(၅) ပစ္စုပ္ပန္နာနာဂတဝါရော

(က) အနုလောမပုဂ္ဂလော

၁၁၆. (က) ယဿ ဒုက္ခသစ္စံ နိရုဇ္ဈတိ တဿ သမုဒယသစ္စံ နိရုဇ္ဈိဿတီတိ?

အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ တေသံ ဒုက္ခသစ္စံ နိရုဇ္ဈတိ၊ နော စ တေသံ သမုဒယသစ္စံ နိရုဇ္ဈိဿတိ. ဣတရေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ ဒုက္ခသစ္စဉ္စ နိရုဇ္ဈတိ သမုဒယသစ္စဉ္စ နိရုဇ္ဈိဿတိ.

(ခ) ယဿ ဝါ ပန သမုဒယသစ္စံ နိရုဇ္ဈိဿတိ တဿ ဒုက္ခသစ္စံ နိရုဇ္ဈတီတိ?

သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ သမုဒယသစ္စံ နိရုဇ္ဈိဿတိ၊ နော စ တေသံ ဒုက္ခသစ္စံ နိရုဇ္ဈတိ. သဗ္ဗေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ သမုဒယသစ္စဉ္စ နိရုဇ္ဈိဿတိ ဒုက္ခသစ္စဉ္စ နိရုဇ္ဈတိ.

(က) ယဿ ဒုက္ခသစ္စံ နိရုဇ္ဈတိ တဿ မဂ္ဂသစ္စံ နိရုဇ္ဈိဿတီတိ?

အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ ဒုက္ခသစ္စံ နိရုဇ္ဈတိ၊ နော စ တေသံ မဂ္ဂသစ္စံ နိရုဇ္ဈိဿတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ ဒုက္ခသစ္စဉ္စ နိရုဇ္ဈတိ မဂ္ဂသစ္စဉ္စ နိရုဇ္ဈိဿတိ.

(ခ) ယဿ ဝါ ပန မဂ္ဂသစ္စံ နိရုဇ္ဈိဿတိ တဿ ဒုက္ခသစ္စံ နိရုဇ္ဈတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ မဂ္ဂသစ္စံ နိရုဇ္ဈိဿတိ၊ နော စ တေသံ ဒုက္ခသစ္စံ နိရုဇ္ဈတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ မဂ္ဂသစ္စဉ္စ နိရုဇ္ဈိဿတိ ဒုက္ခသစ္စဉ္စ နိရုဇ္ဈတိ.

၁၁၇. (က) ယဿ သမုဒယသစ္စံ နိရုဇ္ဈတိ တဿ မဂ္ဂသစ္စံ နိရုဇ္ဈိဿတီတိ?

ယေ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တေသံ သမုဒယသစ္စံ နိရုဇ္ဈတိ၊ နော စ တေသံ မဂ္ဂသစ္စံ နိရုဇ္ဈိဿတိ. ယေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တေသံ သမုဒယသစ္စဉ္စ နိရုဇ္ဈတိ မဂ္ဂသစ္စဉ္စ နိရုဇ္ဈိဿတိ.

(ခ) ယဿ ဝါ ပန မဂ္ဂသစ္စံ နိရုဇ္ဈိဿတိ တဿ သမုဒယသစ္စံ နိရုဇ္ဈတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ နိရောဓသမာပန္နာနံ အသညသတ္တာနံ တေသံ မဂ္ဂသစ္စံ နိရုဇ္ဈိဿတိ၊ နော စ တေသံ သမုဒယသစ္စံ နိရုဇ္ဈတိ. ယေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တေသံ မဂ္ဂသစ္စဉ္စ နိရုဇ္ဈိဿတိ သမုဒယသစ္စဉ္စ နိရုဇ္ဈတိ.

(ခ) အနုလောမဩကာသော

၁၁၈. ယတ္ထ ဒုက္ခသစ္စံ နိရုဇ္ဈတိ။ပေ။.

(ဂ) အနုလောမပုဂ္ဂလောကာသာ

၁၁၉. (က) ယဿ ယတ္ထ ဒုက္ခသစ္စံ နိရုဇ္ဈတိ တဿ တတ္ထ သမုဒယသစ္စံ နိရုဇ္ဈိဿတီတိ?

အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ ဒုက္ခသစ္စံ နိရုဇ္ဈတိ၊ နော စ တေသံ တတ္ထ သမုဒယသစ္စံ နိရုဇ္ဈိဿတိ. ဣတရေသံ စတုဝေါကာရာ ပဉ္စဝေါကာရာ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ တတ္ထ ဒုက္ခသစ္စဉ္စ နိရုဇ္ဈတိ သမုဒယသစ္စဉ္စ နိရုဇ္ဈိဿတိ.

(ခ) ယဿ ဝါ ပန ယတ္ထ သမုဒယသစ္စံ နိရုဇ္ဈိဿတိ တဿ တတ္ထ ဒုက္ခသစ္စံ နိရုဇ္ဈတီတိ?

စတုဝေါကာရံ ပဉ္စဝေါကာရံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ တတ္ထ သမုဒယသစ္စံ နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ နိရုဇ္ဈတိ. စတုဝေါကာရာ ပဉ္စဝေါကာရာ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ တတ္ထ သမုဒယသစ္စဉ္စ နိရုဇ္ဈိဿတိ ဒုက္ခသစ္စဉ္စ နိရုဇ္ဈတိ.

(က) ယဿ ယတ္ထ ဒုက္ခသစ္စံ နိရုဇ္ဈတိ တဿ တတ္ထ မဂ္ဂသစ္စံ နိရုဇ္ဈိဿတီတိ?

အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ ဒုက္ခသစ္စံ နိရုဇ္ဈတိ၊ နော စ တေသံ တတ္ထ မဂ္ဂသစ္စံ နိရုဇ္ဈိဿတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ တတ္ထ ဒုက္ခသစ္စဉ္စ နိရုဇ္ဈတိ မဂ္ဂသစ္စဉ္စ နိရုဇ္ဈိဿတိ.

(ခ) ယဿ ဝါ ပန ယတ္ထ မဂ္ဂသစ္စံ နိရုဇ္ဈိဿတိ တဿ တတ္ထ ဒုက္ခသစ္စံ နိရုဇ္ဈတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ တတ္ထ မဂ္ဂသစ္စံ နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ နိရုဇ္ဈတိ. ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ ယေ စညေ မဂ္ဂံ ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ တတ္ထ မဂ္ဂသစ္စဉ္စ နိရုဇ္ဈိဿတိ ဒုက္ခသစ္စဉ္စ နိရုဇ္ဈတိ.

၁၂၀. (က) ယဿ ယတ္ထ သမုဒယသစ္စံ နိရုဇ္ဈတိ တဿ တတ္ထ မဂ္ဂသစ္စံ နိရုဇ္ဈိဿတီတိ?

အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တေသံ တတ္ထ သမုဒယသစ္စံ နိရုဇ္ဈတိ၊ နော စ တေသံ တတ္ထ မဂ္ဂသစ္စံ နိရုဇ္ဈိဿတိ. ယေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တေသံ တတ္ထ သမုဒယသစ္စဉ္စ နိရုဇ္ဈတိ မဂ္ဂသစ္စဉ္စ နိရုဇ္ဈိဿတိ.

(ခ) ယဿ ဝါ ပန ယတ္ထ မဂ္ဂသစ္စံ နိရုဇ္ဈိဿတိ တဿ တတ္ထ သမုဒယသစ္စံ နိရုဇ္ဈတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ တတ္ထ မဂ္ဂသစ္စံ နိရုဇ္ဈိဿတိ၊ နော စ တေသံ တတ္ထ သမုဒယသစ္စံ နိရုဇ္ဈတိ. ယေ မဂ္ဂံ ပဋိလဘိဿန္တိ တေသံ တဏှာယ ဘင်္ဂက္ခဏေ တေသံ တတ္ထ မဂ္ဂသစ္စဉ္စ နိရုဇ္ဈိဿတိ သမုဒယသစ္စဉ္စ နိရုဇ္ဈတိ.

(ဃ) ပစ္စနီကပုဂ္ဂလော

၁၂၁. (က) ယဿ ဒုက္ခသစ္စံ န နိရုဇ္ဈတိ တဿ သမုဒယသစ္စံ န နိရုဇ္ဈိဿတီတိ?

သဗ္ဗေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ ဒုက္ခသစ္စံ န နိရုဇ္ဈတိ၊ နော စ တေသံ သမုဒယသစ္စံ န နိရုဇ္ဈိဿတိ. အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ အရူပေ အဂ္ဂမဂ္ဂဿ စ ဖလဿ စ ဘင်္ဂက္ခဏေ တေသံ ဒုက္ခသစ္စဉ္စ န နိရုဇ္ဈတိ သမုဒယသစ္စဉ္စ န နိရုဇ္ဈိဿတိ.

(ခ) ယဿ ဝါ ပန သမုဒယသစ္စံ န နိရုဇ္ဈိဿတိ တဿ ဒုက္ခသစ္စံ န နိရုဇ္ဈတီတိ?

အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ တေသံ သမုဒယသစ္စံ န နိရုဇ္ဈိဿတိ၊ နော စ တေသံ ဒုက္ခသစ္စံ န နိရုဇ္ဈတိ. အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ အရူပေ အဂ္ဂမဂ္ဂဿ စ ဖလဿ စ ဘင်္ဂက္ခဏေ တေသံ သမုဒယသစ္စဉ္စ န နိရုဇ္ဈိဿတိ ဒုက္ခသစ္စဉ္စ န နိရုဇ္ဈတိ.

(က) ယဿ ဒုက္ခသစ္စံ န နိရုဇ္ဈတိ တဿ မဂ္ဂသစ္စံ န နိရုဇ္ဈိဿတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ ဒုက္ခသစ္စံ န နိရုဇ္ဈတိ၊ နော စ တေသံ မဂ္ဂသစ္စံ န နိရုဇ္ဈိဿတိ. အရဟန္တာနံ စိတ္တဿ ဥပ္ပါဒက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ အဂ္ဂမဂ္ဂဿ စ ဖလဿ စ ဘင်္ဂက္ခဏေ တေသံ ဒုက္ခသစ္စဉ္စ န နိရုဇ္ဈတိ မဂ္ဂသစ္စဉ္စ န နိရုဇ္ဈိဿတိ.

(ခ) ယဿ ဝါ ပန မဂ္ဂသစ္စံ န နိရုဇ္ဈိဿတိ တဿ ဒုက္ခသစ္စံ န နိရုဇ္ဈတီတိ?

အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ တေသံ မဂ္ဂသစ္စံ န နိရုဇ္ဈိဿတိ၊ နော စ တေသံ ဒုက္ခသစ္စံ န နိရုဇ္ဈတိ. အရဟန္တာနံ စိတ္တဿ ဥပ္ပါဒက္ခဏေ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ အဂ္ဂမဂ္ဂဿ စ ဖလဿ စ ဘင်္ဂက္ခဏေ တေသံ မဂ္ဂသစ္စဉ္စ န နိရုဇ္ဈိဿတိ ဒုက္ခသစ္စဉ္စ န နိရုဇ္ဈတိ.

၁၂၂. (က) ယဿ သမုဒယသစ္စံ န နိရုဇ္ဈတိ တဿ မဂ္ဂသစ္စံ န နိရုဇ္ဈိဿတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ နိရောဓသမာပန္နာနံ အသညသတ္တာနံ တေသံ သမုဒယသစ္စံ န နိရုဇ္ဈတိ၊ နော စ တေသံ မဂ္ဂသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ သမုဒယသစ္စဉ္စ န နိရုဇ္ဈတိ မဂ္ဂသစ္စဉ္စ န နိရုဇ္ဈိဿတိ.

(ခ) ယဿ ဝါ ပန မဂ္ဂသစ္စံ န နိရုဇ္ဈိဿတိ တဿ သမုဒယသစ္စံ န နိရုဇ္ဈတီတိ?

ယေ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တေသံ မဂ္ဂသစ္စံ န နိရုဇ္ဈိဿတိ၊ နော စ တေသံ သမုဒယသစ္စံ န နိရုဇ္ဈတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ [ဝတ္တမာနေ၊ နိရောဓသမာပန္နာနံ အသညသတ္တာနံ (သီ. သျာ.)] တေသံ မဂ္ဂသစ္စဉ္စ န နိရုဇ္ဈိဿတိ သမုဒယသစ္စဉ္စ န နိရုဇ္ဈတိ.

(င) ပစ္စနီကဩကာသော

၁၂၃. ယတ္ထ ဒုက္ခသစ္စံ န နိရုဇ္ဈတိ။ပေ။.

(စ) ပစ္စနီကပုဂ္ဂလောကာသာ

၁၂၄. (က) ယဿ ယတ္ထ ဒုက္ခသစ္စံ န နိရုဇ္ဈတိ တဿ တတ္ထ သမုဒယသစ္စံ န နိရုဇ္ဈိဿတီတိ?

စတုဝေါကာရံ ပဉ္စဝေါကာရံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ တတ္ထ ဒုက္ခသစ္စံ န နိရုဇ္ဈတိ၊ နော စ တေသံ တတ္ထ သမုဒယသစ္စံ န နိရုဇ္ဈိဿတိ. အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ အရူပေ အဂ္ဂမဂ္ဂဿ စ ဖလဿ စ ဘင်္ဂက္ခဏေ အသညသတ္တံ ဥပပဇ္ဇန္တာနံ တေသံ တတ္ထ ဒုက္ခသစ္စဉ္စ န နိရုဇ္ဈတိ သမုဒယသစ္စဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ သမုဒယသစ္စံ န နိရုဇ္ဈိဿတိ တဿ တတ္ထ ဒုက္ခသစ္စံ န နိရုဇ္ဈတီတိ?

အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ သမုဒယသစ္စံ န နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ န နိရုဇ္ဈတိ. အဂ္ဂမဂ္ဂဿ ဥပ္ပါဒက္ခဏေ အရဟန္တာနံ စိတ္တဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ အရူပေ အဂ္ဂမဂ္ဂဿ စ ဖလဿ စ ဘင်္ဂက္ခဏေ အသညသတ္တံ ဥပပဇ္ဇန္တာနံ တေသံ တတ္ထ သမုဒယသစ္စဉ္စ န နိရုဇ္ဈိဿတိ ဒုက္ခသစ္စဉ္စ န နိရုဇ္ဈတိ.

(က) ယဿ ယတ္ထ ဒုက္ခသစ္စံ န နိရုဇ္ဈတိ တဿ တတ္ထ မဂ္ဂသစ္စံ န နိရုဇ္ဈိဿတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ တဿ စိတ္တဿ ဥပ္ပါဒက္ခဏေ ယေ စညေ မဂ္ဂံ ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ မဂ္ဂဿ စ ဖလဿ စ ဘင်္ဂက္ခဏေ တေသံ တတ္ထ ဒုက္ခသစ္စံ န နိရုဇ္ဈတိ၊ နော စ တေသံ တတ္ထ မဂ္ဂသစ္စံ န နိရုဇ္ဈိဿတိ. အရဟန္တာနံ စိတ္တဿ ဥပ္ပါဒက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အသညသတ္တံ ဥပပဇ္ဇန္တာနံ အရူပေ အဂ္ဂမဂ္ဂဿ စ ဖလဿ စ ဘင်္ဂက္ခဏေ တေသံ တတ္ထ ဒုက္ခသစ္စဉ္စ န နိရုဇ္ဈတိ မဂ္ဂသစ္စဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ မဂ္ဂသစ္စံ န နိရုဇ္ဈိဿတိ တဿ တတ္ထ ဒုက္ခသစ္စံ န နိရုဇ္ဈတီတိ?

အဂ္ဂမဂ္ဂဿ ဘင်္ဂက္ခဏေ အရဟန္တာနံ စိတ္တဿ ဘင်္ဂက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ စဝန္တာနံ ပဝတ္တေ စိတ္တဿ ဘင်္ဂက္ခဏေ အသညသတ္တာ စဝန္တာနံ တေသံ တတ္ထ မဂ္ဂသစ္စံ န နိရုဇ္ဈိဿတိ၊ နော စ တေသံ တတ္ထ ဒုက္ခသစ္စံ န နိရုဇ္ဈတိ. အရဟန္တာနံ စိတ္တဿ ဥပ္ပါဒက္ခဏေ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ ဥပပဇ္ဇန္တာနံ ပဝတ္တေ စိတ္တဿ ဥပ္ပါဒက္ခဏေ အရူပေ အဂ္ဂမဂ္ဂဿ စ ဖလဿ စ ဘင်္ဂက္ခဏေ အသညသတ္တံ ဥပပဇ္ဇန္တာနံ တေသံ တတ္ထ မဂ္ဂသစ္စဉ္စ န နိရုဇ္ဈိဿတိ ဒုက္ခသစ္စဉ္စ န နိရုဇ္ဈတိ.

၁၂၅. (က) ယဿ ယတ္ထ သမုဒယသစ္စံ န နိရုဇ္ဈတိ တဿ တတ္ထ မဂ္ဂသစ္စံ န နိရုဇ္ဈိဿတီတိ?

အဂ္ဂမဂ္ဂဿ ဥပ္ပါဒက္ခဏေ ယဿ စိတ္တဿ အနန္တရာ အဂ္ဂမဂ္ဂံ ပဋိလဘိဿန္တိ ယေ စညေ မဂ္ဂံ ပဋိလဘိဿန္တိ တေသံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ တေသံ တတ္ထ သမုဒယသစ္စံ န နိရုဇ္ဈတိ၊ နော စ တေသံ တတ္ထ မဂ္ဂသစ္စံ န နိရုဇ္ဈိဿတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ တတ္ထ သမုဒယသစ္စဉ္စ န နိရုဇ္ဈတိ မဂ္ဂသစ္စဉ္စ န နိရုဇ္ဈိဿတိ.

(ခ) ယဿ ဝါ ပန ယတ္ထ မဂ္ဂသစ္စံ န နိရုဇ္ဈိဿတိ တဿ တတ္ထ သမုဒယသစ္စံ န နိရုဇ္ဈတီတိ?

အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဘင်္ဂက္ခဏေ တေသံ တတ္ထ မဂ္ဂသစ္စံ န နိရုဇ္ဈိဿတိ၊ နော စ တေသံ တတ္ထ သမုဒယသစ္စံ န နိရုဇ္ဈတိ. အဂ္ဂမဂ္ဂဿ ဘင်္ဂက္ခဏေ အရဟန္တာနံ အာပါယိကာနံ ယေ စ ပုထုဇ္ဇနာ မဂ္ဂံ န ပဋိလဘိဿန္တိ တေသံ တဏှာယ ဥပ္ပါဒက္ခဏေ တဏှာဝိပ္ပယုတ္တစိတ္တေ ဝတ္တမာနေ အသညသတ္တာနံ တေသံ တတ္ထ မဂ္ဂသစ္စဉ္စ န နိရုဇ္ဈိဿတိ သမုဒယသစ္စဉ္စ န နိရုဇ္ဈိတိ.