၅. ပစ္စုပ္ပန္နာနာဂတဝါရော

၁၆၉. (က) ယော ဒုက္ခသစ္စံ ပရိဇာနာတိ သော သမုဒယသစ္စံ ပဇဟိဿတီတိ? နော.

(ခ) ယော ဝါ ပန သမုဒယသစ္စံ ပဇဟိဿတိ သော ဒုက္ခသစ္စံ ပရိဇာနာတီတိ? နော.

(က) ယော ဒုက္ခသစ္စံ န ပရိဇာနာတိ သော သမုဒယသစ္စံ နပ္ပဇဟိဿတီတိ?

ယေ မဂ္ဂံ ပဋိလဘိဿန္တိ တေ ဒုက္ခသစ္စံ န ပရိဇာနန္တိ၊ နော စ သမုဒယသစ္စံ နပ္ပဇဟိဿန္တိ. အရဟာ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေ ဒုက္ခသစ္စဉ္စ န ပရိဇာနန္တိ သမုဒယသစ္စဉ္စ နပ္ပဇဟိဿန္တိ.

(ခ) ယော ဝါ ပန သမုဒယသစ္စံ နပ္ပဇဟိဿတိ သော ဒုက္ခသစ္စံ န ပရိဇာနာတီတိ?

အဂ္ဂမဂ္ဂသမင်္ဂီ သမုဒယသစ္စံ နပ္ပဇဟိဿတိ၊ နော စ ဒုက္ခသစ္စံ န ပရိဇာနာတိ. အရဟာ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေ သမုဒယသစ္စဉ္စ နပ္ပဇဟိဿန္တိ ဒုက္ခသစ္စဉ္စ န ပရိဇာနန္တိ.