(၆) အတီတာနာဂတဝါရော
(က) အနုလောမပုဂ္ဂလော
၆၉. (က) ယဿ ကာယသင်္ခါရော ဥပ္ပဇ္ဇိတ္ထ တဿ ဝစီသင်္ခါရော ဥပ္ပဇ္ဇိဿတီတိ?
ပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ တေသံ ကာယသင်္ခါရော ဥပ္ပဇ္ဇိတ္ထ၊ နော စ တေသံ ဝစီသင်္ခါရော ဥပ္ပဇ္ဇိဿတိ. ဣတရေသံ တေသံ ကာယသင်္ခါရော စ ဥပ္ပဇ္ဇိတ္ထ ဝစီသင်္ခါရော စ ဥပ္ပဇ္ဇိဿတိ.
(ခ) ယဿ ဝါ ပန။ပေ။? အာမန္တာ.
(က) ယဿ ကာယသင်္ခါရော ဥပ္ပဇ္ဇိတ္ထ တဿ စိတ္တသင်္ခါရော ဥပ္ပဇ္ဇိဿတီတိ?
ပစ္ဆိမစိတ္တသမင်္ဂီနံ တေသံ ကာယသင်္ခါရော ဥပ္ပဇ္ဇိတ္ထ၊ နော စ တေသံ စိတ္တသင်္ခါရော ဥပ္ပဇ္ဇိဿတိ. ဣတရေသံ တေသံ ကာယသင်္ခါရော စ ဥပ္ပဇ္ဇိတ္ထ စိတ္တသင်္ခါရော စ ဥပ္ပဇ္ဇိဿတိ.
(ခ) ယဿ ဝါ ပန။ပေ။. အာမန္တာ.
၇၀. (က) ယဿ ဝစီသင်္ခါရော ဥပ္ပဇ္ဇိတ္ထ တဿ စိတ္တသင်္ခါရော ဥပ္ပဇ္ဇိဿတီတိ?
ပစ္ဆိမစိတ္တသမင်္ဂီနံ တေသံ ဝစီသင်္ခါရော ဥပ္ပဇ္ဇိတ္ထ၊ နော စ တေသံ စိတ္တသင်္ခါရော ဥပ္ပဇ္ဇိဿတိ. ဣတရေသံ တေသံ ဝစီသင်္ခါရော စ ဥပ္ပဇ္ဇိတ္ထ စိတ္တသင်္ခါရော စ ဥပ္ပဇ္ဇိဿတိ.
(ခ) ယဿ ဝါ ပန။ပေ။? အာမန္တာ.
(ခ) အနုလောမဩကာသော
၇၁. ယတ္ထ ကာယသင်္ခါရော ဥပ္ပဇ္ဇိတ္ထ။ပေ။.
(ဂ) အနုလောမပုဂ္ဂလောကာသာ
၇၂. (က) ယဿ ယတ္ထ ကာယသင်္ခါရော ဥပ္ပဇ္ဇိတ္ထ တဿ တတ္ထ ဝစီသင်္ခါရော ဥပ္ပဇ္ဇိဿတီတိ?
ကာမာဝစရေ ပစ္ဆိမစိတ္တသမင်္ဂီနံ ဒုတိယဇ္ဈာနံ တတိယဇ္ဈာနံ သမာပန္နာနံ တေသံ တတ္ထ ကာယသင်္ခါရော ဥပ္ပဇ္ဇိတ္ထ၊ နော စ တေသံ တတ္ထ ဝစီသင်္ခါရော ဥပ္ပဇ္ဇိဿတိ. ပဌမဇ္ဈာနံ သမာပန္နာနံ ဣတရေသံ ကာမာဝစရာနံ တေသံ တတ္ထ ကာယသင်္ခါရော စ ဥပ္ပဇ္ဇိတ္ထ ဝစီသင်္ခါရော စ ဥပ္ပဇ္ဇိဿတိ.
(ခ) ယဿ ဝါ ပန ယတ္ထ ဝစီသင်္ခါရော ဥပ္ပဇ္ဇိဿတိ တဿ တတ္ထ ကာယသင်္ခါရော ဥပ္ပဇ္ဇိတ္ထာတိ?
ရူပါဝစရာနံ အရူပါဝစရာနံ တေသံ တတ္ထ ဝစီသင်္ခါရော ဥပ္ပဇ္ဇိဿတိ၊ နော စ တေသံ တတ္ထ ကာယသင်္ခါရော ဥပ္ပဇ္ဇိတ္ထ. ပဌမဇ္ဈာနံ သမာပန္နာနံ ကာမာဝစရာနံ တေသံ တတ္ထ ဝစီသင်္ခါရော စ ဥပ္ပဇ္ဇိဿတိ ကာယသင်္ခါရော စ ဥပ္ပဇ္ဇိတ္ထ.
(က) ယဿ ယတ္ထ ကာယသင်္ခါရော ဥပ္ပဇ္ဇိတ္ထ တဿ တတ္ထ စိတ္တသင်္ခါရော ဥပ္ပဇ္ဇိဿတီတိ?
ကာမာဝစရေ ပစ္ဆိမစိတ္တသမင်္ဂီနံ တေသံ တတ္ထ ကာယသင်္ခါရော ဥပ္ပဇ္ဇိတ္ထ၊ နော စ တေသံ တတ္ထ စိတ္တသင်္ခါရော ဥပ္ပဇ္ဇိဿတိ. ပဌမဇ္ဈာနံ ဒုတိယဇ္ဈာနံ တတိယဇ္ဈာနံ သမာပန္နာနံ ဣတရေသံ ကာမာဝစရာနံ တေသံ တတ္ထ ကာယသင်္ခါရော စ ဥပ္ပဇ္ဇိတ္ထ စိတ္တသင်္ခါရော စ ဥပ္ပဇ္ဇိဿတိ.
(ခ) ယဿ ဝါ ပန ယတ္ထ စိတ္တသင်္ခါရော ဥပ္ပဇ္ဇိဿတိ တဿ တတ္ထ ကာယသင်္ခါရော ဥပ္ပဇ္ဇိတ္ထာတိ?
စတုတ္ထဇ္ဈာနံ သမာပန္နာနံ ရူပါဝစရာနံ အရူပါဝစရာနံ တေသံ တတ္ထ စိတ္တသင်္ခါရော ဥပ္ပဇ္ဇိဿတိ၊ နော စ တေသံ တတ္ထ ကာယသင်္ခါရော ဥပ္ပဇ္ဇိတ္ထ. ပဌမဇ္ဈာနံ ဒုတိယဇ္ဈာနံ တတိယဇ္ဈာနံ သမာပန္နာနံ ကာမာဝစရာနံ တေသံ တတ္ထ စိတ္တသင်္ခါရော စ ဥပ္ပဇ္ဇိဿတိ ကာယသင်္ခါရော စ ဥပ္ပဇ္ဇိတ္ထ.
၇၃. (က) ယဿ ယတ္ထ ဝစီသင်္ခါရော ဥပ္ပဇ္ဇိတ္ထ တဿ တတ္ထ စိတ္တသင်္ခါရော ဥပ္ပဇ္ဇိဿတီတိ?
သဝိတက္ကသဝိစာရဘူမိယံ ပစ္ဆိမစိတ္တသမင်္ဂီနံ တေသံ တတ္ထ ဝစီသင်္ခါရော ဥပ္ပဇ္ဇိတ္ထ၊ နော စ တေသံ တတ္ထ စိတ္တသင်္ခါရော ဥပ္ပဇ္ဇိဿတိ. ဣတရေသံ သဝိတက္ကသဝိစာရဘူမိယံ တေသံ တတ္ထ ဝစီသင်္ခါရော စ ဥပ္ပဇ္ဇိတ္ထ စိတ္တသင်္ခါရော စ ဥပ္ပဇ္ဇိဿတိ.
(ခ) ယဿ ဝါ ပန ယတ္ထ စိတ္တသင်္ခါရော ဥပ္ပဇ္ဇိဿတိ တဿ တတ္ထ ဝစီသင်္ခါရော ဥပ္ပဇ္ဇိတ္ထာတိ?
အဝိတက္ကအဝိစာရဘူမိယံ တေသံ တတ္ထ စိတ္တသင်္ခါရော ဥပ္ပဇ္ဇိဿတိ၊ နော စ တေသံ တတ္ထ ဝစီသင်္ခါရော ဥပ္ပဇ္ဇိတ္ထ. သဝိတက္ကသဝိစာရဘူမိယံ တေသံ တတ္ထ စိတ္တသင်္ခါရော စ ဥပ္ပဇ္ဇိဿတိ ဝစီသင်္ခါရော စ ဥပ္ပဇ္ဇိတ္ထ.
(ဃ) ပစ္စနီကပုဂ္ဂလော
၇၄. (က) ယဿ ကာယသင်္ခါရော နုပ္ပဇ္ဇိတ္ထ တဿ ဝစီသင်္ခါရော နုပ္ပဇ္ဇိဿတီတိ? နတ္ထိ.
(ခ) ယဿ ဝါ ပန ဝစီသင်္ခါရော နုပ္ပဇ္ဇိဿတိ တဿ ကာယသင်္ခါရော နုပ္ပဇ္ဇိတ္ထာတိ? ဥပ္ပဇ္ဇိတ္ထ.
(က) ယဿ ကာယသင်္ခါရော နုပ္ပဇ္ဇိတ္ထ တဿ စိတ္တသင်္ခါရော နုပ္ပဇ္ဇိဿတီတိ? နတ္ထိ.
(ခ) ယဿ ဝါ ပန စိတ္တသင်္ခါရော နုပ္ပဇ္ဇိဿတိ တဿ ကာယသင်္ခါရော နုပ္ပဇ္ဇိတ္ထာတိ? ဥပ္ပဇ္ဇိတ္ထ.
၇၅. (က) ယဿ ဝစီသင်္ခါရော နုပ္ပဇ္ဇိတ္ထ တဿ စိတ္တသင်္ခါရော နုပ္ပဇ္ဇိဿတီတိ? နတ္ထိ.
(ခ) ယဿ ဝါ ပန စိတ္တသင်္ခါရော နုပ္ပဇ္ဇိဿတိ တဿ ဝစီသင်္ခါရော နုပ္ပဇ္ဇိတ္ထာတိ? ဥပ္ပဇ္ဇိတ္ထ.
(င) ပစ္စနီကဩကာသော
၇၆. ယတ္ထ ကာယသင်္ခါရော နုပ္ပဇ္ဇိတ္ထ။ပေ။.
(စ) ပစ္စနီကပုဂ္ဂလောကာသာ
၇၇. (က) ယဿ ယတ္ထ ကာယသင်္ခါရော နုပ္ပဇ္ဇိတ္ထ တဿ တတ္ထ ဝစီသင်္ခါရော နုပ္ပဇ္ဇိဿတီတိ?
ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော နုပ္ပဇ္ဇိတ္ထ၊ နော စ တေသံ တတ္ထ ဝစီသင်္ခါရော နုပ္ပဇ္ဇိဿတိ. ရူပါဝစရေ အရူပါဝစရေ ပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ကာယသင်္ခါရော စ နုပ္ပဇ္ဇိတ္ထ ဝစီသင်္ခါရော စ နုပ္ပဇ္ဇိဿတိ.
(ခ) ယဿ ဝါ ပန ယတ္ထ ဝစီသင်္ခါရော နုပ္ပဇ္ဇိဿတိ တဿ တတ္ထ ကာယသင်္ခါရော နုပ္ပဇ္ဇိတ္ထာတိ?
ကာမာဝစရေ ပစ္ဆိမစိတ္တသမင်္ဂီနံ ဒုတိယဇ္ဈာနံ တတိယဇ္ဈာနံ သမာပန္နာနံ တေသံ တတ္ထ ဝစီသင်္ခါရော နုပ္ပဇ္ဇိဿတိ၊ နော စ တေသံ တတ္ထ ကာယသင်္ခါရော နုပ္ပဇ္ဇိတ္ထ. ရူပါဝစရေ အရူပါဝစရေ ပစ္ဆိမစိတ္တသမင်္ဂီနံ ယဿ စိတ္တဿ အနန္တရာ အဝိတက္ကအဝိစာရံ ပစ္ဆိမစိတ္တံ ဥပ္ပဇ္ဇိဿတိ စတုတ္ထဇ္ဈာနံ သမာပန္နာနံ အသညသတ္တာနံ တေသံ တတ္ထ ဝစီသင်္ခါရော စ နုပ္ပဇ္ဇိဿတိ ကာယသင်္ခါရော စ နုပ္ပဇ္ဇိတ္ထ.
(က) ယဿ ယတ္ထ ကာယသင်္ခါရော နုပ္ပဇ္ဇိတ္ထ တဿ တတ္ထ စိတ္တသင်္ခါရော နုပ္ပဇ္ဇိဿတီတိ?
စတုတ္ထဇ္ဈာနံ သမာပန္နာနံ ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော နုပ္ပဇ္ဇိတ္ထ၊ နော စ တေသံ တတ္ထ စိတ္တသင်္ခါရော နုပ္ပဇ္ဇိဿတိ. ရူပါဝစရေ အရူပါဝစရေ ပစ္ဆိမစိတ္တသမင်္ဂီနံ အသညသတ္တာနံ တေသံ တတ္ထ ကာယသင်္ခါရော စ နုပ္ပဇ္ဇိတ္ထ စိတ္တသင်္ခါရော စ နုပ္ပဇ္ဇိဿတိ.
(ခ) ယဿ ဝါ ပန ယတ္ထ စိတ္တသင်္ခါရော နုပ္ပဇ္ဇိဿတိ တဿ တတ္ထ ကာယသင်္ခါရော နုပ္ပဇ္ဇိတ္ထာတိ?
ကာမာဝစရေ ပစ္ဆိမစိတ္တသမင်္ဂီနံ တေသံ တတ္ထ စိတ္တသင်္ခါရော နုပ္ပဇ္ဇိဿတိ၊ နော စ တေသံ တတ္ထ ကာယသင်္ခါရော နုပ္ပဇ္ဇိတ္ထ. ရူပါဝစရေ အရူပါဝစရေ ပစ္ဆိမစိတ္တသမင်္ဂီနံ အသညသတ္တာနံ တေသံ တတ္ထ စိတ္တသင်္ခါရော စ နုပ္ပဇ္ဇိဿတိ ကာယသင်္ခါရော စ နုပ္ပဇ္ဇိတ္ထ.
၇၈. (က) ယဿ ယတ္ထ ဝစီသင်္ခါရော နုပ္ပဇ္ဇိတ္ထ တဿ တတ္ထ စိတ္တသင်္ခါရော နုပ္ပဇ္ဇိဿတီတိ?
အဝိတက္ကအဝိစာရဘူမိယံ တေသံ တတ္ထ ဝစီသင်္ခါရော နုပ္ပဇ္ဇိတ္ထ၊ နော စ တေသံ တတ္ထ စိတ္တသင်္ခါရော နုပ္ပဇ္ဇိဿတိ. အဝိတက္ကအဝိစာရဘူမိယံ ပစ္ဆိမစိတ္တသမင်္ဂီနံ အသညသတ္တာနံ တေသံ တတ္ထ ဝစီသင်္ခါရော စ နုပ္ပဇ္ဇိတ္ထ စိတ္တသင်္ခါရော စ နုပ္ပဇ္ဇိဿတိ.
(ခ) ယဿ ဝါ ပန ယတ္ထ စိတ္တသင်္ခါရော နုပ္ပဇ္ဇိဿတိ တဿ တတ္ထ ဝစီသင်္ခါရော နုပ္ပဇ္ဇိတ္ထာတိ?
သဝိတက္ကသဝိစာရဘူမိယံ ပစ္ဆိမစိတ္တသမင်္ဂီနံ တေသံ တတ္ထ စိတ္တသင်္ခါရော နုပ္ပဇ္ဇိဿတိ၊ နော စ တေသံ တတ္ထ ဝစီသင်္ခါရော နုပ္ပဇ္ဇိတ္ထ. အဝိတက္ကအဝိစာရဘူမိယံ ပစ္ဆိမစိတ္တသမင်္ဂီနံ အသညသတ္တာနံ တေသံ တတ္ထ စိတ္တသင်္ခါရော စ နုပ္ပဇ္ဇိဿတိ ဝစီသင်္ခါရော စ နုပ္ပဇ္ဇိတ္ထ.
ဥပ္ပါဒဝါရော.