(၃) အနာဂတဝါရော

(က) အနုလောမပုဂ္ဂလော

၁၃၇. (က) ယဿ ကာယသင်္ခါရော ဥပ္ပဇ္ဇိဿတိ တဿ ဝစီသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ဝစီသင်္ခါရော နိရုဇ္ဈိဿတိ တဿ ကာယသင်္ခါရော ဥပ္ပဇ္ဇိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရေ အရူပါဝစရေ ပစ္ဆိမဘဝိကာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ဝစီသင်္ခါရော နိရုဇ္ဈိဿတိ၊ နော စ တေသံ ကာယသင်္ခါရော ဥပ္ပဇ္ဇိဿတိ. ဣတရေသံ တေသံ ဝစီသင်္ခါရော စ နိရုဇ္ဈိဿတိ ကာယသင်္ခါရော စ ဥပ္ပဇ္ဇိဿတိ.

(က) ယဿ ကာယသင်္ခါရော ဥပ္ပဇ္ဇိဿတိ တဿ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန စိတ္တသင်္ခါရော နိရုဇ္ဈိဿတိ တဿ ကာယသင်္ခါရော ဥပ္ပဇ္ဇိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရေ အရူပါဝစရေ ပစ္ဆိမဘဝိကာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ စိတ္တသင်္ခါရော နိရုဇ္ဈိဿတိ၊ နော စ တေသံ ကာယသင်္ခါရော ဥပ္ပဇ္ဇိဿတိ. ဣတရေသံ တေသံ စိတ္တသင်္ခါရော စ နိရုဇ္ဈိဿတိ ကာယသင်္ခါရော စ ဥပ္ပဇ္ဇိဿတိ.

၁၃၈. (က) ယဿ ဝစီသင်္ခါရော ဥပ္ပဇ္ဇိဿတိ တဿ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန စိတ္တသင်္ခါရော နိရုဇ္ဈိဿတိ တဿ ဝစီသင်္ခါရော ဥပ္ပဇ္ဇိဿတီတိ?

ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ တေသံ စိတ္တသင်္ခါရော နိရုဇ္ဈိဿတိ၊ နော စ တေသံ ဝစီသင်္ခါရော ဥပ္ပဇ္ဇိဿတိ. ဣတရေသံ တေသံ စိတ္တသင်္ခါရော စ နိရုဇ္ဈိဿတိ ဝစီသင်္ခါရော စ ဥပ္ပဇ္ဇိဿတိ.

(ခ) အနုလောမဩကာသော

၁၃၉. ယတ္ထ ကာယသင်္ခါရော ဥပ္ပဇ္ဇိဿတိ။ပေ။.

(ဂ) အနုလောမပုဂ္ဂလောကာသာ

၁၄၀. (က) ယဿ ယတ္ထ ကာယသင်္ခါရော ဥပ္ပဇ္ဇိဿတိ တဿ တတ္ထ ဝစီသင်္ခါရော နိရုဇ္ဈိဿတီတိ?

ဒုတိယဇ္ဈာနံ တတိယဇ္ဈာနံ သမာပန္နာနံ တေသံ တတ္ထ ကာယသင်္ခါရော ဥပ္ပဇ္ဇိဿတိ၊ နော စ တေသံ တတ္ထ ဝစီသင်္ခါရော နိရုဇ္ဈိဿတိ. ပဌမဇ္ဈာနံ သမာပန္နာနံ ကာမာဝစရာနံ တေသံ တတ္ထ ကာယသင်္ခါရော စ ဥပ္ပဇ္ဇိဿတိ ဝစီသင်္ခါရော စ နိရုဇ္ဈိဿတိ.

(ခ) ယဿ ဝါ ပန ယတ္ထ ဝစီသင်္ခါရော နိရုဇ္ဈိဿတိ တဿ တတ္ထ ကာယသင်္ခါရော ဥပ္ပဇ္ဇိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရာနံ အရူပါဝစရာနံ တေသံ တတ္ထ ဝစီသင်္ခါရော နိရုဇ္ဈိဿတိ၊ နော စ တေသံ တတ္ထ ကာယသင်္ခါရော ဥပ္ပဇ္ဇိဿတိ. ပဌမဇ္ဈာနံ သမာပန္နာနံ ဣတရေသံ ကာမာဝစရာနံ တေသံ တတ္ထ ဝစီသင်္ခါရော စ နိရုဇ္ဈိဿတိ ကာယသင်္ခါရော စ ဥပ္ပဇ္ဇိဿတိ.

(က) ယဿ ယတ္ထ ကာယသင်္ခါရော ဥပ္ပဇ္ဇိဿတိ တဿ တတ္ထ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိဿတိ တဿ တတ္ထ ကာယသင်္ခါရော ဥပ္ပဇ္ဇိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ ရူပါဝစရာနံ အရူပါဝစရာနံ တေသံ တတ္ထ စိတ္တသင်္ခါရော နိရုဇ္ဈိဿတိ၊ နော စ တေသံ တတ္ထ ကာယသင်္ခါရော ဥပ္ပဇ္ဇိဿတိ. ပဌမဇ္ဈာနံ ဒုတိယဇ္ဈာနံ တတိယဇ္ဈာနံ သမာပန္နာနံ ဣတရေသံ ကာမာဝစရာနံ တေသံ တတ္ထ စိတ္တသင်္ခါရော စ နိရုဇ္ဈိဿတိ ကာယသင်္ခါရော စ ဥပ္ပဇ္ဇိဿတိ.

၁၄၁. (က) ယဿ ယတ္ထ ဝစီသင်္ခါရော ဥပ္ပဇ္ဇိဿတိ တဿ တတ္ထ စိတ္တသင်္ခါရော နိရုဇ္ဈိဿတီတိ? အာမန္တာ.

(ခ) ယဿ ဝါ ပန ယတ္ထ စိတ္တသင်္ခါရော နိရုဇ္ဈိဿတိ တဿ တတ္ထ ဝစီသင်္ခါရော ဥပ္ပဇ္ဇိဿတီတိ?

ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ ဒုတိယဇ္ဈာနံ တတိယဇ္ဈာနံ စတုတ္ထဇ္ဈာနံ သမာပန္နာနံ တေသံ တတ္ထ စိတ္တသင်္ခါရော နိရုဇ္ဈိဿတိ၊ နော စ တေသံ တတ္ထ ဝစီသင်္ခါရော ဥပ္ပဇ္ဇိဿတိ. ပဌမဇ္ဈာနံ သမာပန္နာနံ ကာမာဝစရာနံ ဣတရေသံ ရူပါဝစရာနံ အရူပါဝစရာနံ တေသံ တတ္ထ စိတ္တသင်္ခါရော စ နိရုဇ္ဈိဿတိ ဝစီသင်္ခါရော စ ဥပ္ပဇ္ဇိဿတိ.

(ဃ) ပစ္စနီကပုဂ္ဂလော

၁၄၂. (က) ယဿ ကာယသင်္ခါရော နုပ္ပဇ္ဇိဿတိ တဿ ဝစီသင်္ခါရော န နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရေ အရူပါဝစရေ ပစ္ဆိမဘဝိကာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ကာယသင်္ခါရော နုပ္ပဇ္ဇိဿတိ၊ နော စ တေသံ ဝစီသင်္ခါရော န နိရုဇ္ဈိဿတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ တေသံ ကာယသင်္ခါရော စ နုပ္ပဇ္ဇိဿတိ ဝစီသင်္ခါရော စ န နိရုဇ္ဈိဿတိ.

(ခ) ယဿ ဝါ ပန။ပေ။? အာမန္တာ.

(က) ယဿ ကာယသင်္ခါရော နုပ္ပဇ္ဇိဿတိ တဿ စိတ္တသင်္ခါရော န နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရေ အရူပါဝစရေ ပစ္ဆိမဘဝိကာနံ ယေ စ ရူပါဝစရံ အရူပါဝစရံ ဥပပဇ္ဇိတွာ ပရိနိဗ္ဗာယိဿန္တိ တေသံ စဝန္တာနံ တေသံ ကာယသင်္ခါရော နုပ္ပဇ္ဇိဿတိ၊ နော စ တေသံ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ ကာယသင်္ခါရော စ နုပ္ပဇ္ဇိဿတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန။ပေ။? အာမန္တာ.

၁၄၃. (က) ယဿ ဝစီသင်္ခါရော နုပ္ပဇ္ဇိဿတိ တဿ စိတ္တသင်္ခါရော န နိရုဇ္ဈိဿတီတိ?

ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ တေသံ ဝစီသင်္ခါရော နုပ္ပဇ္ဇိဿတိ၊ နော စ တေသံ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ တေသံ ဝစီသင်္ခါရော စ နုပ္ပဇ္ဇိဿတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန။ပေ။? အာမန္တာ.

(င) ပစ္စနီကဩကာသော

၁၄၄. ယတ္ထ ကာယသင်္ခါရော နုပ္ပဇ္ဇိဿတိ။ပေ။.

(စ) ပစ္စနီကပုဂ္ဂလောကာသာ

၁၄၅. (က) ယဿ ယတ္ထ ကာယသင်္ခါရော နုပ္ပဇ္ဇိဿတိ တဿ တတ္ထ ဝစီသင်္ခါရော န နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော နုပ္ပဇ္ဇိဿတိ၊ နော စ တေသံ တတ္ထ ဝစီသင်္ခါရော န နိရုဇ္ဈိဿတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ကာယသင်္ခါရော စ နုပ္ပဇ္ဇိဿတိ ဝစီသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ယတ္ထ ဝစီသင်္ခါရော န နိရုဇ္ဈိဿတိ တဿ တတ္ထ ကာယသင်္ခါရော နုပ္ပဇ္ဇိဿတီတိ?

ဒုတိယဇ္ဈာနံ တတိယဇ္ဈာနံ သမာပန္နာနံ တေသံ တတ္ထ ဝစီသင်္ခါရော န နိရုဇ္ဈိဿတိ၊ နော စ တေသံ တတ္ထ ကာယသင်္ခါရော နုပ္ပဇ္ဇိဿတိ. သဝိတက္ကသဝိစာရပစ္ဆိမစိတ္တဿ ဘင်္ဂက္ခဏေ အဝိတက္ကအဝိစာရပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ဝစီသင်္ခါရော စ န နိရုဇ္ဈိဿတိ ကာယသင်္ခါရော စ နုပ္ပဇ္ဇိဿတိ.

(က) ယဿ ယတ္ထ ကာယသင်္ခါရော နုပ္ပဇ္ဇိဿတိ တဿ တတ္ထ စိတ္တသင်္ခါရော န နိရုဇ္ဈိဿတီတိ?

ကာမာဝစရာနံ ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ ကာမာဝစရာနံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော နုပ္ပဇ္ဇိဿတိ၊ နော စ တေသံ တတ္ထ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ကာယသင်္ခါရော စ နုပ္ပဇ္ဇိဿတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ယတ္ထ။ပေ။? အာမန္တာ.

၁၄၆. (က) ယဿ ယတ္ထ ဝစီသင်္ခါရော နုပ္ပဇ္ဇိဿတိ တဿ တတ္ထ စိတ္တသင်္ခါရော န နိရုဇ္ဈိဿတီတိ?

ပစ္ဆိမစိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ ဒုတိယဇ္ဈာနံ တတိယဇ္ဈာနံ စတုတ္ထဇ္ဈာနံ သမာပန္နာနံ တေသံ တတ္ထ ဝစီသင်္ခါရော နုပ္ပဇ္ဇိဿတိ၊ နော စ တေသံ တတ္ထ စိတ္တသင်္ခါရော န နိရုဇ္ဈိဿတိ. ပစ္ဆိမစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ဝစီသင်္ခါရော စ နုပ္ပဇ္ဇိဿတိ စိတ္တသင်္ခါရော စ န နိရုဇ္ဈိဿတိ.

(ခ) ယဿ ဝါ ပန ယတ္ထ။ပေ။? အာမန္တာ.