(၁) ပစ္စုပ္ပန္နဝါရော

(က) အနုလောမပုဂ္ဂလော

၁၂၈. (က) ယဿ ကာယသင်္ခါရော ဥပ္ပဇ္ဇတိ တဿ ဝစီသင်္ခါရော နိရုဇ္ဈတီတိ? နော.

(ခ) ယဿ ဝါ ပန ဝစီသင်္ခါရော နိရုဇ္ဈတိ တဿ ကာယသင်္ခါရော ဥပ္ပဇ္ဇတီတိ? နော.

(က) ယဿ ကာယသင်္ခါရော ဥပ္ပဇ္ဇတိ တဿ စိတ္တသင်္ခါရော နိရုဇ္ဈတီတိ? နော.

(ခ) ယဿ ဝါ ပန စိတ္တသင်္ခါရော နိရုဇ္ဈတိ တဿ ကာယသင်္ခါရော ဥပ္ပဇ္ဇတီတိ? နော.

၁၂၉. (က) ယဿ ဝစီသင်္ခါရော ဥပ္ပဇ္ဇတိ တဿ စိတ္တသင်္ခါရော နိရုဇ္ဈတီတိ? နော.

(ခ) ယဿ ဝါ ပန။ပေ။? နော.

(ခ) အနုလောမဩကာသော

၁၃၀. ယတ္ထ ကာယသင်္ခါရော ဥပ္ပဇ္ဇတိ တတ္ထ ဝစီသင်္ခါရော နိရုဇ္ဈတီတိ?

ဒုတိယဇ္ဈာနေ တတိယဇ္ဈာနေ တတ္ထ။ပေ။ (ဣတရေသံ ယတ္ထကာနံ သဒိသံ).

(ဂ) အနုလောမပုဂ္ဂလောကာသာ

၁၃၁. ယဿ ယတ္ထ ကာယသင်္ခါရော ဥပ္ပဇ္ဇတိ။ပေ။ (ယဿကမ္ပိ ယဿယတ္ထကမ္ပိ သဒိသံ).

(ဃ) ပစ္စနီကပုဂ္ဂလော

၁၃၂. (က) ယဿ ကာယသင်္ခါရော နုပ္ပဇ္ဇတိ တဿ ဝစီသင်္ခါရော န နိရုဇ္ဈတီတိ?

ဝိတက္ကဝိစာရာနံ ဘင်္ဂက္ခဏေ တေသံ ကာယသင်္ခါရော နုပ္ပဇ္ဇတိ၊ နော စ တေသံ ဝစီသင်္ခါရော န နိရုဇ္ဈတိ. ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ ဝိနာ ဝိတက္ကဝိစာရေဟိ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ကာယသင်္ခါရော စ နုပ္ပဇ္ဇတိ ဝစီသင်္ခါရော စ န နိရုဇ္ဈတိ.

(ခ) ယဿ ဝါ ပန ဝစီသင်္ခါရော န နိရုဇ္ဈတိ တဿ ကာယသင်္ခါရော နုပ္ပဇ္ဇတီတိ?

အဿာသပဿာသာနံ ဥပ္ပါဒက္ခဏေ တေသံ ဝစီသင်္ခါရော န နိရုဇ္ဈတိ၊ နော စ တေသံ ကာယသင်္ခါရော နုပ္ပဇ္ဇတိ. ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ ဝိနာ ဝိတက္ကဝိစာရေဟိ စိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော စ န နိရုဇ္ဈတိ ကာယသင်္ခါရော စ နုပ္ပဇ္ဇတိ.

(က) ယဿ ကာယသင်္ခါရော နုပ္ပဇ္ဇတိ တဿ စိတ္တသင်္ခါရော နိရုဇ္ဈတီတိ?

သဗ္ဗေသံ စိတ္တဿ ဘင်္ဂက္ခဏေ တေသံ ကာယသင်္ခါရော နုပ္ပဇ္ဇတိ၊ နော စ တေသံ စိတ္တသင်္ခါရော န နိရုဇ္ဈတိ. ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ကာယသင်္ခါရော စ နုပ္ပဇ္ဇတိ စိတ္တသင်္ခါရော စ န နိရုဇ္ဈတိ.

(ခ) ယဿ ဝါ ပန စိတ္တသင်္ခါရော န နိရုဇ္ဈတိ တဿ ကာယသင်္ခါရော နုပ္ပဇ္ဇတီတိ?

အဿာသပဿာသာနံ ဥပ္ပါဒက္ခဏေ တေသံ စိတ္တသင်္ခါရော န နိရုဇ္ဈတိ၊ နော စ တေသံ ကာယသင်္ခါရော နုပ္ပဇ္ဇတိ. ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ စိတ္တသင်္ခါရော စ န နိရုဇ္ဈတိ ကာယသင်္ခါရော စ နုပ္ပဇ္ဇတိ.

၁၃၃. (က) ယဿ ဝစီသင်္ခါရော နုပ္ပဇ္ဇတိ တဿ စိတ္တသင်္ခါရော န နိရုဇ္ဈတီတိ?

သဗ္ဗေသံ စိတ္တဿ ဘင်္ဂက္ခဏေ တေသံ ဝစီသင်္ခါရော နုပ္ပဇ္ဇတိ၊ နော စ တေသံ စိတ္တသင်္ခါရော န နိရုဇ္ဈတိ. ဝိနာ ဝိတက္ကဝိစာရေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော စ နုပ္ပဇ္ဇတိ စိတ္တသင်္ခါရော စ န နိရုဇ္ဈတိ.

(ခ) ယဿ ဝါ ပန စိတ္တသင်္ခါရော န နိရုဇ္ဈတိ တဿ ဝစီသင်္ခါရော နုပ္ပဇ္ဇတီတိ?

ဝိတက္ကဝိစာရာနံ ဥပ္ပါဒက္ခဏေ တေသံ စိတ္တသင်္ခါရော န နိရုဇ္ဈတိ၊ နော စ တေသံ ဝစီသင်္ခါရော နုပ္ပဇ္ဇတိ. ဝိနာ ဝိတက္ကဝိစာရေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ စိတ္တသင်္ခါရော စ န နိရုဇ္ဈတိ ဝစီသင်္ခါရော စ နုပ္ပဇ္ဇတိ.

(င) ပစ္စနီကဩကာသော

၁၃၄. ယတ္ထ ကာယသင်္ခါရော နုပ္ပဇ္ဇတိ။ပေ။.

(စ) ပစ္စနီကပုဂ္ဂလောကာသာ

၁၃၅. ယဿ ယတ္ထ ကာယသင်္ခါရော နုပ္ပဇ္ဇတိ။ပေ။.

(ယဿကမ္ပိ ယဿယတ္ထကမ္ပိ သဒိသံ၊ ယဿယတ္ထကေ နိရောဓသမာပန္နာနန္တိ န လဗ္ဘတိ).