(၄) ပစ္စုပ္ပန္နာတီတဝါရော
(က) အနုလောမပုဂ္ဂလော
၄၉. (က) ယဿ ကာယသင်္ခါရော ဥပ္ပဇ္ဇတိ တဿ ဝစီသင်္ခါရော ဥပ္ပဇ္ဇိတ္ထာတိ? အာမန္တာ.
(ခ) ယဿ ဝါ ပန ဝစီသင်္ခါရော ဥပ္ပဇ္ဇိတ္ထ တဿ ကာယသင်္ခါရော ဥပ္ပဇ္ဇတီတိ?
သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ ဝစီသင်္ခါရော ဥပ္ပဇ္ဇိတ္ထ၊ နော စ တေသံ ကာယသင်္ခါရော ဥပ္ပဇ္ဇတိ. အဿာသပဿာသာနံ ဥပ္ပါဒက္ခဏေ တေသံ ဝစီသင်္ခါရော စ ဥပ္ပဇ္ဇိတ္ထ ကာယသင်္ခါရော စ ဥပ္ပဇ္ဇတိ.
(က) ယဿ ကာယသင်္ခါရော ဥပ္ပဇ္ဇတိ တဿ စိတ္တသင်္ခါရော ဥပ္ပဇ္ဇိတ္ထာတိ? အာမန္တာ.
(ခ) ယဿ ဝါ ပန စိတ္တသင်္ခါရော ဥပ္ပဇ္ဇိတ္ထ တဿ ကာယသင်္ခါရော ဥပ္ပဇ္ဇတီတိ?
သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ စိတ္တသင်္ခါရော ဥပ္ပဇ္ဇိတ္ထ၊ နော စ တေသံ ကာယသင်္ခါရော ဥပ္ပဇ္ဇတိ. အဿာသပဿာသာနံ ဥပ္ပါဒက္ခဏေ တေသံ စိတ္တသင်္ခါရော စ ဥပ္ပဇ္ဇိတ္ထ ကာယသင်္ခါရော စ ဥပ္ပဇ္ဇတိ.
၅၀. (က) ယဿ ဝစီသင်္ခါရော ဥပ္ပဇ္ဇတိ တဿ စိတ္တသင်္ခါရော ဥပ္ပဇ္ဇိတ္ထာတိ? အာမန္တာ.
(ခ) ယဿ ဝါ ပန စိတ္တသင်္ခါရော ဥပ္ပဇ္ဇိတ္ထ တဿ ဝစီသင်္ခါရော ဥပ္ပဇ္ဇတီတိ?
သဗ္ဗေသံ စိတ္တဿ ဘင်္ဂက္ခဏေ ဝိနာ ဝိတက္ကဝိစာရေဟိ စိတ္တဿ ဥပ္ပါဒက္ခဏေ နိရောဓသမာပန္နာနံ အသညသတ္တာနံ တေသံ စိတ္တသင်္ခါရော ဥပ္ပဇ္ဇိတ္ထ၊ နော စ တေသံ ဝစီသင်္ခါရော ဥပ္ပဇ္ဇတိ. ဝိတက္ကဝိစာရာနံ ဥပ္ပါဒက္ခဏေ တေသံ စိတ္တသင်္ခါရော စ ဥပ္ပဇ္ဇိတ္ထ ဝစီသင်္ခါရော စ ဥပ္ပဇ္ဇတိ.
(ခ) အနုလောမဩကာသော
၅၁. ယတ္ထ ကာယသင်္ခါရော ဥပ္ပဇ္ဇတိ။ပေ။.
(ဂ) အနုလောမပုဂ္ဂလောကာသာ
၅၂. (က) ယဿ ယတ္ထ ကာယသင်္ခါရော ဥပ္ပဇ္ဇတိ တဿ တတ္ထ ဝစီသင်္ခါရော ဥပ္ပဇ္ဇိတ္ထာတိ?
ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဥပ္ပါဒက္ခဏေ တေသံ တတ္ထ ကာယသင်္ခါရော ဥပ္ပဇ္ဇတိ၊ နော စ တေသံ တတ္ထ ဝစီသင်္ခါရော ဥပ္ပဇ္ဇိတ္ထ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဥပ္ပါဒက္ခဏေ တေသံ တတ္ထ ကာယသင်္ခါရော စ ဥပ္ပဇ္ဇတိ ဝစီသင်္ခါရော စ ဥပ္ပဇ္ဇိတ္ထ.
(ခ) ယဿ ဝါ ပန ယတ္ထ ဝစီသင်္ခါရော ဥပ္ပဇ္ဇိတ္ထ တဿ တတ္ထ ကာယသင်္ခါရော ဥပ္ပဇ္ဇတီတိ?
ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဘင်္ဂက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ ရူပါဝစရာနံ အရူပါဝစရာနံ တေသံ တတ္ထ ဝစီသင်္ခါရော ဥပ္ပဇ္ဇိတ္ထ၊ နော စ တေသံ တတ္ထ ကာယသင်္ခါရော ဥပ္ပဇ္ဇတိ. ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဥပ္ပါဒက္ခဏေ တေသံ တတ္ထ ဝစီသင်္ခါရော စ ဥပ္ပဇ္ဇိတ္ထ ကာယသင်္ခါရော စ ဥပ္ပဇ္ဇတိ.
(က) ယဿ ယတ္ထ ကာယသင်္ခါရော ဥပ္ပဇ္ဇတိ တဿ တတ္ထ စိတ္တသင်္ခါရော ဥပ္ပဇ္ဇိတ္ထာတိ? အာမန္တာ.
(ခ) ယဿ ဝါ ပန ယတ္ထ စိတ္တသင်္ခါရော ဥပ္ပဇ္ဇိတ္ထ တဿ တတ္ထ ကာယသင်္ခါရော ဥပ္ပဇ္ဇတီတိ?
သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ တေသံ တတ္ထ စိတ္တသင်္ခါရော ဥပ္ပဇ္ဇိတ္ထ၊ နော စ တေသံ တတ္ထ ကာယသင်္ခါရော ဥပ္ပဇ္ဇတိ. အဿာသပဿာသာနံ ဥပ္ပါဒက္ခဏေ တေသံ တတ္ထ စိတ္တသင်္ခါရော စ ဥပ္ပဇ္ဇိတ္ထ ကာယသင်္ခါရော စ ဥပ္ပဇ္ဇတိ.
၅၃. (က) ယဿ ယတ္ထ ဝစီသင်္ခါရော ဥပ္ပဇ္ဇတိ တဿ တတ္ထ စိတ္တသင်္ခါရော ဥပ္ပဇ္ဇိတ္ထာတိ? အာမန္တာ.
(ခ) ယဿ ဝါ ပန ယတ္ထ စိတ္တသင်္ခါရော ဥပ္ပဇ္ဇိတ္ထ တဿ တတ္ထ ဝစီသင်္ခါရော ဥပ္ပဇ္ဇတီတိ?
သဗ္ဗေသံ စိတ္တဿ ဘင်္ဂက္ခဏေ ဝိနာ ဝိတက္ကဝိစာရေဟိ စိတ္တဿ ဥပ္ပါဒက္ခဏေ တေသံ တတ္ထ စိတ္တသင်္ခါရော ဥပ္ပဇ္ဇိတ္ထ၊ နော စ တေသံ တတ္ထ ဝစီသင်္ခါရော ဥပ္ပဇ္ဇတိ. ဝိတက္ကဝိစာရာနံ ဥပ္ပါဒက္ခဏေ တေသံ တတ္ထ စိတ္တသင်္ခါရော စ ဥပ္ပဇ္ဇိတ္ထ ဝစီသင်္ခါရော စ ဥပ္ပဇ္ဇတိ.
(ဃ) ပစ္စနီကပုဂ္ဂလော
၅၄. (က) ယဿ ကာယသင်္ခါရော နုပ္ပဇ္ဇတိ တဿ ဝစီသင်္ခါရော နုပ္ပဇ္ဇိတ္ထာတိ? ဥပ္ပဇ္ဇိတ္ထ.
(ခ) ယဿ ဝါ ပန ဝစီသင်္ခါရော နုပ္ပဇ္ဇိတ္ထ တဿ ကာယသင်္ခါရော နုပ္ပဇ္ဇတီတိ? နတ္ထိ.
(က) ယဿ ကာယသင်္ခါရော နုပ္ပဇ္ဇတိ တဿ စိတ္တသင်္ခါရော နုပ္ပဇ္ဇိတ္ထာတိ? ဥပ္ပဇ္ဇိတ္ထ.
(ခ) ယဿ ဝါ ပန စိတ္တသင်္ခါရော နုပ္ပဇ္ဇိတ္ထ တဿ ကာယသင်္ခါရော နုပ္ပဇ္ဇတီတိ? နတ္ထိ.
၅၅. (က) ယဿ ဝစီသင်္ခါရော နုပ္ပဇ္ဇတိ တဿ စိတ္တသင်္ခါရော နုပ္ပဇ္ဇိတ္ထာတိ? ဥပ္ပဇ္ဇိတ္ထ.
(ခ) ယဿ ဝါ ပန။ပေ။? နတ္ထိ.
(င) ပစ္စနီကဩကာသော
၅၆. ယတ္ထ ကာယသင်္ခါရော နုပ္ပဇ္ဇတိ။ပေ။.
(စ) ပစ္စနီကပုဂ္ဂလောကာသာ
၅၇. (က) ယဿ ယတ္ထ ကာယသင်္ခါရော နုပ္ပဇ္ဇတိ တဿ တတ္ထ ဝစီသင်္ခါရော နုပ္ပဇ္ဇိတ္ထာတိ?
ပဌမဇ္ဈာနံ သမာပန္နာနံ ကာမာဝစရာနံ အဿာသပဿာသာနံ ဘင်္ဂက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ ရူပါဝစရာနံ အရူပါဝစရာနံ တေသံ တတ္ထ ကာယသင်္ခါရော နုပ္ပဇ္ဇတိ၊ နော စ တေသံ တတ္ထ ဝစီသင်္ခါရော နုပ္ပဇ္ဇိတ္ထ. ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဘင်္ဂက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ စတုတ္ထဇ္ဈာနံ သမာပန္နာနံ သုဒ္ဓါဝါသာနံ ဒုတိယေ စိတ္တေ ဝတ္တမာနေ အသညသတ္တာနံ တေသံ တတ္ထ ကာယသင်္ခါရော စ နုပ္ပဇ္ဇတိ ဝစီသင်္ခါရော စ နုပ္ပဇ္ဇိတ္ထ.
(ခ) ယဿ ဝါ ပန ယတ္ထ ဝစီသင်္ခါရော နုပ္ပဇ္ဇိတ္ထ တဿ တတ္ထ ကာယသင်္ခါရော နုပ္ပဇ္ဇတီတိ?
ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဥပ္ပါဒက္ခဏေ တေသံ တတ္ထ ဝစီသင်္ခါရော နုပ္ပဇ္ဇိတ္ထ၊ နော စ တေသံ တတ္ထ ကာယသင်္ခါရော နုပ္ပဇ္ဇတိ. ဒုတိယဇ္ဈာနံ တတိယဇ္ဈာနံ သမာပန္နာနံ အဿာသပဿာသာနံ ဘင်္ဂက္ခဏေ တေသံယေဝ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ စတုတ္ထဇ္ဈာနံ သမာပန္နာနံ သုဒ္ဓါဝါသာနံ ဒုတိယေ စိတ္တေ ဝတ္တမာနေ အသညသတ္တာနံ တေသံ တတ္ထ ဝစီသင်္ခါရော စ နုပ္ပဇ္ဇိတ္ထ ကာယသင်္ခါရော စ နုပ္ပဇ္ဇတိ.
(က) ယဿ ယတ္ထ ကာယသင်္ခါရော နုပ္ပဇ္ဇတိ တဿ တတ္ထ စိတ္တသင်္ခါရော နုပ္ပဇ္ဇိတ္ထာတိ?
သဗ္ဗေသံ စိတ္တဿ ဘင်္ဂက္ခဏေ ဝိနာ အဿာသပဿာသေဟိ စိတ္တဿ ဥပ္ပါဒက္ခဏေ တေသံ တတ္ထ ကာယသင်္ခါရော နုပ္ပဇ္ဇတိ၊ နော စ တေသံ တတ္ထ စိတ္တသင်္ခါရော နုပ္ပဇ္ဇိတ္ထ. သုဒ္ဓါဝါသံ ဥပပဇ္ဇန္တာနံ အသညသတ္တာနံ တေသံ တတ္ထ ကာယသင်္ခါရော စ နုပ္ပဇ္ဇတိ စိတ္တသင်္ခါရော စ နုပ္ပဇ္ဇိတ္ထ.
(ခ) ယဿ ဝါ ပန ယတ္ထ စိတ္တသင်္ခါရော နုပ္ပဇ္ဇိတ္ထ တဿ တတ္ထ ကာယသင်္ခါရော နုပ္ပဇ္ဇတီတိ? အာမန္တာ.
၅၈. (က) ယဿ ယတ္ထ ဝစီသင်္ခါရော နုပ္ပဇ္ဇတိ တဿ တတ္ထ စိတ္တသင်္ခါရော နုပ္ပဇ္ဇိတ္ထာတိ?
သဗ္ဗေသံ စိတ္တဿ ဘင်္ဂက္ခဏေ ဝိနာ ဝိတက္ကဝိစာရေဟိ စိတ္တဿ ဥပ္ပါဒက္ခဏေ တေသံ တတ္ထ ဝစီသင်္ခါရော နုပ္ပဇ္ဇတိ၊ နော စ တေသံ တတ္ထ စိတ္တသင်္ခါရော နုပ္ပဇ္ဇိတ္ထ. သုဒ္ဓါဝါသံ ဥပပဇ္ဇန္တာနံ အသညသတ္တာနံ တေသံ တတ္ထ ဝစီသင်္ခါရော စ နုပ္ပဇ္ဇတိ စိတ္တသင်္ခါရော စ နုပ္ပဇ္ဇိတ္ထ.
(ခ) ယဿ ဝါ ပန ယတ္ထ။ပေ။? အာမန္တာ.