ပစ္စနီကပုဂ္ဂလော
၂၄. (က) ယဿ ကာယသင်္ခါရော နုပ္ပဇ္ဇတိ တဿ ဝစီသင်္ခါရော နုပ္ပဇ္ဇတီတိ?
ဝိနာ အဿာသပဿာသေဟိ ဝိတက္ကဝိစာရာနံ ဥပ္ပါဒက္ခဏေ တေသံ ကာယသင်္ခါရော နုပ္ပဇ္ဇတိ၊ နော စ တေသံ ဝစီသင်္ခါရော နုပ္ပဇ္ဇတိ. သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ အဝိတက္ကအဝိစာရစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ကာယသင်္ခါရော စ နုပ္ပဇ္ဇတိ ဝစီသင်္ခါရော စ နုပ္ပဇ္ဇတိ.
(ခ) ယဿ ဝါ ပန ဝစီသင်္ခါရော နုပ္ပဇ္ဇတိ တဿ ကာယသင်္ခါရော နုပ္ပဇ္ဇတီတိ?
ဝိနာ ဝိတက္ကဝိစာရေဟိ အဿာသပဿာသာနံ ဥပ္ပါဒက္ခဏေ တေသံ ဝစီသင်္ခါရော နုပ္ပဇ္ဇတိ၊ နော စ တေသံ ကာယသင်္ခါရော နုပ္ပဇ္ဇတိ. သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ အဝိတက္ကအဝိစာရစိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော စ နုပ္ပဇ္ဇတိ ကာယသင်္ခါရော စ နုပ္ပဇ္ဇတိ.
(က) ယဿ ကာယသင်္ခါရော နုပ္ပဇ္ဇတိ တဿ စိတ္တသင်္ခါရော နုပ္ပဇ္ဇတီတိ?
ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ တေသံ ကာယသင်္ခါရော နုပ္ပဇ္ဇတိ၊ နော စ တေသံ စိတ္တသင်္ခါရော နုပ္ပဇ္ဇတိ. သဗ္ဗေသံ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ကာယသင်္ခါရော စ နုပ္ပဇ္ဇတိ စိတ္တသင်္ခါရော စ နုပ္ပဇ္ဇတိ.
(ခ) ယဿ ဝါ ပန စိတ္တသင်္ခါရော နုပ္ပဇ္ဇတိ တဿ ကာယသင်္ခါရော နုပ္ပဇ္ဇတီတိ? အာမန္တာ.
၂၅. (က) ယဿ ဝစီသင်္ခါရော နုပ္ပဇ္ဇတိ တဿ စိတ္တသင်္ခါရော နုပ္ပဇ္ဇတီတိ?
ဝိနာ ဝိတက္ကဝိစာရေဟိ စိတ္တဿ ဥပ္ပါဒက္ခဏေ တေသံ ဝစီသင်္ခါရော နုပ္ပဇ္ဇတိ၊ နော စ တေသံ စိတ္တသင်္ခါရော နုပ္ပဇ္ဇတိ. သဗ္ဗေသံ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော စ နုပ္ပဇ္ဇတိ စိတ္တသင်္ခါရော စ နုပ္ပဇ္ဇတိ.
(ခ) ယဿ ဝါ ပန စိတ္တသင်္ခါရော နုပ္ပဇ္ဇတိ တဿ ဝစီသင်္ခါရော နုပ္ပဇ္ဇတီတိ? အာမန္တာ.
(င) ပစ္စနီကဩကာသော
၂၆. (က) ယတ္ထ ကာယသင်္ခါရော နုပ္ပဇ္ဇတိ တတ္ထ ဝစီသင်္ခါရော နုပ္ပဇ္ဇတီတိ?
ရူပါဝစရေ အရူပါဝစရေ တတ္ထ ကာယသင်္ခါရော နုပ္ပဇ္ဇတိ၊ နော စ တတ္ထ ဝစီသင်္ခါရော နုပ္ပဇ္ဇတိ. စတုတ္ထဇ္ဈာနေ အသညသတ္တေ တတ္ထ ကာယသင်္ခါရော စ နုပ္ပဇ္ဇတိ ဝစီသင်္ခါရော စ နုပ္ပဇ္ဇတိ.
(ခ) ယတ္ထ ဝါ ပန ဝစီသင်္ခါရော နုပ္ပဇ္ဇတိ တတ္ထ ကာယသင်္ခါရော နုပ္ပဇ္ဇတီတိ?
ဒုတိယဇ္ဈာနေ တတိယဇ္ဈာနေ တတ္ထ ဝစီသင်္ခါရော နုပ္ပဇ္ဇတိ၊ နော စ တတ္ထ ကာယသင်္ခါရော နုပ္ပဇ္ဇတိ. စတုတ္ထဇ္ဈာနေ အသညသတ္တေ တတ္ထ ဝစီသင်္ခါရော စ နုပ္ပဇ္ဇတိ ကာယသင်္ခါရော စ နုပ္ပဇ္ဇတိ.
(က) ယတ္ထ ကာယသင်္ခါရော နုပ္ပဇ္ဇတိ တတ္ထ စိတ္တသင်္ခါရော နုပ္ပဇ္ဇတီတိ?
စတုတ္ထဇ္ဈာနေ ရူပါဝစရေ အရူပါဝစရေ တတ္ထ ကာယသင်္ခါရော နုပ္ပဇ္ဇတိ၊ နော စ တတ္ထ စိတ္တသင်္ခါရော နုပ္ပဇ္ဇတိ. အသညသတ္တေ တတ္ထ ကာယသင်္ခါရော စ နုပ္ပဇ္ဇတိ စိတ္တသင်္ခါရော စ နုပ္ပဇ္ဇတိ.
(ခ) ယတ္ထ ဝါ ပန။ပေ။? အာမန္တာ.
၂၇. (က) ယတ္ထ ဝစီသင်္ခါရော နုပ္ပဇ္ဇတိ တတ္ထ စိတ္တသင်္ခါရော နုပ္ပဇ္ဇတီတိ?
ဒုတိယဇ္ဈာနေ တတိယဇ္ဈာနေ စတုတ္ထဇ္ဈာနေ တတ္ထ ဝစီသင်္ခါရော နုပ္ပဇ္ဇတိ၊ နော စ တတ္ထ စိတ္တသင်္ခါရော နုပ္ပဇ္ဇတိ. အသညသတ္တေ တတ္ထ ဝစီသင်္ခါရော စ နုပ္ပဇ္ဇတိ စိတ္တသင်္ခါရော စ နုပ္ပဇ္ဇတိ.
(ခ) ယတ္ထ ဝါ ပန။ပေ။? အာမန္တာ.
(စ) ပစ္စနီကပုဂ္ဂလောကာသာ
၂၈. (က) ယဿ ယတ္ထ ကာယသင်္ခါရော နုပ္ပဇ္ဇတိ တဿ တတ္ထ ဝစီသင်္ခါရော နုပ္ပဇ္ဇတီတိ?
ဝိနာ အဿာသပဿာသေဟိ ဝိတက္ကဝိစာရာနံ ဥပ္ပါဒက္ခဏေ တေသံ တတ္ထ ကာယသင်္ခါရော နုပ္ပဇ္ဇတိ၊ နော စ တေသံ တတ္ထ ဝစီသင်္ခါရော နုပ္ပဇ္ဇတိ. သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ အဝိတက္ကအဝိစာရစိတ္တဿ ဥပ္ပါဒက္ခဏေ အသညသတ္တာနံ တေသံ တတ္ထ ကာယသင်္ခါရော စ နုပ္ပဇ္ဇတိ ဝစီသင်္ခါရော စ နုပ္ပဇ္ဇတိ.
(ခ) ယဿ ဝါ ပန ယတ္ထ။ပေ။? အာမန္တာ.
(ယဿကမ္ပိ ယဿယတ္ထကမ္ပိ သဒိသံ ဝိတ္ထာရေတဗ္ဗံ၊ ယဿယတ္ထကေ နိရောဓသမာပန္နာနန္တိ န လဗ္ဘတိ.)