(၁) ပစ္စုပ္ပန္နဝါရော

(က) အနုလောမပုဂ္ဂလော

၇၉. (က) ယဿ ကာယသင်္ခါရော နိရုဇ္ဈတိ တဿ ဝစီသင်္ခါရော နိရုဇ္ဈတီတိ?

ဝိနာ ဝိတက္ကဝိစာရေဟိ အဿာသပဿာသာနံ ဘင်္ဂက္ခဏေ တေသံ ကာယသင်္ခါရော နိရုဇ္ဈတိ၊ နော စ တေသံ ဝစီသင်္ခါရော နိရုဇ္ဈတိ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဘင်္ဂက္ခဏေ တေသံ ကာယသင်္ခါရော စ နိရုဇ္ဈတိ ဝစီသင်္ခါရော စ နိရုဇ္ဈတိ.

(ခ) ယဿ ဝါ ပန ဝစီသင်္ခါရော နိရုဇ္ဈတိ တဿ ကာယသင်္ခါရော နိရုဇ္ဈတီတိ?

ဝိနာ အဿာသပဿာသေဟိ ဝိတက္ကဝိစာရာနံ ဘင်္ဂက္ခဏေ တေသံ ဝစီသင်္ခါရော နိရုဇ္ဈတိ၊ နော စ တေသံ ကာယသင်္ခါရော နိရုဇ္ဈတိ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဘင်္ဂက္ခဏေ တေသံ ဝစီသင်္ခါရော စ နိရုဇ္ဈတိ ကာယသင်္ခါရော စ နိရုဇ္ဈတိ.

(က) ယဿ ကာယသင်္ခါရော နိရုဇ္ဈတိ တဿ စိတ္တသင်္ခါရော နိရုဇ္ဈတီတိ? အာမန္တာ.

(ခ) ယဿ ဝါ ပန စိတ္တသင်္ခါရော နိရုဇ္ဈတိ တဿ ကာယသင်္ခါရော နိရုဇ္ဈတီတိ?

ဝိနာ အဿာသပဿာသေဟိ စိတ္တဿ ဘင်္ဂက္ခဏေ တေသံ စိတ္တသင်္ခါရော နိရုဇ္ဈတိ၊ နော စ တေသံ ကာယသင်္ခါရော နိရုဇ္ဈတိ. အဿာသပဿာသာနံ ဘင်္ဂက္ခဏေ တေသံ စိတ္တသင်္ခါရော စ နိရုဇ္ဈတိ ကာယသင်္ခါရော စ နိရုဇ္ဈတိ.

၈၀. (က) ယဿ ဝစီသင်္ခါရော နိရုဇ္ဈတိ တဿ စိတ္တသင်္ခါရော နိရုဇ္ဈတီတိ? အာမန္တာ.

(ခ) ယဿ ဝါ ပန စိတ္တသင်္ခါရော နိရုဇ္ဈတိ တဿ ဝစီသင်္ခါရော နိရုဇ္ဈတီတိ?

ဝိနာ ဝိတက္ကဝိစာရေဟိ စိတ္တဿ ဘင်္ဂက္ခဏေ တေသံ စိတ္တသင်္ခါရော နိရုဇ္ဈတိ၊ နော စ တေသံ ဝစီသင်္ခါရော နိရုဇ္ဈတိ. ဝိတက္ကဝိစာရာနံ ဘင်္ဂက္ခဏေ တေသံ စိတ္တသင်္ခါရော စ နိရုဇ္ဈတိ ဝစီသင်္ခါရော စ နိရုဇ္ဈတိ.

(ခ) အနုလောမဩကာသော

၈၁. ယတ္ထ ကာယသင်္ခါရော နိရုဇ္ဈတိ တတ္ထ ဝစီသင်္ခါရော နိရုဇ္ဈတီတိ?။ပေ။.

(ဂ) အနုလောမပုဂ္ဂလောကာသာ

၈၂. ယဿ ယတ္ထ ကာယသင်္ခါရော နိရုဇ္ဈတိ တဿ တတ္ထ ဝစီသင်္ခါရော နိရုဇ္ဈတီတိ?။ပေ။. (ယဿကမ္ပိ ယဿယတ္ထကမ္ပိ သဒိသံ.)

(ဃ) ပစ္စနီကပုဂ္ဂလော

၈၃. (က) ယဿ ကာယသင်္ခါရော န နိရုဇ္ဈတိ တဿ ဝစီသင်္ခါရော န နိရုဇ္ဈတီတိ?

ဝိနာ အဿာသပဿာသေဟိ ဝိတက္ကဝိစာရာနံ ဘင်္ဂက္ခဏေ တေသံ ကာယသင်္ခါရော န နိရုဇ္ဈတိ၊ နော စ တေသံ ဝစီသင်္ခါရော န နိရုဇ္ဈတိ. သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ အဝိတက္ကအဝိစာရစိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ကာယသင်္ခါရော စ န နိရုဇ္ဈတိ ဝစီသင်္ခါရော စ န နိရုဇ္ဈတိ.

(ခ) ယဿ ဝါ ပန ဝစီသင်္ခါရော န နိရုဇ္ဈတိ တဿ ကာယသင်္ခါရော န နိရုဇ္ဈတီတိ?

ဝိနာ ဝိတက္ကဝိစာရေဟိ အဿာသပဿာသာနံ ဘင်္ဂက္ခဏေ တေသံ ဝစီသင်္ခါရော န နိရုဇ္ဈတိ၊ နော စ တေသံ ကာယသင်္ခါရော န နိရုဇ္ဈတိ. သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ အဝိတက္ကအဝိစာရစိတ္တဿ ဘင်္ဂက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော စ န နိရုဇ္ဈတိ ကာယသင်္ခါရော စ န နိရုဇ္ဈတိ.

(က) ယဿ ကာယသင်္ခါရော န နိရုဇ္ဈတိ တဿ စိတ္တသင်္ခါရော န နိရုဇ္ဈတီတိ?

ဝိနာ အဿာသပဿာသေဟိ စိတ္တဿ ဘင်္ဂက္ခဏေ တေသံ ကာယသင်္ခါရော န နိရုဇ္ဈတိ၊ နော စ တေသံ စိတ္တသင်္ခါရော န နိရုဇ္ဈတိ. သဗ္ဗေသံ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ကာယသင်္ခါရော စ န နိရုဇ္ဈတိ စိတ္တသင်္ခါရော စ န နိရုဇ္ဈတိ.

(ခ) ယဿ ဝါ ပန။ပေ။? အာမန္တာ.

၈၄. (က) ယဿ ဝစီသင်္ခါရော န နိရုဇ္ဈတိ တဿ စိတ္တသင်္ခါရော န နိရုဇ္ဈတီတိ?

ဝိနာ ဝိတက္ကဝိစာရေဟိ စိတ္တဿ ဘင်္ဂက္ခဏေ တေသံ ဝစီသင်္ခါရော န နိရုဇ္ဈတိ၊ နော စ တေသံ စိတ္တသင်္ခါရော န နိရုဇ္ဈတိ. သဗ္ဗေသံ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော စ န နိရုဇ္ဈတိ စိတ္တသင်္ခါရော စ န နိရုဇ္ဈတိ.

(ခ) ယဿ ဝါ ပန။ပေ။? အာမန္တာ.

(င) ပစ္စနီကဩကာသာ

၈၅. ယတ္ထ ကာယသင်္ခါရော န နိရုဇ္ဈတိ။ပေ။.

(စ) ပစ္စနီကပုဂ္ဂလောကာသာ

၈၆. ယဿ ယတ္ထ ကာယသင်္ခါရော န နိရုဇ္ဈတိ တဿ တတ္ထ ဝစီသင်္ခါရော န နိရုဇ္ဈတီတိ?

ဝိနာ အဿာသပဿာသေဟိ ဝိတက္ကဝိစာရာနံ ဘင်္ဂက္ခဏေ တေသံ တတ္ထ ကာယသင်္ခါရော န နိရုဇ္ဈတိ၊ နော စ တေသံ တတ္ထ ဝစီသင်္ခါရော န နိရုဇ္ဈတိ. သဗ္ဗေသံ စိတ္တဿ ဥပ္ပါဒက္ခဏေ ဝိနာ အဿာသပဿာသေဟိ အဝိတက္ကအဝိစာရစိတ္တဿ ဘင်္ဂက္ခဏေ အသညသတ္တာနံ တေသံ တတ္ထ ကာယသင်္ခါရော စ န နိရုဇ္ဈတိ ဝစီသင်္ခါရော စ န နိရုဇ္ဈတိ.

ယဿ ဝါ ပန ယတ္ထ ဝစီသင်္ခါရော န နိရုဇ္ဈတိ။ပေ။.

(ယဿကမ္ပိ ယဿယတ္ထကမ္ပိ သဒိသံ ဝိတ္ထာရေတဗ္ဗံ၊ ယဿယတ္ထကေ နိရောဓသမာပန္နာနန္တိ န ကာတဗ္ဗံ.)